Азаронак пра Зельцэра: «Яны самі выклікалі міліцыю на сябе». Генпракуратура: «Вобшук быў санкцыянаваны»
Яшчэ ў аўторак увечары была неафіцыйная інфармацыя пра тое, што 28 верасня на лінію «102» паступаў званок аб невядомых, якія ламаюць дзверы ў кватэры па вуліцы Якубоўскага, 29. Учора вядучы СТБ Рыгор Азаронак у вечаровым выпуску навінаў заявіў, што з кватэры было два званкі ад мужчыны і жанчыны. Маўляў, яны самі на сябе выклікалі міліцыю. Між тым, генеральны пракурор Андрэй Швед адзначыў: вобшук у кватэры Зельцэра быў санкцыянаваны. То-бок яго адрас «адпрацоўвалі».
Вось пра што казаў у вечаровым эфіры Азаронак:
«Многія проста не могуць зразумець паводзіны гэтай парачкі. Здымкі ў кватэры перад стральбой. Як гэта? Навошта? У нас ёсць эксклюзіўная і праўдзівая інфармацыя, якая пралівае святло на гэтае пытанне. Пачнём спачатку. Учора днём сумесная група МУС і КДБ, што называецца, «адпрацоўвала» гэты раён па справе аб тэрарызме.
Сачыце за ланцужком. Група сілавікоў адпрацоўвае ў гэтым раёне. І тут на лінію «102» паступае тэлефонны званок. Гэта быў званок з той самай кватэры. Спачатку ад мужчыны, а пасля другі — ад жанчыны. Яны самі выклікалі міліцыю на сябе. Яны рыхтаваліся. Ён зарадзіў стрэльбу. «Ведзьма» зарадзіла тэлефон. Яны чакалі, яны ведалі, што да іх зараз прыйдуць. Яны ўстанавілі яшчэ адну камеру з іншага боку».
А гэта словы Генеральнага пракурора Андрэя Шведа:
«Учора падчас правядзення працэсуальных дзеянняў, што былі санкцыянаваныя ў панядзелак адным з маіх намеснікаў, гаворка ішла пра тое, што былі дадзеныя санкцыі на правядзенне дзясятка шэрагу працэсуальных дзеянняў, звязаных з праверкай асоб, якія могуць быць датычнымі да тэрарызму і экстрэмізму.
Учора падчас правядзення вобшуку ў адным з жылых памяшканняў асоба, што загадзя падрыхтавалася, якая падазраецца ў датычнасці да тэрарызму, наўмысна і мэтанакіравана стрэліла ў супрацоўнікаў праваахоўных органаў».
Выглядае, што заявы супярэчаць адна другой. Незразумела, ці выклікалі Зельцэр і яго жонка на сябе міліцыю альбо не, ці ішлі супрацоўнікі ў кватэру мэтанакіравана альбо патрапілі туды выпадкова па выкліку.
Чытайце таксама:
Прадавачка, збірала подпісы за Ціханоўскую, пагражае 25 гадоў. Што сёння вядома пра жонку Андрэя Зельцэра, які застрэліў сілавіка
Цяпер чытаюць
«Людзі ідуць у мячэці, а не лечаць псіхічныя хваробы». Беларускі псіхіятр расказаў аб працы ва Узбекістане і ў Польшчы2
Каментары