Bunt suprać Šejmana

Suprać hałasavali haspadarniki i čynoŭniki. Usie jany ŭ vačach Prakuratury patencyjnyja karupcyjanery. A Šejman u ichnych vačach — patencyjny Vyšynski. Deputaty pałaty pradstaŭnikoŭ adchilili prapanavany prezydentam zakonaprajekt «Ab baraćbie z karupcyjaj».

33 prahałasavali za pryniaćcie zakonu, 30 — suprać, a 20 deputataŭ paličyli za lepšaje nia ŭdzielničać u niebiaśpiečnym hałasavańni. U vyniku 9 krasavika pałata pradstaŭnikoŭ «zaviarnuła» zakonaprajekt, nakiravaŭšy jaho na dapracoŭku ŭ kamisiju pa nacyjanalnaj biaśpiecy. Prajekt mieŭsia zakanadaŭča zamacavać istotnaje pašyreńnie paŭnamoctvaŭ prakuratury, jakoje na praktycy ŭžo isnuje.

Hajki taksama nie žaleznyja

11 sakavika vyjšła «dyscyplinarnaja» dyrektyva №1. 30—31 sakavika Alaksandar Łukašenka źlataŭ u Bieraście, dzie zajaviŭ, što bieraściejskuju vertykal «naskroź pranizała karupcyja». Hieneralny prakuror Viktar Šejman, jaki dvojčy na miesiac kansultuje prezydenta ab sytuacyi ŭ krainie, 6 krasavika čarhovy raz dakłaŭ: suprać vertykalščykaŭ ź Bieraściejščyny ŭzbudžana 11 kryminalnych spravaŭ, śledztva pa jašče čatyroch, raniej prypynienych, adnoŭlena, admienieny 11 pastanoŭ pra admovu va ŭzbudžeńni kryminalnych spraŭ. Pad antykarupcyjnuju kasiłku patrapili słužbovyja asoby abłvykankamu, Biarozaŭskaha rajvykankamu, Bieraściejskaha dy Kobrynskaha harvykankamaŭ.

Namieśnik Hienprakurora Viktar Prus, jaki pradstaŭlaŭ deputatam zakonaprajekt ab baraćbie z karupcyjaj, tłumačyć nieabchodnaść uzmacnieńnia baraćby tym, što «karupcyja źjaŭlajecca prydatnaj hlebaj dla raźvićcia arhanizavanaje złačynnaści j niepasredna pahražaje nacyjanalnaj biaśpiecy luboj dziaržavy».

Cieniavaja ekanomika Biełarusi składaje, pavodle nieaficyjnych acenak V.Prusa, 17—18% ad VUP, ci 3 miljardy dalaraŭ.

Za 2003 h. u Biełarusi ździejśniena 4815 złačynstvaŭ, jakija padpadajuć pad aznačeńnie karupcyjnych. Zavieršany razbor 946 spravaŭ, ź jakich 580 spravaŭ pa abvinavačańni ŭ chabarnictvie pieradadzienyja ŭ Viarchoŭny sud. Surjoznuju prablemu dla Biełarusi ŭjaŭlaje «admyvańnie dachodaŭ, atrymanych niezakonnym šlacham». Banki nie viarnuli 50 młn dalaraŭ kredytaŭ; schavalisia ad śledztva zvyš jak 70 čałaviek. 8 ź ich abvinavačvajucca ŭ chabarnictvie, 65 — u nieviartańni bankaŭskich kredytaŭ. Biełaruś u antykarupcyjnym rejtynhu zajmaje 52-je miesca siarod 133 krainaŭ śvietu.

Hałoŭnaja patreba zakručvańnia hajek, pavodle Viktara Prusa, — ekanamičnaja.

Nia vytrymaŭ uładalnik «Darydy»

Zakonaprajekt vyznačaje miery papiaredžańnia karupcyi i prajaŭ karumpavanaści, adnak zakon zakonam, a na praktycy ŭłada sama šturchaje čynavienstva na karupcyjnyja dziejańni. Pra toje V.Prusu zajaviŭ u Avalnaj zali deputat Uładzimier Dzialendzik. Jon pryvioŭ prykład kankretnaje sytuacyi z dośviedu svajho pradpryjemstva.

U.Dzialendzik źjaŭlajecca zasnavalnikam UPP «Daryda» — lidera vytvorčaści mineralnaj i pitnoj vady na biełaruskim rynku. Mienskaja i lidzkaja vertykali ŭ adzin dzień — 15 sakavika — vydali zahad i rasparadžeńnie dla pradpryjemstvaŭ handlu zabiaśpiečyć pastajannuju prysutnaść u prodažy pradukcyi šerahu vytvorcaŭ.

Načalnik upraŭleńnia spažyvieckaha rynku Mienharvykankamu Michaił Jeŭtuchoŭski «ŭ metach zabieśpiačeńnia naležnaha handlovaha absłuhoŭvańnia nasielnictva praz drobnaaptovuju handlovuju sietku, svoječasovaj padrychtoŭki pradpryjemstvaŭ handlu i hramadzkaha charčavańnia da sezonnaha handlu ŭ 2004 h.» zahadaŭ «zabiaśpiečyć pastajanny prodaž poŭnaha asartymentu marožanaha Mienskaha choładakambinatu №2, pradukcyi AAT «Krynica», AAT «Alivaryja», ZAT «Mienski zavod biezalkaholnych napojaŭ», SP «Akva-Trajpł». Vertykal Lidy i rajonu zahadała handlu davieści asartyment AAT «Lidzkaje piva» da 90%, a na dolu ŭsich astatnich zastałosia nia bolš za 10%.

Miž tym, na ajčynnym rynku mineralnaj i pitnoj vady UPP «Daryda» ŭpeŭniena trymaje pieršaje miesca siarod bolš čym 45 vytvorcaŭ, pastaŭlajučy tracinu ŭsiaje pradukcyi. «Daryda» ŭvachodzić i ŭ «trojku» lideraŭ siarod zvyš 60 vytvorcaŭ biezalkaholnych hazavanych napojaŭ, sastupajučy pieršynstvo tolki kampanii «Coca-cola» i «Viajnianskaj krynicy». Z puskam na pačatku krasavika novaje italjanskaje linii pa vytvorčaści niehazavanaj mineralnaj vady i niehazavanaj pitnoj vady «Daryda» raźličvaje pavialičyć vypusk minerałki na 30%, a ekspart za 2004 h. miarkuje pavialičyć da 20%. Čamu tady adzin ź lideraŭ rynku mineralnaj vady pavinien davać chabar, kab mieć mahčymaść pradavać ułasny tavar, aburaŭsia deputat.

Poŭny varyjant artykułu hladzicie ŭ hazecie "Naša Niva".

Hleb Chmialnicki

• 0
• 0
• 0
• 0
• 0
• 0
• 0
• 0