Берасцейка паляцела ў Кітай, каб яе трохгадовая дачка папрацавала мадэллю
Гледачы могуць мацаць адзенне на дзіцяці, каб зразумець якасць. Калі ўсё падабаецца, замаўляюць.
Віталіна з Брэста танцавала ў розных калектывах. Аддаваць у мадэльную школу сваю трохгадовую дачку Аглаю (ласкава маці заве яе Глашай) яна не думала, але аднойчы ёй напісала іншая беларуска, якая раней вадзіла дачок займацца танцамі да Віталіны. Тая пераехала ў Кітай і цяпер дапамагае кітайскім агенцтвам шукаць дзяцей у Еўропе.
Ідэя падалася маці цікавай, і яна вырашыла паспрабаваць — падпісала для трохгадовай Глашы кантракт на тры месяцы і разам з дачкой прыляцела ў Ханчжоу.
Агенцтва аплачвае візы, пералёт, кватэру (Віталіну з Глашай падсялілі ў трохпакаёўку да яшчэ адной маці з чатырохгадовым дзіцём), таксі да месца здымкаў і назад, пералёты па Кітаі. Маці ж неабходна было самастойна аплачваць камуналку і харчаванне.
Здзівіла Віталіну тое, як праходзяць дзіцячыя паказы моды ў Кітаі — усё зусім не так, як у Еўропе. Шмат дарожак-подыумаў, па якіх дзяцей водзяць спецыяльныя памочнікі ці бацькі — з рознай хуткасцю, хто як можа. Дзецям дазваляюць быць з цацкамі ці нават з тэлефонам, есці прысмакі — галоўнае, каб не плакалі.
Гледачы ў залі сядзяць з планшэтамі. Яны могуць мацаць адзенне на дзіцяці, каб зразумець якасць. Калі ўсё падабаецца, адразу і замаўляюць анлайн.
Віталіна расказвае, што публіка робіць сабе перакусы: есць, п'е, а смецце кідае на падлогу — і гэта лічыцца нормай.
Здараліся і непрыемныя сітуацыі: падчас аднаго з паказаў Глаша стамілася, бо ўстала а сёмай раніцы, шмат гадзін працавала — зноў і зноў пераадзявалася і хадзіла па подыуме. Дзяўчынка проста села на падлогу, каб адпачыць пяць хвілін — і адна з жанчын пачала фатаграфаваць стомленае дзіця. Робіцца гэта дзеля таго, каб паказаць агенту, быццам дзяўчынка адмаўляецца працаваць.
Дарэчы, дзённы сон запланаваны толькі для дзяцей, якія ростам меншыя за 100 сантыметраў. Тое, што Глашы ён таксама патрэбны, арганізатараў здымкаў здзівіла.
Не вельмі прыемна было маці атрымліваць паведамленні, што Глашы неабходна схуднець, бо яна пачала выглядаць больш пульхнай, чым калі прыехала ў Кітай. Віталіне раілі даваць дачцэ менш цукру і сокаў, а часцей прапаноўваць гародніну.
Самыя доўгія здымкі цягнуліся 8,5 гадзін — адлік працоўнага часу пачынаецца з таго моманту, як мадэль сядае рабіць макіяж.
У вольны час маці з дачкой актыўна знаёміліся з Кітаем — ездзілі, напрыклад, карміць жырафаў ды гладзіць сланоў.
За месяц яны патрацілі тысячу даляраў. Ганарар Аглаі Віталіна не агучвае, але прызнаецца, што зарабілі яны ўсё ж больш, чым патрацілі. Маці піша, што ехалі па досвед, а не для таго, каб зарабіць.
Цяпер чытаюць
Галоўным спікерам Жаночага форуму ў Мінску стане расійскі крынджовы псіхолаг, які расказваў пра «памяць жаночых палавых губ»14
Каментары