Siarhiej Paŭłoŭski. Intehracyja vybuchaŭ z prapažami ludziej

Intehracyja vybuchaŭ z prapažami ludziej

Maryjanetačny ŭrad Łukašenki vykarystoŭvaje terakty ŭ Rasiei dla ŭmacavańnia dyktatury

U minuły čaćvier pozna ŭviečary źnik vykanaŭca abaviazkaŭ staršyni Viarchoŭnaha Savietu Biełarusi Viktar Hančar. Niezaležnyja naziralniki źviazvajuć hetaje zdareńnie z padryvami žyłych damoŭ u Rasiei, u vyniku jakich zahinuli sotni ludziej.

Tam padryvajuć damy, tut prapadajuć dziaržaŭnyja dziejačy. Spačatku Vińnikava, potym Zacharanka, zahadkavaja śmierć Karpienki, potym Hančar, dalej — chto zaŭhodna. Tak Biełaruś adhukajecca na padziei ŭ «sajuznaj dziaržavie». Spačatku Bujnack, dva razy Maskva, Vałhadonsk, dalej — dzie zaŭhodna. Kamu heta vyhadna? Kažuć, najpierš Jelcynu i jahonamu atačeńniu. U nas — čałavieku, jaki piać hadoŭ sprabuje ahučvać usio, što vyhadna Jelcynu. Na minułym tydni heta pryviało da adkrytaj padmieny paniaćciaŭ.

Łukašenka naŭprost retranślavaŭ zahady rasiejskaha ministra ŭnutranych spravaŭ Rušajły siłavikam — pračosvać padvały, žyły fond, kaŭkazcaŭ. U dadatak — zabaranić mitynhi i zakryć apazycyjnyja hazety. Słovam, bieź piaci chvilin nadzvyčajnaje stanovišča. Kali takija miery ničym nie apraŭdanyja, ich vynikam moža być tolki ŭsieahulny psychoz i dezaryjentacyja nasielnictva. Heta zaŭsiody na ruku chapužnaj abo niazdatnaj, abo nielehitymnaj uładzie. A kab nasielnictva nia ŭbačyła padmieny paniaćciaŭ (u hetym vypadku — padmieny krainaŭ), na poŭnuju katušku pracujuć u Biełarusi rasiejskija telekanały, stvarajučy iluziju realnaj pahrozy i dla našych damoŭ. Adzinaje infarmacyjnaje pole i natužlivaja prapahanda pra toje, što Biełaruś biez Rasiei nia moža, my asudžanyja žyć u adnoj dziaržavie — usio heta daje svoj plon. Ludzi ŭ Miensku ci Homieli sapraŭdy pačynajuć bajacca načnych vybuchaŭ. A «miery» siłavikoŭ tolki nahniatajuć psychoz. Tak adciahvajecca ŭvaha ad pravałaŭ u ekanomicy, ad nieŭradžaju, ad mizernaha zarobku. Pad šumok prybirajucca palityčnyja apanenty. Rasiejskija terarysty słužać nahodaj pryhadać biełaruskuju apazycyju. Zaraz dzie što adbudziecca, i Łukašenka, nie źmirhnuŭšy vokam, nazavie vinoŭnikam teraktu taho ž Hančara.

Padmiena paniaćciaŭ u šyrokim sensie — heta padmiena biełaruskich nacyjanalnych intaresaŭ rasiejskimi, jakija adstojvajuć u Biełarusi Łukašenka ź siabrami, demanstrujučy pavodziny klasyčnaha maryjanetačnaha ŭradu. Pry poŭnym pravale intehracyi z Rasiejaj de-jure naprałom viadziecca faktyčnaja intehracyja ŭ Rasieju. Stvorana adzinaje infarmacyjnaje pole, u jakim kanał BT — nia bolš čym treciaj ruki abłasnaja telestudyja. Łukašenkava hazeta ŭvodzić rubryku «Oni o nas», dzie pierakazvajucca artykuły zachodnich hazet pra ŭsialakich Bierazoŭskich z Husinskimi (chto tut jany i chto my?). Biełaruskaje palityčnaje pole ŭžo siońnia hatovaje ŭklučycca ŭ federalnyja vybary. Tut vam i svaje «jabłyki», i svaje «aciečastvy», i kamunisty, i žyrynoŭcy... Ekanomika taksama hatovaja lehčy pad rasiejskich aliharchaŭ, bo całkam zaviazanaja na susiedniaj krainie. Zakanadaŭstva prosta zamianiajecca na rasiejskaje, bo mienskija «pałatniki», mabyć, i sami ŭžo zrazumieli, jakoha navytvarali absurdu. Zastajecca tolki padmachnuć papierku pra «ŭźjadnańnie». Narod padtrymaje.

Narod, biezumoŭna, padtrymaje. Jon, niebahaty i niesvabodny, ciapier zavarožvajecca ahulnym stracham. Słova pra pahrozu teraryzmu ŭ Biełarusi pramoŭlena. Ciapier treba tolki z bolšym impetam hladzieć u televizary maskoŭskija vybuchi i chutčej abjadnoŭvacca ŭ adnu dziaržavu, kab u čačenskich mściŭcaŭ źjavilisia sapraŭdnyja padstavy ŭzarvać što-niebudź i ŭ nas.

Siarhiej Paŭłoŭski