У Чэхіі затрымалі кіраўніка Беларускай федэрацыі футбола Уладзіміра Базанава. Што вядома на дадзены момант?
Мараўска-Сілезская паліцыя затрымала старшыню Беларускага футбольнага саюза 64-гадовага Уладзіміра Базанава, піша газета Denik N. Падазраецца, што Базанаў прыехаў у Чэхію на матч між беларускімі і чэскімі футбалістамі без дазволу на ўезд. Як паведамляецца ў газеце, чыноўніка разам з жонкай затрымала паліцыя Мараўска-Сілезскага краю.
Паліцыя па справах замежнікаў падазрае, што яны парушылі загад Міністэрства аховы здароўя Чэскай Рэспублікі і што яны не маюць права знаходзіцца на тэрыторыі краіны.
«Мы можам пацвердзіць, што двое замежнікаў, якіх падазраюць ва ўездзе і перабыванні ў Чэскай Рэспубліцы з парушэннем мер абароны Міністэрства аховы здароўя, былі затрыманыя падчас планавай праверкі па месцы пражывання. Мы вывучаем законнасць іх перабывання на нашай тэрыторыі ў адпаведнасці з Законам пра пражыванне замежнікаў», — сказала Паўла Йіраушкова, прэс-сакратар Мараўска-Сілезскай паліцыі.
Пра паездку Базанава ў Чэхію стала вядома яшчэ ўчора. Міністр замежных спраў Якуб Кулханек заявіў, што калі беларускі чыноўнік апынецца на тэрыторыі Чэхіі, яго дэпартуюць.
Сёння ж высветлілася, што пасля прыезду ў Чэхію Базанаў спыніўся ў Остраве, а ўчора наведаў стадыён у Опаве. Сёння там павінен быў адбыцца адборачны матч жаночага чэмпіянату свету.
Але футбольны матч, на які ехаў Уладзімір Базанаў, перанеслі. Прычына — станоўчыя тэсты на кавід у некалькіх гульцоў беларускай зборнай. Астатнія члены каманды цяпер павінны здаць паўторны тэст.
Што кажа амбасада Беларусі?
Хаця за апошні час паліцыя затрымлівала высокапастаўленых чэскіх футбольных чыноўнікаў, пераслед замежнага футбольнага чыноўніка — незвычайная справа для Чэхіі.
Амбасада Беларусі пакуль не адказала, ці вядома ёй было пра прысутнасць Базанава ў Чэхіі і ці супрацоўнікі ведалі пра яго затрыманне сёння. Газета таксама пакуль высвятляе рэакцыю Футбольнай асацыяцыі Чэскай Рэспублікі на гэтыя падзеі.
Чаму Базанаў патрапіў у санкцыйны спіс?
Чэшская газета нагадвае, што Базанаў патрапіў у санкцыйны спіс прыбалтыйскіх рэспублік.
«Сваімі дзеяннямі людзі з гэтага спісу саўдзельнічалі ў арганізацыі і падтрымцы фальсіфікацый прэзідэнцкіх выбараў 9 жніўня і падтрымлівалі наступнае гвалтоўнае падаўленне мірных пратэстаў і дэманстрацый», — гаворыцца ў дакуменце Міністэрства замежных спраў Латвіі. У мінулым годзе Балтыйкая інфармацыйная агенцыя гэтак жа пісала пра старшыню праўлення беларускага футбола.
Базанаў з’яўляецца кіраўніком Беларускай федэрацыі футбола з 2019 года. На пачатку 2010-х ён узначальваў «Дынама-Брэст». У 2020-м Базанаў удзельнічаў у велапрабегу ў падтрымку Лукашэнкі разам са старшынёй Алімпійскага камітэту, міністрам спорту.
Цяпер чытаюць
Сям’ю з Мінска будуць судзіць за здраду дзяржаве і кантрабанду зброі. Іх, падобна, затрымалі на мяжы — вось што вядома7
Каментары