Niahledziačy na pryhavor suda, jaki nabyŭ moc, Alaksandr Krutoj dahetul zastajecca ŭ SIZA MUS. Pra heta paviedamiła jaho dačka Inesa, jakaja paciarpieła padčas vybuchu ŭ mietro 11 krasavika 2011 hoda, intaresy jakoj sprabavaŭ pradstaŭlać u sudzie pa terakcie jaje baćka.
Pavodle słoŭ Inesy Krutoj, paśla suda ŭ baćki «źjaviłasia nadzieja ŭbačyć śviatło, u listach jon sprabuje žartavać». Apošni list svajaki atrymali ŭ kancy minułaha tydnia. Viadoma, što Alaksandr Krutoj atrymaŭ materyjały suda.
Nahadajem, 20 sakavika sudździa suda Maskoŭskaha rajona Minska Jaŭhien Chatkievič paćvierdziŭ rašeńnie hetaha ž suda, ale inšaha sudździ, pryniataje 6 śniežnia minułaha hoda, ab nieabchodnaści prymianieńnia mier biaśpieki i lačeńnia da Alaksandra Krutoha. Sudovy razhlad pravodziŭsia biez Krutoha i jak i pieršy raz u zakrytym režymie. Sudździa zadavoliŭ chadajnictva ab hetym dziaržabvinavaŭcy Vańkoviča i paciarpiełaj — hałoŭnaha ŭrača palikliniki № 32 Valanciny Čupryk. Paciarpiełaja zajaviła, što zakryć praces nieabchodna dla praduchileńnia vydavańnia źviestak, jakija ŭščamlajuć jaje hodnaść.
Jak skazaŭ 21 sakavika staršy pamočnik prakurora Minska Siarhiej Bałašaŭ, pavodle pastanovy suda, Alaksandr Krutoj pryznany asobaj, jakaja ŭčyniła hramadska niebiaśpiečnyja dziejańni, praduhledžanyja častkaj 1 artykuła 339 Kryminalnaha kodeksa (chulihanstva), u stanie biespamiactva i vyzvaleny ad kryminalnaj adkaznaści. Jon budzie adpraŭleny ŭ psichijatryčnuju balnicu paśla taho, jak nabudzie moc pastanova rajonnaha suda.
- Jak užo paviedamlałasia, sprava była znoŭ nakiravana ŭ rajonny sud Minskim haradskim sudom paśla razhladu 10 lutaha kasacyjnaj skarhi na pryhavor, vyniesieny 6 śniežnia sudom Maskoŭskaha rajona. Minharsud admoviŭ u vyzvaleńni Krutoha
- 20 vieraśnia 2011 hoda Krutoj, jaki aktyŭna vystupaŭ na pracesie pa terakcie, byŭ zatrymany milicyjaj u Minsku. 22 vieraśnia Alaksandr Fiedarcoŭ, jaki staršynstvavaŭ u sudzie, častkova začytaŭ pastanovu ab jaho zatrymańni. U im skazana, što Krutoj «17 žniŭnia, znachodziačysia ŭ kabiniecie adnoj ź miedycynskich ustanoŭ Minska, naŭmysna ŭčyniŭ chulihanskija dziejańni z asablivym cynizmam i hrebavańniem normami marali». Heta vykazałasia ŭ tym, što jon vyliŭ źmieściva dźviuch banak — vadkaść z pacham mačy — na hałoŭnaha ŭrača. Pa nakiravańni prakurora Krutoj byŭ adpraŭleny ŭ RNPC psichičnaha zdaroŭja. Ekśpiertyza pryznała jaho šalonym.
- 6 śniežnia sud Maskoŭskaha rajona pastanaviŭ prymianić da Alaksandra Krutoha prymusovyja miery biaśpieki i lačeńnia. Paśla RNPC jon znachodziŭsia ŭ žodzinskaj turmie, zatym byŭ pieraviedzieny ŭ SIZA № 1.
Kamientary