Сухая скура ўвесь час патрабуе асаблівага догляду. Ад прыроды яна больш схільная да раздражненняў, і часта яе ўладальнікі маюць адчуванне сцягнутасці скуры, асабліва пасля мыцця. Таксама сухая скура вельмі тонкая, а таму больш схільная да з'яўлення маршчын. Але дзякуючы добраму харчаванню і правільнай касметыцы і сухая скура будзе пругкай і эластычнай.
Сухая скура ад прыроды тонкая і адчувальная да памылак у доглядзе і да ўздзеяння вонкавых фактараў, але ёсць некалькі вітамінаў, якія робяць сухую скуру эластычнай і пругкай, расказвае Onet.pl. Варта сачыць за тым, каб яны былі ў прадуктах харчавання і касметыцы.
Вітамін А
Ён мае выдатную здольнасць супакойваць пачуццё сцягнутасці і запаленні скуры. Абараняе ад празмернага арагавення эпідэрмісу, разгладжвае і павялічвае яго эластычнасць. Разам з вітамінам Е яны добра працуюць разам і дапамагаюць прадухіліць заўчаснае з’яўленне маршчын. Вітамін А можна знайсці ў такіх прадуктах, як печань, яйкі, сметанковае масла, ялавічына, птушка, рыба, абястлушчаны тварог, натуральны ёгурт ці кефір.
Вітамін В5
Вітамін B5 — гэта будаўнічы матэрыял для скуры. Яго недахоп праяўляецца ў выглядзе паталагічнага арагавення ці празмернага лушчэння эпідэрмісу, павелічэнні сухасці. Вітамін В5 глыбока ўвільгатняе скуру, спрыяе яе рэгенерацыі, супакойвае запаленні. Крыніцы гэтага вітаміну ў рацыёне — аўсянка, жытні хлеб, грэчка, бабовыя, арэхі, тлустая рыба.
Вітамін C
Вітамін С ёсць адным з наймацнейшых антыаксідантаў. Яго належны ўзровень падтрымлівае прадукаванне калагену, які адказвае за эластычнасць і пругкасць скуры. Пры сумесным ужыванні з вітамінам Е яго дзеянне ўзмацняецца. Крыніцы гэтага вітаміну найперш журавіны, чорныя парэчкі, пятрушка, квашаная капуста, чырвоны перац. Калі вы выкарыстоўваеце касметычныя сродкі з вітамінам С, сачыце, каб яго канцэнтрацыя была нізкай, каб пазбегнуць непрыемнага сцягвання скуры.
Вітамін Е
Нездарма яго называюць вітамінам маладосці. Гэта антыаксідант, які эфектыўна нейтралізуе свабодныя радыкалы, адказныя за працэс старэння. Таксама ён увільгатняе і мае супрацьзапаленчае дзеянне, таму асабліва рэкамендуецца для сухой, раздражнёнай, атапічнай і алергічнай скуры. Вітамін Е супакойвае раздражненні і паскарае рэгенерацыю. Ён падтрымлівае працу ахоўнага бар'ера скуры, дзякуючы чаму ў яе тканках затрымліваецца больш вады. Вітамін можа трапляць у скуру звонку ў выглядзе касметычных сродкаў, кропель ці капсул. У рацыёне мы можам знайсці яго ў такіх прадуктах, як грэцкія арэхі і арахіс, гарбузікі, міндаль, цэльназбожжавы хлеб, зялёная гародніна.
Тлустыя кіслоты амега-3 і амега-6
Хоць гэта і не вітаміны, але пра здаровую скуру складана гаварыць без уліку іх уплыву на яе стан. Яны надзвычай важныя для стварэння натуральнага ахоўнага бар'ера, які абараняе скуру ад вонкавых фактараў, напрыклад, ад марозу ці УФ-выпраменьванняў. Калі ў вашым рацыёне бракуе тлустых кіслот амега-3 і амега-6, скура не зможа ўтрымліваць вільгаць, што яшчэ больш узмоцніць сухасць. Забяспечыць свой арганізм кіслотамі амега-6 можна, калі ўключыць у рацыён алеі, тофу, грэцкія арэхі і міндаль. Тлустыя кіслоты амега-3 можна знайсці ў марской рыбе, ільняным і аліўкавым алеі.
Ужыванне дастатковай колькасці вадкасці таксама важна для сухой скуры. Гэта можа быць мінеральная вада, сокі добрай якасці ці травяныя чаі — яны дапамогуць увільгатніць скуру знутры. Дзякуючы правільнаму харчаванню і догляду, скура можа стаць зіхатлівай, пругкай і эластычнай.
Чытайце яшчэ:
Пяць прадуктаў, якія дапамагаюць скуры абмалоджвацца
Як правільна мыць твар, каб скура сказала вам дзякуй — расказваем
Каментары