Фільм здымае аўтар «Акупацыі» Андрэй Кудзіненка.
Фільм здымае аўтар «Акупацыі» Андрэй Кудзіненка.
Праз зялёныя голкі прабіваецца сонца. Святар-уцякач туманнаю раніцай крочыць па лясной дарозе. Насустрач яму выходзяць італьянскія партызаны-гарыбальдзійцы (на фота). Святар падсаджваецца на вазок, змагары ўрачыста рухаюцца па дарозе.
Гэта фінальныя кадры фільма «Масакра», здымкі якога пачаліся 14 верасня. Італьянскім лесам сталася алея туй у Батанічным садзе, зухаватага святара сыграў актор Аляксандр Колбышаў. Канём кіраваў рэжысёр Андрэй Кудзіненка ў касцюме кучара, а партызанамі выступілі іншыя ўдзельнікі здымачнай групы: аператар Аляксей Убейвоўк, мантажнік Аляксандр Дэбалюк, мастакі Артур Клінаў і Антон Гвоздзікаў. Музыка Сяргей Пукст граў на мандаліне Вердзі.
Новая стужка «Масакра» паводле матываў «Локіса» Праспера Мэрымэ — гатычная трагікамедыя жахаў. Як кажа сам рэжысёр — бульба-хорар, калі і страшна, і смешна. Дзеянне фільма адбываецца ў Беларусі пасля паўстання Каліноўскага. Але вайна не завершаная. Акупанты сутыкнуцца з мядзве¬дзямі-пярэваратнямі.
Журналісты атакуюць рэжысёра: «А кроў калі будзе? А адмысловыя эфекты? А кіпцюры і зубы чалавека-мядзведзя?»
«Мядзведзь Сцяпан будзе», — не жадае раскрываць карты творца.
У новай карціне граюць Аляксандр Колбышаў, Святлана Зелянкоўская, Сяргей Журавель.
Запрошаны ў карціну і малы спявак Юры Дземідовіч. Як паведаміў Андрэй Кудзіненка, у карціне вакантная роля хлопчыка, якога па сцэнары таксама клічуць Юрам. Хлопчыку ідэя зняцца ў кіно спадабалася, адно пратэстуюць куратары з БТ — баяцца, каб спявак не прастыў перад «Еўрабачаннем».
На «Масакру» выдзелена 5 млрд рублёў. Здымкі мусяць завяршыцца 27 снежня, а здача карціны запланаваная на 2 ліпеня налета.
Цяпер чытаюць
18‑гадовы курсант Вайсковай акадэміі з Ляхавіч нікому нічога не сказаў, забраў дакументы і паехаў ваяваць за Расію. Цяпер па ім плачуць18
Каментары