Dni samoty

Maskva ŭsio dalejšaja, a niepakoj narastaje. Moža, niedaremna ŭ apošni čas i papaŭźli čutki pra chutkuju adstaŭku Malcava?

Piša Raman Jakaŭleŭski.

Sustrečy Łukašenki z Pucinym u Sočy i ŭ časie maskoŭskaha pasiedžańnia Vyšejšaj dziaržrady aficyjnaja prapahanda nazvała «novym impulsam budaŭnictva dahetul nieviadomaj śvietu sajuznaj dziaržavy». Adnak mała chto źviarnuŭ tady ŭvahu na słovy Łukašenki ab tym, što, razmaŭlajučy z rasiejskim kaleham pad čarnamorskimi palmami, jon pierakanaŭ rasiejskaha prezydenta ŭ nieabchodnaści samomu prysutničać 9 traŭnia na mienskim paradzie Pieramohi. Zrešty, i biaz hetaha było jasna, što biaz našaha hałoŭnakamandujučaha biełaruskija Ŭzbrojenyja siły maršyravać na paradzie nia buduć. Padrychtoŭka da maštabnaj demanstracyi vajskovaj mahutnaści Biełarusi išła ŭdzień i ŭnačy.

Kudy mienš vidavočnymi padalisia vysiłki, źviazanyja z samitam krain SND 8 traŭnia. U adnym z svaich vystupaŭ Łukašenka vykazaŭ zdahadku, što samit stanie prosta abmienam śviatočnymi «lubieznaściami» dy znajomstvam z novymi čalcami «klubu kiraŭnikoŭ krain Sadružnaści». Ale pavodle śviedčańniaŭ biełarusaŭ Maskvy, atmasfera na samicie była daloka nie pieradśviatočnaj.

Kiraŭniki SND tam amal što łajalisia: prezydenty Ŭzbekistana i Biełarusi «najaždžali» na Pucina, patrabujučy ad jaho bolš rašučaha staŭleńnia da roznaha kštałtu «kalarovych revalucyjaŭ», Uładzimier Varonin vinavaciŭ u niedemakratyčnaści biełaruski režym. Kažuć, što sustreča kiraŭnikoŭ SND skončyłasia poŭnym razdrajem, choć udzielniki mierapryjemstva pastanavili nastupnym razam sabracca 22—23 červienia, u 64-ja ŭhodki pačatku Vialikaj vajny. Ale nia vyklučana, što hety samit budzie apošnim u takim składzie.

Łukašenka źjechaŭ u Miensk 8 traŭnia, pačuvajučysia samotnym. Ale pa adjeździe znoŭ pačała cyrkulavać infarmacyja, što prezydent Biełarusi musić usio ž 9 traŭnia źjavicca ŭ Maskvie. Ale nie na paradzie na Krasnaj płoščy, a na kramloŭskim śviatočnym pryjomie. Tak, 22 krasavika staršynia pastajannaj kamisii Savietu Respubliki pa mižnarodnych spravach i nacyjanalnaj biaśpiecy Mikałaj Čarhiniec paviedamiŭ pra mahčymaść sustrečy prezydentaŭ Biełarusi i ZŠA 9 traŭnia ŭ Maskvie, a 29 krasavika ŭžo pasoł Biełarusi ŭ Rasiei Ŭładzimier Hryhorjeŭ zajaviŭ na pres-kanferencyi, što Łukašenka «abaviazkova vierniecca ŭ Maskvu paśla taho, jak prymie parad Pieramohi ŭ Miensku». Nie pryjechaŭ. Choć sioj-toj čakaŭ da samaha pačatku paradu na ŭžo novym praspekcie Pieramožcaŭ. Tady mnohija naziralniki źviarnuli ŭvahu na toje, što hałoŭnakamandujučy źjaviŭsia na vajskovym paradzie ŭ cyvilnaj vopratcy. I ŭ prykmietna «ŭźviedzienym» nastroi. Ministra abarony, jaki sprabavaŭ davać niejkija zvyčajnyja tłumačeńni, hałoŭnakamandujučy va ŭpor nia bačyŭ. Moža, niedaremna ŭ apošni čas i papaŭźli čutki pra chutkuju adstaŭku Malcava? Pa prykładzie samotnaha svajho kiraŭnika, kiraŭnictva krainy taksama vyhladała na trybunie daloka nie śviatočna.

Maskoŭskija biełarusy ćvierdziać: čutki pra toje, što biełaruski prezydent vierniecca ŭ Maskvu, raspaŭsiudžvalisia Administracyjaj prezydenta Biełarusi, da apošniaha momantu pierakananaj, što ŭzajemaparazumieńnie z kramloŭskim pratakołam u hetym pytańni budzie znojdziena. Ale arhanizatary maskoŭskich uračystaściaŭ nie pažadali pajści nasustrač pažadańniam biełaruskaha prezydenta.

Aŭtarytetnyja eksperty, jakich Kreml paśla 9 traŭnia staŭ iznoŭ vypuskać na šyrokuju aŭdytoryju dla dyskusij na «biełaruskuju temu», adznačajuć nastupnaje. Pavodle adnaho ź ich, Alaksieja Arbatava, «važny sam fakt taho, što Łukašenka — adziny z kiraŭnikoŭ krain, jakija ŭnieśli značny ŭkład u pieramohu nad fašyzmam, i kiraŭnik adnoj z krain, jakaja straciła najbolšuju kolkaść hramadzian u hetaj žachlivaj krainie — nie prysutničaŭ na paradzie Pieramohi i nie prysutničaŭ na ŭračystym pryjomie z nahody Vialikaj Pieramohi. Jość vialikaja roźnica pamiž uzajemaadnosinami narodaŭ — rasiejskaha i biełaruskaha — i ŭzajemaadnosinami dyktatara Łukašenki z rasiejskim narodam». Treba mierkavać, dadało kłopatu i vasiamnaccataje imhnieńnie viasny kiraŭnika FSB Mikałaja Patrušava pra raspracoŭku mižnarodnaha planu źviaržeńnia ŭłady ŭ Biełarusi i vydzialeńni 5 młn dalaraŭ. Šef rasiejskaj specsłužby, jaki atrymaŭ čekisckuju adukacyju ŭ Miensku, čamuści zmaŭčaŭ pra toje, što hetuju infarmacyju možna było znajści ŭ aficyjnych amerykanskich krynicach.

• 0
• 0
• 0
• 0
• 0
• 0
• 0
• 0