26 traŭnia ŭ Miensku na neŭtralnaj terytoryi, pa-za sudovaj zalaj, sustrelisia pradstaŭniki Ministerstva justycyi i niaŭradavych arhanizacyjaŭ. Tema arhanizavanych imi Hramadzkich słuchańniaŭ — likvidacyja šerahu HA, raspačataja Miniustam. Abmierkavańnie było emacyjnaje. Nia ŭ prykład vynikovaj rezalucyi.
Miniust znajšoŭ parušeńni ŭ dziejnaści hramadzkich abjadnańniaŭ «Ratuša» (Horadnia), «Hramadzianskija inicyjatyvy» (Homiel), «Varuta» (Baranavičy) i «Moładzievy chryścijanska-sacyjalny sajuz». U traŭni sudy pačali razhladać spravy pa ich likvidacyi (akramia MCHSS, data suda jakoha jašče nia vyznačana), dy ŭsie byli paadkładanyja. U časie «pieradyški» inicyjatyva «Naša salidarnaść» i praviała Hramadzkija słuchańni, kab naładzić dyjaloh pamiž Miniustam dy «trecim sektaram» i ŭratavać ad likvidacyi najbujniejšyja hramadzkija abjadnańni Biełarusi.
Dyjaloh toj vioŭsia ŭ asnoŭnym pa-rasiejsku. «Druhoj dziaržaŭnaj» havaryła Alena Tankačova, staršyńka praŭleńnia HA «Niezaležnaje tavarystva pravavych daśledavańniaŭ», što viała słuchańni. Nia ŭ prykład joj, načalnik upraŭleńnia hramadzkich abjadnańniaŭ Miniustu Michał Suchinin na biełaruskamoŭnyja pytańni adkazvaŭ pa-biełarusku. Źjaŭleńnie hetaha ŭradoŭcy padvysiła status mierapryjemstva i dadało jamu žyvaści. Astatnija zaprošanyja čynoŭniki słuchańni praihnaravali.
Suchinin sprabavaŭ pierakanać prysutnych, što dziejańni adrazu suprać čatyroch hramadzkich abjadnańniaŭ — «heta źbieh abstavinaŭ». Čynoŭnik pryvodziŭ pierakanaŭčy arhument: «Vy viedajecie mianie nie adzin hod, i nichto nia moža mianie abvinavacić u chłuśni». Tolki bolšaść słuchačoŭ u ščyraść M.Suchinina nie pavieryli. Kiraŭnik «Viasny» Aleś Bialacki tłumačyŭ sioletniuju «začystku» žadańniem dziaržavy «ŭziać pad kantrol hety hramadzki sektar žyćcia», pasłabić abo raskałoć jaho napiaredadni pryniaćcia Kanhresam ZŠA Aktu pra demakratyju ŭ Biełarusi.
«Peŭnyja tavaryšy bačać u nas kryvažernaha źviera, jaki nikomu ŭ respublicy nie daje žyć», — kryŭdavaŭ M.Suchinin. Pavodle jahonych słovaŭ, Miniust daść hramadzkim abjadnańniam palohku padčas rehistracyi, a zamiest likvidacyi pačnie praktykavacca prypynieńnie dziejnaści arhanizacyi — znoŭ ža praz sud. Ale kali toje budzie — nieviadoma. A pakul Miniust nie škaduje piśmovych papiaredžańniaŭ i sioleta zrabiŭ ich až 33.
Tym nia mienš, aptymisty ź inicyjatyvy «Naša salidarnaść» razhladajuć Hramadzkija słuchańni jak «pieršy publičny krok da dyjalohu z uładami». Imknieńnie da «stałaha dyjalohu pamiž niaŭradavymi arhanizacyjami i dziaržaŭnymi orhanami» było adlustravana i ŭ pryniataj rezalucyi.
Aleh Tačony
Ciapier čytajuć
Hałoŭnym śpikieram Žanočaha forumu ŭ Minsku stanie rasijski kryndžovy psichołah, jaki raskazvaŭ pra «pamiać žanočych pałavych hub»4
Kamientary