Украіна дапусціць малдаўскіх сілавікоў да кантролю ўкраінска-прыднястроўскай мяжы
На пачатку лістапада Кіеў і Кішынёў падпісалі пагадненне аб увядзенні з студзені 2016 года супольнага кантролю над украінска-прыднястроўскай мяжой. Першым пунктам пропуску, у якім плануецца размясціць малдаўскіх сілавікоў, стане КПП «Кучурган». «Гэты ўчастак мяжы павінен стаць надзейнай заслонай ад кантрабанды і незаконнага перамяшчэння тавараў і камфортным для жыхароў памежнай зоны, іх сацыяльных, сямейных і сяброўскіх кантактаў», — заявіла начальніца Адэскай мытні Юлія Марушэўская.
«На практыцы рэалізацыя ініцыятывы Малдовы і Украіны будзе азначаць, што тавары для прыднястроўскіх прадпрыемстваў падвергнуты патройнаму мытнаму кантролю, да іх у поўнай меры будуць прымяняцца патрабаванні малдаўскага заканадаўства», — заявіў выканаўца абавязкаў міністра замежных справаў непрызнанай рэспублікі Віталь Ігнацьеў.
Пасля прыняцця новых захадаў кантроль Кішынёва над Прыднястроўем узмацніцца.
Варта адзначыць, што эканамічны стан Прыднястроўя плачэўны. Наяўнасць расійскіх субсідый у выглядзе таннага газу і нафты кансервуе неэфектыўныя прадпрыемствы. Акрамя таго, Масква забараняе Тыраспаля стварыць рэжым найбольшага спрыяння ў гандлі з Еўрасаюзам, што пазбаўляе тэрыторыю натуральнага рынку збыту. У выніку, паводле звестак статкамітэта Прыднястроўя, за першыя дзесяць месяцаў 2015 года аб'ём экспарту з Прыднястроўя скараціўся амаль на 18% да 460 млн даляраў, прытым што імпарт складае 893 млн даляраў.
Не выключана, што ў адзін з наступных гадоў улады рэгіёна могуць паспрабаваць нармалізаваць адносіны з Кішынёвам і далучыцца да ўмоваў Асацыяцыі з ЕС, якую падпісала Малдова.
Каментары