Спецыялісты санітарна-эпідэміялагічнай службы Мінска сумесна з супрацоўнікамі «Мінскводаканала» правялі праверку якасці вады пасля аварыі на магістральным водаправодзе, у выніку якой жыхары трох раёнаў — Заводскага, Ленінскага і Кастрычніцкага — на пэўны час засталіся без вады.
Некалькі дзён таму эксперты не рэкамендавалі ў гэтых раёнах выкарыстоўваць ваду з-пад крана для гатавання ежы і прыняцця душа, але пасля адбору пробаў вады ў «аб'ектах сацыяльнай інфраструктуры» і ў жылых дамах спецыялісты пацвердзілі, што вада адпавядае гігіенічным нормам.
«Па стане на 14:00 30 верасня ўсе адабраныя пробы вады са знешняй сеткі водазабеспячэння адпавядаюць патрабаванням гігіенічных нормаў па даследаваных паказчыках бяспекі, як па хімічным складзе, так і па мікрабіялагічнай бяспецы», — запэўнілі ў Мінскім гарадскім цэнтры гігіены і эпідэміялогіі.
Нагадаем, што ўвечары 26 верасня ў Кастрычніцкім, Заводскім і Ленінскім раёнах Мінска назіраліся перабоі ў водазабеспячэнні. Аднаўленне падачы вады ў дамы пачалося бліжэй да паўночы.
27 верасня мінскія санітарныя ўрачы далі рэкамендацыі жыхарам трох пацярпелых раёнаў выкарыстоўваць падвозную ці бутэляваную ваду. Мерапрыемствы па прамыўцы сетак былі завершаныя напрыканцы таго самага дня.
Цяпер чытаюць
Юрась Зянковіч расказаў пра сваё вызваленне і шлях у ЗША5
Каментары