Hazijopa nastupaje
"Asymetryčny adkaz" nie pieraškodzić Maskvie doŭžyć stratehiju cichaj sapy. Piša ŭ svaim błohu Alaksandar Kłaskoŭski.
Maskoŭskaje vydańnie "Hazieta" tryjumfuje. U publikacyi z dvuchsensoŭnaj nazvaj "Hazijopa" (ale vyraznym padzahałoŭkam "Novy ŭsiaśvietny enerhietyčny paradak pa-rasiejsku") vydańnie abmaloŭvaje sapraŭdy ŭražalnuju panaramu hazanaftavaha nastupu Kramla na Stary Śviet. Jakija ž na hetym tle perspektyvy Biełarusi?
"Enerhietyčnaja imperyja" na ŭzdymie. U minułuju subotu "Hazprom" padpisaŭ maštabnuju damovu ź italjanskaj kampanijaj "Eni". Hazapravod "Paŭdzionnaja płyń", akramia ŭsiaho inšaha, moža stać alternatyvaj prajektu "Nabuka", jaki maje na mecie pampavać na zachad błakitnaje paliva ź Iranu dy Centralnaj Azii.
Karaciej, Maskva sprytna adsiakaje kankurentaŭ. A taksama kuplaje enerhietyčnymi piernikami lajalnaść biednych krainaŭ Paŭdzionna-Uschodniaj Eŭropy. U minułuju niadzielu Pucin asabista naviedaŭ dziela hetaha Bałkanski enerhietyčny samit u Zahrabie. Jak piša taja ž "Hazieta", "Maskva znajšła samaje słabaje miesca ŭ abaronie Eŭraźviazu. U bałkanski praryŭ kinuty ŭvieś rasiejski TEK".
Na tle hetaj sapraŭdy maštabnaj panaramy enerhietyčnych maneŭraŭ asabliva vyrazna bačna, što Biełaruś nia jość niejkim tranzytnym pupom ziamli, jak zdavałasia asobnym tutejšym strateham. Možna, viadoma, raz-druhi zrabić Maskvie "kazu", kali nie starhavalisia nakont cany pastavak, ale potym... Potym rasiejcy, u jakich hrošaj da chalery, prosta pačynajuć budavać truby ŭ abychod.
Kaniešnie, było b prajavaj taho samaha "pupizmu" dumać, nibyta šmatmiljardnyja prajekty pradyktavanyja adno što kanfliktam Kramla z Łukašenkam. Tam lohika bolej maštabnaja. Ale fakt toje, što i Paŭnočnaeŭrapiejski hazapravod, i BTS-2, i ciapier voś "Paŭdzionnaja płyń" abjektyŭna abiasceńvajuć tranzytnyja kozyry Biełarusi. "Niezavisimaja hazieta" naŭprost kaža pra "novuju puhu dla Kijeva i Miensku".
I subjektyŭny čyńnik tut taksama prysutničaje. Pavodle trapnaha vyrazu sacyjolaha Andreja Vardamackaha, nastupstvam niedalnabačnaj palityki ajčynnych ŭładaŭ jość "skryŭleńnie hieaekanamičnaj prastory. Tyja linii, što musili naturalnym čynam prachodzić z Rasiei cieraź Biełaruś u Eŭropu, abychodziać hety absiah".
Ciapierašni lichamankavy pošuk enerhietyčnych alternatyŭ pakul što vyhladaje nia nadta pierakanaŭča. Jašče bolej, kali AES zamoviać rasiejcam (a jany vykručvajuć ruki), to atrymajecca klasyčny abłom: za što zmahalisia, na toje i narvalisia!
Adzinaj vyratavalnaj nišaj padajecca militaryscki chaŭrus. Paralelna z enerhietyčnaj ekspansijaj Kreml kidaje Zachadu i vajskova-palityčny vyklik. U maskoŭskuju presu źlitaja infarmacyja, što Pucin rychtuje ŭkaz ab prypynieńni ŭdziełu ŭ Damovie pra abmiežavańnie zvyčajnych uzbrojenych siłaŭ u Eŭropie. Aktualizujecca i versija pra mažlivaje raźmiaščeńnie u Biełarusi rasiejskich "Iskanderaŭ". Ale vyjhryš dla nas tut sumnieŭny. Tym bolej što zbroja, jak śviedčać vyciečki ŭ presu, nadta syraja, nie daviedzienaja da ładu. Tolki hetaha i nie stavała "čarnobylskaj respublicy"!
Na dumku našaha palitolaha Andreja Fiodarava, Kreml całkam moža skarystać biełaruski placdarm jak arhument u sprečcy z Vašynhtonam. Ale skakać ad radaści tutejšamu načalstvu nie vypadaje. "Asymetryčny adkaz" nie pieraškodzić Maskvie doŭžyć stratehiju cichaj sapy — spakvala daciskać "apošniaha chaŭruśnika" ekanamičnymi metadami.
Capkała i Bałkuniec atakavali litoŭskaha palityka, jaki dapamahaŭ biełarusam paśla 2020‑ha i spryčyniŭsia da spravy, jakuju zavioŭ prakuror u Haazie28
Kamientary