«Я думаў, ён у Польшчы з усімі». Яўген Крыжаноўскі асвойвае тыкток — здымае ролікі пра лецішча і «блогера» Пячонкіна
Ці памятаеце Яўгена Крыжаноўскага з тэатра «Хрыстафор»? Цяпер беларускі комік знайшоў сабе новы занятак — ён робіць ролікі ў тыктоку і збірае тысячы праглядаў. Мы вывучылі, што посціць Крыжаноўскі.
У тыктоку Яўгена 34 тысячы падпісчыкаў — грунтоўна, асабліва калі ўлічыць, што на сваім ютуб-канале ён не дабраўся і да 1500 падпісантаў.
Больш за 20 відэа на старонцы Крыжаноўскага знятыя ад асобы выдуманага героя — Мікалая Пячонкіна. Гэта сталы мужчына, які носіць велізарныя круглыя акуляры і кашулі — нічога з гэтага яму не пасуе. Пячонкін размаўляе на трасянцы, у яго ёсць жонка Марына, якая забараняе яму наведваць краму, дзе раней Мікалая падманулі.
Пячонкін прызнаецца, што раней вучыўся ў спецінтэрнаце для «ўдаронных дзяцей», і расказвае, што, калі яго нараджалі, павітуха ўпусціла яго галавой на зямлю, і праз гэта ён «інвалід на галаву трэцяй ступені». Таксама герой Крыжаноўскага пужаецца слова «блогер» — спачатку яму падалося, што яно роднаснае слову «блохі», называе практолага «рактолагам», а жонка Пячонкіна прапануе яму быць на агародзе пудзілам — галоўнае не забыць панаму.
Але не Пячонкіным адзіным. Амаль што 214 тысяч праглядаў на тыктоку Крыжаноўскага мае кароценькі ролік, зняты зусім нядаўна. Дзеянне відэа адбываецца ў краме: Яўген бярэ ў рукі пляшку гарэлкі, радасна ўсміхаецца і працягвае выбіраць алкаголь, але потым бачыць аб’яву, што «1 верасня — дзень цвярозасці», расчаравана ставіць пляшку назад і сыходзіць з крамы.
Пры канцы чэрвеня акцёр выпусціў ролік пра наведванне баранавіцкага парка жывёл «Дыпрыз». Там ён цалуе казу і расказвае ёй, што яго «таксама мала кормяць», але казе быццам жыць лепей, бо ёй не трэба заробак і пенсія. А таксама паказвае драўляны псеўдатуалет з манекенам і кажа, што гэта «як у дзяцінстве».
Улетку Крыжаноўскі захапіўся здымкамі ролікаў на сваім лецішчы. Напрыклад, ён з гонарам паказваў свой надзел і апавітую дзікім вінаградам душавую («адчуваеш сябе недзе на Таіці пад пальмамі, нечым такім прыгожым, пад вадаспадам»), і запісвае відэа пра тое, як угаворвае котку саступіць яму месца ў гамаку. Апошні на сёння ролік з лецішча Крыжаноўскі запісваў проста ў плаўках у гумавым басейне.
У такой творчасці Крыжаноўскага багата прыхільнікаў. Вось некалькі каментароў з-пад яго відэа:
«Ой ну не магу:) Ад смеху плачу. Чакаю вашых відэа з вялікім задавальненнем:) Гэта свята для настрою. Дзякуй вам»
«Брава АРТЫСТУ! Настолькі перадае перажыванні (роля) Пячонкіна, іншы раз думаеш, як яму дапамагчы парадамі, віват!»
«класны мужык, у Маскве з ім фоткаўся»
«я думаў, ён у Польшчы з усімі»
«Як жа я вас абажаю:) Сустракаліся мімалётам у Александрыі, Вы такі галантны, прыемны мужчына:) Што ў жыцці, што на экране:)»
Знайсці негатыўныя водгукі на старонцы Яўгена складана – іх у дзясяткі, калі не ў сотні разоў менш, чым кампліментаў у бок акцёра. Мусіць, гэта абумоўлена ў тым ліку і павагай да дабрадушнага беларуса, а магчыма, да яго тыкток-старонкі проста дабіраюцца толькі найбольш адданыя фанаты. Аднак некалькі каментароў незадаволеныя (ці не цалкам задаволеныя) гледачы ўсё ж такі пакінулі:
«Дзядзя Жэня, трошкі зацягнута, а так — клас)»
«Вы пайшлі далей за Петрасяна. У яго гідоце і ўяб….ці. Мне за Вас сорамна».
«Гэтую муд….ку нехта слухае?»
«вось толькі не зразумею, вы за чырвоных ці за белых? у нас у дзяцінстве ўсё зразумела было. А вы каго?»
«Наша Нiва» — бастыён беларушчыны
ПАДТРЫМАЦЬБеларускія 1990-я: згадваем герояў эпохі
Яўген Крыжаноўскі, які браў шлюб пяць разоў: Ніводная жонка не знайшла мне замену!
Пародыя для дарослых: беларусам паказалі, чым займаюцца блогеры ВІДЭА
Цяпер чытаюць
Замест парэшткаў Вітаўта за сцяной Віленскай катэдры знайшлі толькі кучу камянёў. Але ўлады Літвы гатовыя выдаткаваць на працяг пошукаў яшчэ 1,5 мільёна еўра3030
Каментары