Makiej lacić na samit Ruchu niedałučeńnia ŭ Tehieran zamiest Łukašenki, a Łukašenka sustreniecca z Alijevym

Biełaruskuju delehacyju na samicie Ruchu niedałučeńnia ŭ Tehieranie ŭznačalić novy ministr zamiežnych spraŭ Uładzimir Makiej, pryznačany na hetuju pasadu 20 žniŭnia.

Jak paviedamlaje pres-słužba MZS Biełarusi, asnoŭnaja častka XVI samita dziaržaŭ — udzielnic Ruchu niedałučeńnia projdzie 30–31 žniŭnia. «Asnoŭnaj metaj mierapryjemstva stanie abmierkavańnie najbolš aktualnych mižnarodnych prablem i pryniaćcie vynikovaha dakumienta forumu, — adznačajecca ŭ paviedamleńni. — U prajekt vynikovaha dakumienta sustrečy płanujecca ŭklučeńnie šerahu prapanoŭ Biełarusi, zasnavanych na pryjarytetnych zadačach biełaruskaj delehacyi ŭ AAN (ab pryznańni raznastajnaści šlachoŭ prahresiŭnaha raźvićcia, ab stvareńni hłabalnych partniorstvaŭ, ab umacavańni ŭzajemadziejańnia RN z suśvietnymi centrami siły, ab baraćbie z handlem ludźmi, ab inicyjatyvie ab moładzi, ab krainach ź siarednim uzroŭniem dachodu, ab stvareńni hłabalnaha miechanizmu pieradačy technałohij novych i adnaŭlajemych krynic enierhii)».

Makiej vystupić na plenarnym pasiadžeńni samita i praviadzie sustrečy z kiraŭnikami šerahu delehacyj «u metach abmierkavańnia aktualnych dla Biełarusi pytańniaŭ dvuchbakovych adnosin».

Mierapryjemstvy ŭ ramkach samita pačalisia ŭ Tehieranie (Iran) 26 žniŭnia. U paniadziełak i aŭtorak tut prachodziać narady na ŭzroŭni kiraŭnikoŭ MZS, zatym pačnucca sustrečy na vysokim uzroŭni. Jak paviedamlajuć zamiežnyja ŚMI, čakajecca, što ŭ Iran źjeducca bolš čym 50 prezidentaŭ, manarchaŭ i prem'jer-ministraŭ.

Na papiarednim samicie Ruchu niedałučeńnia, jaki prachodziŭ u lipieni 2009 hoda ŭ Jehipcie, Biełaruś taksama pradstaŭlaŭ ministr zamiežnych spraŭ Siarhiej Martynaŭ.

Na sioletni samit prezident Irana Machmud Achmadziniežad zaprašaŭ pryjechać Alaksandra Łukašenku.

Łukašenka ŭdzielničaŭ u pracy Havanskaha samita Ruchu niedałučeńnia ŭ vieraśni 2006 hoda. Tady jon zaklikaŭ niedałučanyja krainy ŭzmacnić ekanamičnuju i palityčnuju składajučyja ruchu, pierabudavać jaho arhanizacyjnuju strukturu z ulikam pryncypaŭ AAN i vypracavać vyraznuju prahramu dziejańniaŭ pa farmiravańni šmatpalarnaha śvietu.

Ruch niedałučeńnia sfarmiravaŭsia ŭ druhoj pałovie 1950-ch — pačatku 1960-ch hadoŭ ź liku krain, što vyjšli sa składu jeŭrapiejskich kałanijalnych impieryj, ale nie žadali prymykać da vajenna-palityčnych sajuzaŭ, jakija ŭznačalvalisia SSSR i ZŠA. Ciapier ruch — heta niefarmalnaje abjadnańnie dziaržaŭ Azii, Afryki i Łacinskaj Amieryki, jaho ŭdzielnikami źjaŭlajucca 118 krain.

Biełaruś stała prajaŭlać cikavaść da hetaj arhanizacyi ŭ druhoj pałovie 1990-ch hadoŭ. U toj čas udzieł u ruchu razhladaŭsia ŭ jakaści svojeasablivaj źniešniepalityčnaj alternatyvy supracoŭnictvu ź dziaržavami Zachadu, adnosiny ź jakimi surjozna sapsavalisia ŭ 1996 hodzie. U vieraśni 1997 hoda Biełaruś atrymała status naziralnika ŭ Ruchu niedałučeńnia, a praz hod, u vieraśni 1998-ha, na samicie ŭ Durbanie (PAR) stała jaho paŭnapraŭnym udzielnikam. U 2004 hodzie, paśla dałučeńnia Malty i Kipra da Jeŭrasajuza, Biełaruś zastałasia adzinym udzielnikam Ruchu niedałučeńnia ŭ Jeŭropie.

Sam Alaksandr Łukašenka akurat u časie samita sustreniecca ŭ Minsku ź Ilchamam Alijevym, prezidentam Azierbajdžana, krainy, jakaja majei vielmi naciahnutyja adnosiny ź Iranam.

• 0
• 0
• 0
• 0
• 0
• 0
• 0
• 0