Ганна Канапацкая і рэгіянальныя каардынатары павезлі здаваць першыя 35 тысяч подпісаў за яе вылучэнне. Пра гэта прэтэндэнтка на прэзідэнцкую пасаду напісала ў сваім фэйсбуку.
Па словах экс-дэпутаткі, яе каманда сабрала больш за 110 тысяч подпісаў. Для рэгістрацыі кандыдатам у прэзідэнты патрабуецца мінімум 100 тысяч подпісаў.
«Пакуль бачым, што будзе трохі болей за 110 000, але гэтага і дастаткова для праходжання ў наступны этап. Мне хапае. Я — не брутальны алень, які патрэсвае россыпам з сотняў тысяч подпісаў на галінастых рогах, спрабуючы запалохаць імі яшчэ больш мацёрага. Хаця жыццё падкідвае нечаканыя прыемныя сюрпрызы», — напісала Канапацкая. Сотні тысяч подпісаў абяцае падаць Віктар Бабарыка.
Яна заявіла, што лічыць сваімі паплечнікамі тыя палітычныя сілы, «для якіх беларуская дзяржаўнасць жывая заўсёды і не бярэцца пад сумненне, нацыянальная самасвядомасць — вышэй за ўсё, а еўрапейская самаідэнтыфікацыя — базавы жыццёвы прынцып».
Пасля Канапацкая зноў прайшлася па Бабарыку:
«А таксама дамо адпор паўзучай гібрыднай агрэсіі рэакцыйных сілаў суседняй дзяржавы, якія пад лічынай «мілага пана» спрабуюць навязаць нам газпрамаўскага стаўленніка і дзеля гэтага хітрасцю, падманам, грашыма ды сучаснымі інфармацыйнымі тэхналогіямі зацягнулі ў свае брудныя палітычныя інтрыгі некаторую частку крэатыўнай і дробнабуржуазнай праслойкі актыўнага насельніцтва нашай краіны. Пагроза страціць нашу дзяржаўнасць і ператварыцца ў дэградуючы ўскрайкавы рэгіён састарэлай імперыі — нашмат горшы варыянт, які нас мог бы чакаць. Але гэтага не будзе!»
Цяпер чытаюць
Ці закрыюць Еўропу для беларусаў? Дарадца Ціханоўскай распавёў, пра што дамовіўся ў Берліне13
Каментары