Ва Украіне пачало працу прадстаўніцтва Офіса Ціханоўскай. Чым яно будзе займацца
Былы дыпламат Валерый Кавалеўскі паведаміў «Свабодзе», што ва Украіне створанае афіцыйнае прадстаўніцтва Святланы Ціханоўскай і яно будзе працаваць на сталых умовах.
Цяпер ёсць адміністрацыйныя задачы — мы арганізуем офіс прадстаўніцтва, шукаем памяшканне, і апроч гэтага пачынаем працу над тым, каб лепш зразумець, што адбываецца ў беларускай супольнасці, у беларускай дыяспары, якія праблемы, і што мы можам зрабіць цяпер для вырашэння тых праблем, якія стаяць перад беларусамі», — паведаміў «Свабодзе» Валерый Кавалеўскі.
Найперш, паводле яго словаў, вядзецца пра заблакаваныя банкаўскія рахункі беларусаў, пра міграцыйныя пытанні, пра змену адукацыйных праграм у школах Украіны і выключэнне з іх твораў беларускіх пісьменьнікаў, а таксама аб змяненні беларускіх назваў.
«Мусім зразумець, які ў нас фронт працы і пачынаць займацца гэтым праз сустрэчы з прадстаўнікамі афіцыйных ведамстваў, з грамадзянскай супольнасцю, з экспертамі, медыя. Ужо першыя крокі былі зробленыя. Пакуль мы гаворым аб працоўным узроўні, аб усталяванні дачыненняў, аб тым, што мы выходзім на інстытуты, на агенцтвы, на пэўныя ўстановы і завязваем з імі кантакты, каб пачынаць распрацоўваць рашэнні існуючых праблем», — удакладніў ён.
Разам з тым, сказаў Валерый Кавалеўскі, на парадку дня прадстаўніцтва Святланы Ціханоўскай будуць і больш складаныя пытанні міжнароднага характару.
«Мы гаворым пра інфармацыйны абмен і абмен пазіцыямі ў разуменні таго, што прасоўвае кожны з бакоў — беларускі і ўкраінскі — на міжнароднай арэне, нейкае спалучэнне нашых намаганняў там, дзе гэта магчыма, каардынацыя, магчыма, нават супольныя дзеянні па парадку дня сённяшняга».
Найперш, паводле Кавалеўскага, гаворка ідзе аб супрацоўніцтве ў пытанні санкцый.
«Вось, напрыклад, гэтая ідэя, агучаная генеральным сакратаром ААН, зняць санкцыі з Беларусі і з Лукашэнкі-Пуціна, я б так сказаў, — гэта тая тэма, па якой мы можам разам папрацаваць. Бо ні Беларусі, ні Украіне не цікава бачыць, як два дыктатары — Пуцін і Лукашэнка — атрымліваюць перадышку і дадатковыя рэсурсы. Першы для таго, каб узмацняць агрэсію супраць Украіны, а другі, каб узмацняць рэпрэсіі супраць беларусаў. Таму мы, вядома, будзем гэтаму супрацьстаяць, і правільна было б гэта рабіць разам з Украінай, якая таксама зацікаўленая ў зняцці блакады з чарнаморскіх партоў, каб больш эфектыўна пастаўляць збожжа на сусветныя рынкі», — патлумачыў Валерый Кавалеўскі.
Кіраўнік Кабінета прадстаўнікоў Святланы Ціханоўскай падкрэсліў, што яе прадстаўніцтва працуе толькі трэці дзень, але «будзе спрабаваць рухацца як мага хутчэй».
«Для нас важна зразумець, якія праблемы ў беларусаў тут, ва Украіне,і што мы павінны зрабіць, каб вырашыць гэтыя праблемы. Бо дакладна, калі б лукашэнкаўская амбасада тут была, ці калі яна вернецца сюды, то яна гэтымі праблемамі займацца не будзе. Ёй важна прасоўваць прапаганду пра рэжым і светлую будучыню пры Лукашэнку, што ён міратворац і гэтак далей. Таму гэта вельмі важныя пытанні. Інтарэсы беларусаў ва Украіне — адно з нашых прыярытэтных пытанняў. Лукашэнкаўская амбасада выехала, таму наша праца на сённяшні дзень — гэта адзіная афіцыйная беларуская прысутнасць», — патлумачыў Валерый Кавалеўскі.
24 мая дэлегацыя Офіса Ціханоўскай на чале з Валерыем Кавалеўскім перадала беларускім добраахвотнікам з палка Каліноўскага і палка «Пагоня» аўтатранспарт, а таксама медыкаменты, турнікеты і прадукты. Гэтую дапамогу сабралі беларусы і мэрыя Вільні, пра што дамовілася Святлана Ціханоўская з мэрам Вільні Рэмігіюсам Шымашусам у красавіку 2022 года.
Цяпер чытаюць
Беларусы дзеляцца, як рэгіструюць сваіх катоў. Вось як адбываецца працэдура2
Каментары