Anatol Prasałovič. Praz hoład — da aŭtakiefalii

 Praz hoład — da aŭtakiefalii

7 listapada raspačaŭ haładoŭku ajciec Ivan (Spasiuk), śviatar Śviata-Eŭfrasińnieŭskaje carkvy pasiołku Pahraničny Bierastavickaha rajonu, baćka troch małych dziaciej. Pryčyna — admova ŭładaŭ rehistravać aŭtakiefalny prychod, na čale jakoha staić haładoŭščyk.

Prychody, jakija nia chočuć padparadkoŭvacca Maskvie i dzie nabaženstvy viaducca na biełaruskaj movie, isnujuć u Miensku, Siomkavym Haradku, Lidzie, Słonimie, Horadni dy ŭ Pahraničnym.

Ajciec Ivan padaŭ zajaŭku na rehistracyju jahonaha prychodu ŭ Haradzienski abłvykankam, ale tam jamu admovili i nakiravali ŭ Kamitet pa spravach relihii. U apošnim była stvoranaja ekspertnaja kamisija, jakaja na svaim apošnim pasiedžańni vyłučyła, urešcie, kankretnyja pretenzii pa statucie zamiest byłoha, kali ajca Ivana i jahonych prychilnikaŭ abvinavačvali ŭ dziejnaści, “napravlennoj protiv suvierienitieta Riespubliki Biełaruś, jeje konstitucionnoho stroja i hraždanskoho sohłasija”.

Pradstaŭniki dziaržavy, ad jakoj carkva adździelenaja pavodle zakonu, usialak pieraškadžajuć dziejnaści prychodu ŭ Pahraničnym: na ajca Ivana nakłali paru štrafaŭ na padstavie parušeńnia 193-ha artykułu Administracyjnaha kodeksu, a zaraz, paśla abviaščeńnia haładoŭki, jon uvieś čas vysłuchvaje ananimnyja telefonnyja pahrozy. Ułady, zrazumieła, bajacca paŭtareńnia ŭkrainskaha dośviedu, dzie niezaležnaja carkva nabrała ŭžo dosyć siłaŭ, kab stvaryć kankurencyju miascovamu ekzarchatu Maskoŭskaha Patryjarchatu. Tamu nia dziŭna, što spravaj, pa našych źviestkach, cikavilisia navat supracoŭniki KHB. Pieraškody robiacca nia tolki praz admovu ŭ rehistravańni. Kali padobnaja sytuacyja ŭźnikła ŭ Lidzie i vierniki raspačali ŭźviadzieńnie svajoj bažnicy, haradzkoje kiraŭnictva pajšło na avanturu, raźmiaściŭšy darožnyja znaki naŭkoła hetak, kab nijakaja technika nie mahła nablizicca da miesca budoŭli.

Zajavu ab haładoŭcy i paru socień podpisaŭ u abaronu aŭtakiefalii pieradali pasłu Viku i ŭ Hielsynski kamitet. Pryčym takuju prahu viernikaŭ da stvareńnia aŭtakiefalnaje carkvy možna patłumačyć nia tolki žadańniem słuchać kazani na rodnaj movie. Pryčyna tut jość i čysta matarjalnaja: mnohija pravasłaŭnyja prosta ŭžo nia ŭ stanie płacić vieličeznyja hrošy za carkoŭnyja pasłuhi, rascenki na jakija dyktujucca biespasiarednie z Maskvy. I hrošy viernikaŭ iduć niemaviedama kudy: prykra hladzieć na abšarpanyja bažnicy ŭ toj čas, jak pravasłaŭnyja jararchi dazvalajuć sabie pabudovu šykoŭnych trochpaviarchovych katedžaŭ.

Biełaruskija aŭtakiefalisty vyrašyli padacca pad kryło Suśvietnaha Amerykanskaha Patryjarchatu, bo artadaksalny Patryjarch kanstancinopalski duža zvažaje na Maskvu, a kiraŭniki dyjasparnaj BAPC nijakaj dapamohi raspačatamu ruchu nie akazvajuć. Šmat spadziavańniaŭ uskładajecca na padtrymku siastrynskaj Ukrainskaj Aŭtakiefalnaj Carkvy, jakaja ŭžo rychtuje adpaviednuju zajavu i dzie najbolšym prychilnikam biełaruskaj aŭtakiefalizacyi źjaŭlajecca Archijapiskap Rovienski Stafan. A z dalokaj Hišpanii pryjaždžali katalonskija televizijščyki specyjalna, kab źniać repartaž ab carkoŭnych niezaležnikach.

Siońnia, u paniadziełak, stanuć viadomyja kankretnyja pryčyny admovy ŭ rehistracyi. Ale ni ajciec Ivan, ni jahony tavaryš u spravie ajciec Leanid (Akałovič) nie hublajuć nadziei. Jany ŭpeŭnienyja, što ruch značna pašyrycca mienavita paśla aficyjnaj rehistracyi, bo ideju padtrymlivajuć navat niekatoryja pradstaŭniki Biełaruskaha Ekzarchatu. Mo choć praz heta pryjdzie ŭ Biełaruś niezaležnaść?

Ajciec Ivan maje namier praciahvać haładoŭku da taho času, pakul nia budzie dadzieny dazvoł na isnavańnie jahonaha prychodu. Kažuć, što pradstaŭniki aficyjnych uładaŭ cynična žartujuć sa śviatara: ničoha, niachaj pahaładuje, post, maŭlaŭ, nikomu nie zaškodzić. “Na Pilipaŭku voŭk niema vyje...”

Anatol Prasałovič