Заснавальнік «Белага легіёна» пра ператрус у сваякоў: Забралі медаль «100 гадоў БНР» і дыплом ад Рады БНР
Падчас ператрусу ў сваякоў заснавальніка «Белага легіёна» Сяргея Чыслава (Бульбы) сілавікі забралі медаль «100 гадоў БНР» і дыплом ад Рады БНР. Да таго ж вынеслі некалькі кніг. Навошта сілавікам яго медаль, Бульба не ведае. Але прызнае, што гэта дарагая для яго рэч, паведамляе «Еўрарадыё».
Бульба не быў у Беларусі ўжо пяць гадоў. Гэта не перашкодзіла сілавікам прыйсці з ператрусам да яго сваякоў. 77-гадовую маці Сяргея забралі проста з лецішча пад Валожынам. Пра гэта Бульба даведаўся з паведамлення ў мэсэнджары ад сястры.
— Сястра напісала, што прыходзіў ГУБАЗіК, што быў допыт, што запісалі нейкае відэа. Я перш здзівіўся і нават вырашыў, што акаўнт сястры ўзламалі, што піша нехта іншы. Папрасіў паўтарыць усё тое самае голасам, каб я пераканаўся, што гэта яна. Сапраўды — яна, — расказвае Сяргей Бульба карэспандэнту «Еўрарадыё» на наступны дзень.
Яго сястру забралі з працы, маці — прывезлі дахаты з лецішча. Па адрасе прапіскі ўчынілі ператрус.
— Што маці, што сястра — абедзве былі ў цяжкім псіхалагічным стане. Сёння мама трошкі адышла ад гэтага, мы пагаварылі. Папрасіў зразумець, што я змушаны ўсё гэта агучваць, каб гэта не стала нормай. Мама кажа, яе прымусілі запісаць кароткае відэа, на якім яна называе сваё імя і просіць мяне не займацца тым, чым займаюся. Ніякага пакаяння там няма.
Бульба прызнаецца, што не чакаў візіту сілавікоў да яго блізкіх. У апошні раз ператрус, калі «усіх паставілі на вушы», у Бульбы праводзілі ў 2007 годзе. А пасля, кажа, «сваякоў ніхто і не чапаў».
— Я з 14-га года ва Украіне. Яны маглі прыйсці раней. Але дайшлі чамусьці толькі цяпер. Чаму? Якія такія мае актыўнасці іх натхнілі прыйсці менавіта цяпер? Магчыма, справа ў тым, што я цяпер актыўна выступаю на ўкраінскіх тэлеканалах, дзе імкнуся данесці, што [Аляксандр] Лукашэнка не суб'ект палітыкі. Магчыма, гэта іх так зачапіла?
Цяпер чытаюць
Ці магчымы другі Чарнобыль? І што цяпер робяць людзі на той АЭС? Навукоўка адказвае на важныя пытанні6
Каментары