«Полк — частка УСУ. Ні пра якія ўнутраныя канфлікты не можа быць і гаворкі». ГУР патлумачыла сітуацыю з палком Каліноўскага
Прадстаўнік Галоўнага ўпраўлення разведкі Міністэрства абароны Украіны Андрэй Чарняк у каментары выданню «Люстэрка» акрэсліў пазіцыю гэтага ведамства адносна сітуацыі, якая апошнім часам узнікла з беларускім палком Каліноўскага.
Андрэй Чарняк яшчэ раз пацвердзіў змены ў камандаванні палка Каліноўскага, што абавязкі камандзіра палка цяпер выконвае Павел Шурмей. Заадно ён адказаў і на іншыя пытанні:
— Ці праўда, што новыя ўмовы з боку вайсковай часці «знішчаюць сістэму рэкрутынгу і пазбавілі магчымасці паўнавартаснага набору добраахвотнікаў», як заяўляе частка падраздзялення ў сацсетках?
— Сапраўды, ёсць пэўныя патрабаванні да людзей, якія прыходзяць у падраздзяленні, якія ўваходзяць у склад Міжнароднага легіёна ГУР МА Украіны. У нас ёсць сістэма рэкрутынгу, адбору, праверак, і мы не можам дазволіць набіраць любога. Людзі павінны прайсці пэўныя этапы праверкі. Гэта нармальная практыка — тут няма нейкай сенсацыі, — адказаў Чарняк. —
Старонкі ў сацыяльных сетках не з'яўляюцца афіцыйнымі акаўнтамі палка Каліноўскага. Доступ да іх знаходзіцца ў нейкіх прыватных асоб, таму публікацыі там не адлюстроўваюць пазіцыі фармавання.
— Чаму тая самастойнасць, якая першапачаткова была дадзеная палку Каліноўскага, цяпер змяншаецца?
— А што значыць самастойнасць вайсковага падраздзялення, якое ўваходзіць у склад Сіл абароны Украіны? Калі мы ствараем вайсковае падраздзяленне, яно абавязана дзейнічаць выключна ў рамках закона.
Таму полк імя Кастуся Каліноўскага, які ўваходзіць у склад Міжнароднага легіёна ГУР МАУ, кіруецца і выконвае тыя ж законы і правілы, якія існуюць для ўсіх вайскоўцаў Украіны. Пры гэтым аўтаномнасць у некаторых аспектах унутранай арганізацыі палка беларускіх добраахвотнікаў, якая ніяк не супярэчыць украінскаму заканадаўству, захоўваецца.
— Полк працягне існаваць як самастойнае падраздзяленне?
— Так. Але гэта частка Сіл абароны Украіны. Полк імя Кастуся Каліноўскага — падраздзяленне, якое, паўтару, уваходзіць у склад Міжнароднага легіёна ГУР МАУ. Такім чынам, на яго распаўсюджваюцца патрабаванні заканадаўства Украіны і статутаў узброеных сіл.
— Можна сказаць, што цяпер ёсць нейкі канфлікт паміж палком Каліноўскага і камандаваннем Міжнароднага легіёну?
— Мы дзякуем і высока цэнім унёсак кожнага добраахвотніка, які са зброяй у руках прыйшоў на дапамогу ўкраінскаму народу.
Хачу нагадаць, што полк імя Кастуся Каліноўскага ― гэта вайсковае падраздзяленне Сіл абароны Украіны, у якім ні пра якія ўнутраныя канфлікты не можа быць і гаворкі.
Цяпер чытаюць
Бабарыка: Не могуць здымацца санкцыі з прадпрыемстваў і людзей, задзейнічаных у вайне. Выпусціце палітвязняў цаной забойства ўкраінцаў?25
Бабарыка: Не могуць здымацца санкцыі з прадпрыемстваў і людзей, задзейнічаных у вайне. Выпусціце палітвязняў цаной забойства ўкраінцаў?
Максім Знак пра прэс-канферэнцыю ва Украіне: Мы дамовіліся не ўздымаць найбольш балючыя тэмы — катаванняў, санкцый, вайны. Можа, мусілі мы па-іншаму зрабіць88
Каментары