«Tolki pa adnym bakale ci kufli na dzień».
Navukoŭcy z Paŭdniovaj Karei vyśvietlili, što ŭžyvańnie małych doz ałkaholu na dzień źnižaje ryzyku raźvićcia demiencyi. Adpaviednaje daśledavańnie było apublikavana 6 lutaha ŭ miedycynskim časopisie JAMA Network Open.
Pavodle daśledavańnia, štodzionnaje ŭžyvańnie małych (nie bolš za adzin bakał ci kufiel padčas ježy) doz ałkaholu źmianšaje ryzyku ŭźniknieńnia demiencyi ŭ čałavieka, a voś pjanstva, naadvarot, pavialičvaje ryzyku jaje raźvićcia.
Dla vyśviatleńnia hetaha fakta navukoŭcy vydatkavali vosiem hadoŭ i vyvučyli miedycynskija danyja amal čatyroch miljonaŭ čałaviek uzrostam ad 40 hadoŭ. Uzrovień spažyvańnia ałkaholu padzialaŭsia na lohki (mienš za 15 h na dzień — h. zn. maleńki bakał vina ci maleńki kufiel piva), umierany (15—29,9 h na dzień) i ciažki (bolš za 30 h na dzień).
«Vyśvietliłasia, što ludzi, jakija pjuć adnu porcyju ałkaholu na dzień, mieli na 21% mienšuju imaviernaść raźvićcia demiencyi, čym ludzi, jakija ŭvohule nie ŭžyvajuć ałkaholu. A tyja, chto pje kala dźviuch porcyj ałkaholu ŭ dzień, majuć užo tolki na 17% mienš šancaŭ źjaŭleńnia chvaroby», — paviedamlajuć navukoŭcy.
Pry hetym užyvańnie troch i bolš porcyj užo, naadvarot, ciahnie za saboj pavieličeńnie imaviernaści raźvićcia demiencyi.
«Try i bolš porcyj na dzień harantujuć užo bolš vysokija šansy — na 8% vyšejšyja, čym u ludziej, jakija nie pjuć», — dadajuć daśledčyki.
Adnak jany adznačajuć, što vyniki daśledavańnia nie mohuć być univiersalnymi i absalutna dakładnymi pa niekalkich pryčynach.
-
Jano pravodziłasia tolki na karejcach i ŭličvała tolki ŭłaścivy im mietabalizm i kulturu spažyvańnia ałkaholu.
-
U daśledavańni nie ŭličvalisia typy ałkaholnaha napoju i mahčymyja hienietyčnyja asablivaści paddoślednych.
-
Zajaŭlenaja ŭ miedycynskich źviestkach kolkaść užytaha ałkaholu mahła adroźnivacca ad realnaści.
«Ale heta nie mianiaje hałoŭnaha — spažyvańnie ałkaholu treba kantralavać, kab nie dapuskać raźvićcia roznych zachvorvańniaŭ ci čaho-niebudź inšaha», — padahulniajuć navukoŭcy.
Demiencyja — heta zachvorvańnie, pry jakim u čałavieka z uzrostam adbyvajecca dehradacyja pamiaci, myśleńnia, pavodzin i zdolnaści vykonvać štodzionnyja dziejańni. Hety stan supravadžajecca pastupovym raspadam asoby, što ŭ vyniku pryvodzić da invalidnaści.
Ciapier u śviecie bolš za 57 miljonaŭ čałaviek z demiencyjaj, i čakajecca, što da 2050 hoda hetaja kolkaść uzraście da 152 miljonaŭ.
Kamientary
Ałkahol heta jad i narkotyk. Pjučy spačatku kulturna pa trošku "dla zdaroŭja" pastupova pieravažnaja bolšaść pačynaje pić bolš i bolš, pieratvarajučysia spačatku ŭ p' janic a paśla ŭ ałkaholikaŭ.