Яшчэ некалькі тыдняў таму ЗША ўвялі санкцыі супраць буйных расійскіх кампаній і блізкіх да Крамля палітыкаў і бізнэсменаў. Але ж застаецца яшчэ адзін блізкі да Пуціна чалавек, які пакуль не пад амерыканскімі санкцыямі.
Гаворка пра Аліну Кабаеву, колішнюю алімпійскую чэмпіёнку па мастацкай гімнастыцы. Амерыканскі ўрад лічыць яе каханкай Пуціна і маці як мінімум траіх яго дзяцей. Кабаеву падазраюць у тым, што яна спрыяе ўтойванню асабістага багацця Пуціна за мяжой.
Былая гімнастка ўсё яшчэ мае шансы трапіць пад санкцыі, але пакуль амерыканскія чыноўнікі асцерагаюцца ўключаць яе ў спісы. Яны хвалююцца, што ўвядзенне санкцый супраць Кабаевай будзе настолькі моцным асабістым ударам для Пуціна, што гэта яшчэ больш абвострыць і так напружаныя адносіны паміж Расіяй і ЗША, піша Wall Street Journal.
Згодна са звесткамі амерыканскіх журналістаў, звычайна ў ЗША пакеты санкцый разам выпрацоўваюць амерыканскае міністэрства фінансаў і Дзярждэпартамент, пасля чаго гэтыя абмежаванні яшчэ часта павінна ўхваліць і Рада нацыянальнай бяспекі. Мінфін падрыхтаваў санкцыі супраць Кабаевай, але ў апошні момант Рада нацбяспекі выкрасліла імя былой гімнасткі з санкцыйнага спісу.
Крыніцы ў амерыканскім урадзе сцвярджаюць, што ёсць шэраг людзей, якія пакуль не пад санкцыямі, але меры супраць іх ужо падрыхтаваныя. Такім чынам, амерыканскія чыноўнікі цяпер чакаюць моманту, калі ўвядзенне санкцый супраць гэтых людзей мела б максімальны эфект, і ад санкцый супраць Аліны Кабаевай ніхто не адмаўляецца.
Заходнія чыноўнікі не маюць дакладнай інфармацыі пра тое, якое месца Кабаева займае ў Крамлі.
Але шмат хто з іх лічыць, што былая чэмпіёнка можа быць дужа ўплывовай асобай праз свае блізкія адносіны з Пуціным, якія ні Кабаева, ні Пуцін ніколі не прызнавалі.
Украінскі ўрад ужо выступаў з заклікамі ўвесці санкцыі супраць Кабаевай. Напрыклад, украінскі парламент накіраваў ліст уладам Швейцарыі, дзе, меркавана, знаходзіцца Кабаева, з заклікам дэпартаваць яе з краіны і арыштаваць яе нерухомасць. Швейцарскі ўрад у адказе паведаміў, што не мае доказаў таго, што Кабаева знаходзіцца на тэрыторыі іх краіны.
Аліна Кабаева сышла з гімнастыкі прыкладна ў 2008 годзе. У перыяд з 2007 па 2014 год яна з'яўлялася дэпутаткай Дзярждумы ад праўладнай «Адзінай Расіі», дзе атрымоўвала заробак прыкладна ў 140 тысяч даляраў.
Пазней былая гімнастка змяніла крэсла дэпутаткі на пасаду кіраўніцы холдынга «Нацыянальная Медыя Група», але 6 красавіка, перад абвяшчэннем чарговага пакета санкцый, даныя пра Кабаеву зніклі з сайта холдынга.
У перыяд з 2013 года Аліна Кабаева і яе сваякі набылі 6 кватэр, 2 дамы і вялікія надзелы зямлі ў элітных расійскіх рэгіёнах. Сярод іх былі раскошныя кватэры ў Маскве і Сочы, а таксама аб'ект нерухомасці ў Санкт-Пецярбургу плошчай больш чым у 210 квадратных метраў.
Чытайце таксама:
«Любімая жонка шалёнага дыктатара». Кабаеву просяць дэпартаваць са Швейцарыі. Але ці там яна, невядома
Цяпер чытаюць
Стаў героем Магілёўскага ўнівера, збіраў фальклор, працаваў на беларусізацыю садкоў — расказваем пра Яўгена Бойку, асуджанага за салідарнасць з палітвязнямі
Каментары