Z usioj krainy

Z usioj krainy

Hipermarkiety zamiest rynkaŭ

Śledam za šapikami mienskija ŭłady ŭzialisia likvidavać rečavyja rynki na stadyjonach. Tak, na “Traktary” zamiest rynku paŭstanie ladovy pałac, dyj na “Dynama” skončyłasia rekanstrukcyja, i patreba zdavać terytoryju ŭ arendu, kab atrymlivać hrošy, adpała. Na “Ždanovičach” taksama niespakojna: drobnych handlaroŭ pierakidajuć ź miesca na miesca z pryčyny čarhovaj rekanstrukcyi. Tym časam kolkaść hipermarkietaŭ, jakija abiacaje pabudavać meryja, vyrasła ź dzieviaci da piatnaccaci. Pieršy ź ich, mahčyma, pačnuć uzvodzić užo sioleta na skryžavańni praspektu Dziaržynskaha i kalcavoj aŭtadarohi za košt zamiežnaha pradpryjemstva “Altersaljušen”.

Biez kampramisaŭ

Dziaržaŭnaja kamisija vyznačyła čatyry varyjanty, ź jakich budzie abrany himn Respubliki Biełarusi. Pra heta ŭ časie presavaj kanferencyi, pryśviečanaj Dniu teatru, miž inšym paviedamiŭ namieśnik ministra kultury Ŭładzimier Ryłatka. U nastupny tur prajšli “Radzima maja darahaja” Alesia Bačyły na muzyku Ŭładzimiera Ałoŭnikava, “Krasuj, Biełaruś” Leanida Prančaka na muzyku Vasila Rainčyka i dva teksty na muzyku staroha himnu BSSR aŭtarstva Nieściera Sakałoŭskaha.

Siarhiej Budkin

ELEKTRYČKI PADARAŽELI na 50%. Ciapier za kožnuju maršrutnuju zonu (umoŭnyja 10 km) daviadziecca płacić 120 rubloŭ.

U KASACH nia majuć prava davać reštu starymi kupiurami. Kasirak abaviazali adsartoŭvać parvanuju ci zabrudžanuju hatoŭku i zdavać jaje ŭ banki.

DA 1 LIPIENIA pad mižnarodnyja kartki pieraabstalujuć bankamaty “BiełKart”, praź jakija spłačvajuć zarobki na pradpryjemstvach. Ciapier bankaŭskija kartki majuć 215 tys. biełarusaŭ, čverć jakich karystajucca systemaj “BiełKart”.

PADATKAŬ NA 110 MŁN. DALARAŬ nie dabraŭ za studzień-luty biudžet Biełarusi. Ciapier zapazyčanaść pradpryjemstvaŭ pierad biudžetam na 41,3% bolšaja, čym na pačatku hodu.

UDVAJA ŹMIENŠYLISIA zapazyčanaści nasielnictva za kamunalnyja pasłuhi z pačatku hodu. U Ministerstvie žyllova-kamunalnaj haspadarki pierakananyja, što na heta paŭpłyvaŭ vypadak u Bieraści, dzie čałavieka, jaki nie płaciŭ, prymusova pierasialili ŭ inšuju kvateru biez vyhodaŭ.

0,5% AD SUMY STRACHOŬKI budzie kaštavać strachavym kampanijam kožny dzień zatrymki raźliku z paciarpiełym. Hetaje praviła pačnie dziejničać z 12 krasavika.

TRACINU BIEŁARUSKICH DAROH treba ramantavać. Sioleta ž u najlepšym vypadku adramantujuć 7 tys. kilametraŭ, ci 10%.

1,7 MŁN. EŬRA atrymaje Haradzienščyna pa prahramie TASIS na abaronu Niomana. Hrošy najpierš buduć davać kałhasam i saŭhasam, kab tyja nie skidali hnoj u raku, a rabili ačyščalnyja zbudavańni.

PAD 100 BIJAPRYBIRALNIAŬ ustalujuć sioleta ŭ centry i ŭ bujnych parkach Miensku. Karystańnie bijaprybiralniami budzie płatnym.

METRO Ŭ BOK URUČČA raspačnuć budavać sioleta, a skončać praz 3—4 hady. U Mienharvykankamie kažuć, što sabiekošt transpartnych pasłuh novaj stancyi budzie mienšym za sabiekošt trymańnia naziemnaha hramadzkaha transpartu, jaki ŭ vyniku možna budzie skaracić.

TOLKI 40 TRALEJBUSAŬ nabuduć ciaham hetaha hodu mienskija ŭłady. Heta 10% ad taho, što treba śpisvać na metałałom.

126 TRAKTAROŬ padaruje Miensk “čarnobylskim” rajonam — pa 6 mašynaŭ kožnamu. Hrošy na techniku voźmuć ź biudžetu stalicy.

450 TYS. DALARAŬ dla kałhasaŭ zarabili mahiloŭcy na rehijanalnym subotniku, što zładziŭ na minułym tydni abłvykankam. Da taho ž usich ich zmusili pieraličyć na pasiaŭnuju pa 1% ad svaich zarobkaŭ.

1500 DALARAŬ možna vyvozić ciapier biaz mytnaj deklaracyi z Rasiei. Stolki sama dazvalajuć vyvozić ź Biełarusi ŭ Rasieju i našyja mytniki.

ZA IMPARTOVYJA PIŬNYJA PLAŠKI znoŭ biaruć zakład. Na pačatku hodu, kab abaranić ajčynnych vytvorcaŭ škła, urad užo prymaŭ takoje rašeńnie, ale potym, pad ciskam bujnych rasiejskich brovaraŭ, jaho skasavali. Ciapier zakład znoŭ biaruć, pryčym imparcioram piva nazad buduć viartać nie 100%, a tolki 70% zakładnoha koštu plašak. Rasiejskija piŭnyja kampanii niepakojacca, što ich piva ŭ Biełarusi padaražeje i stracić kankurentazdolnaść.

Siaržuk Ivanoŭski