У Мінску кідаюць будаваць трэцюю лінію метро ў Зялёны Луг. Усе сілы пойдуць на чацвёртую, кальцавую
Станцыі «Івана Мележа», «Зялёны Луг», «Лагойская» адкладаюць на далёкую перспектыву.
У сталічных уладаў зноў змяніліся планы наконт будаўніцтва метро. Цяпер вырашылі, што трэцюю лінію метро часова спыняць на плошчы «Бангалор» (станцыя «Парк дружбы народаў»).
«У горадабудаўнічай дакументацыі прадугледжваецца знос дамоў па вуліцы Максіма Багдановіча ў рамках пракладкі [трэцяй лініі] метрапалітэна. Але ў найбліжэйшы час гэтага, напэўна, не будзе. Лінію метро мы давядзём да плошчы Бангалор, а далей плануем рухацца ўздоўж вуліцы Арлоўскай і праспекта Пушкіна ў бок станцыі метро «Пушкінская», дзе будзе перасячэнне з другой лініяй метро. Планаў па працягненні метро ў напрамку Зялёнага Лугу ў бліжэйшай перспектыве ў нас няма», — заявіў старшыня камітэта архітэктуры і горадабудаўніцтва Мінгарвыканкама Віктар Гуцько.
Такім чынам, пасля дабудовы трох станцый трэцяй лініі — «Пярэспа», «Камароўская», «Парк дружбы народаў» — усе сілы кінуць на тое, каб пачаць чацвёртую лінію. У стартавую чаргу ўваходзяць станцыі «Максіма Багдановіча», «Старавіленскі шлях», «Вяснянка», «Альшэўская» і «Цівалі».
Каментары
Каменая Горка, Малінаўка, пасля трэцяя лінія для Мінск-Міра і Паўночнага Берага (метро прама не ідзе ў раён, але будзе напрамкам пад’езду бліжэй).
У Зялёным Лузе людзі ўжо жывуць, а на знос Сяльгаспасёлка, відаць, яшчэ не рашыліся. Таму навошта там метро.
Значыць, шукаць новыя ідэі мудрацоў горадабудаўніцтва недзе на кальцавой лініі.