Алкаголь шкодны. Але ў малых дозах ратуе ад дэменцыі

Навукоўцы з Паўднёвай Карэі высветлілі, што ўжыванне малых доз алкаголю на дзень зніжае рызыку развіцця дэменцыі. Адпаведнае даследаванне было апублікавана 6 лютага ў медыцынскім часопісе JAMA Network Open.

Паводле даследавання, штодзённае ўжыванне малых (не больш за адзін бакал ці куфель падчас ежы) доз алкаголю змяншае рызыку ўзнікнення дэменцыі ў чалавека, а вось п'янства, наадварот, павялічвае рызыку яе развіцця.

Для высвятлення гэтага факта навукоўцы выдаткавалі восем гадоў і вывучылі медыцынскія даныя амаль чатырох мільёнаў чалавек узростам ад 40 гадоў. Узровень спажывання алкаголю падзяляўся на лёгкі (менш за 15 г на дзень — г. зн. маленькі бакал віна ці маленькі куфель піва), умераны (15—29,9 г на дзень) і цяжкі (больш за 30 г на дзень). 

«Высветлілася, што людзі, якія п'юць адну порцыю алкаголю на дзень, мелі на 21% меншую імавернасць развіцця дэменцыі, чым людзі, якія ўвогуле не ўжываюць алкаголю. А тыя, хто п'е каля дзвюх порцый алкаголю ў дзень, маюць ужо толькі на 17% менш шанцаў з'яўлення хваробы», — паведамляюць навукоўцы.

Пры гэтым ужыванне трох і больш порцый ужо, наадварот, цягне за сабой павелічэнне імавернасці развіцця дэменцыі.

«Тры і больш порцый на дзень гарантуюць ужо больш высокія шансы — на 8% вышэйшыя, чым у людзей, якія не п'юць», — дадаюць даследчыкі.

Аднак яны адзначаюць, што вынікі даследавання не могуць быць універсальнымі і абсалютна дакладнымі па некалькіх прычынах.

1. Яно праводзілася толькі на карэйцах і ўлічвала толькі ўласцівы ім метабалізм і культуру спажывання алкаголю.

2. У даследаванні не ўлічваліся тыпы алкагольнага напою і магчымыя генетычныя асаблівасці паддоследных.

3. Заяўленая ў медыцынскіх звестках колькасць ужытага алкаголю магла адрознівацца ад рэальнасці.

«Але гэта не мяняе галоўнага — спажыванне алкаголю трэба кантраляваць, каб не дапускаць развіцця розных захворванняў ці чаго-небудзь іншага», — падагульняюць навукоўцы.

Дэменцыя — гэта захворванне, пры якім у чалавека з узростам адбываецца дэградацыя памяці, мыслення, паводзін і здольнасці выконваць штодзённыя дзеянні. Гэты стан суправаджаецца паступовым распадам асобы, што ў выніку прыводзіць да інваліднасці. 

Цяпер у свеце больш за 57 мільёнаў чалавек з дэменцыяй, і чакаецца, што да 2050 года гэтая колькасць узрасце да 152 мільёнаў.

Чытайце яшчэ:

Як марыхуана звязаная з хірургіяй — што даведаліся дактары

Як часта трэба мяняць піжаму? Часцей, чым вы думаеце 

Навукоўцы раскрылі медыцынскую таямніцу, якая 80 гадоў таму была прычынай дзіцячых смерцяў 

• 10
• 0
• 3
• 1
• 5
• 2
• 4
• 0