Narodny schod u Homieli

U Homieli 25 sakavika prajšła treciaja siesija Narodnaha schodu, jakaja była sumieščanaja z pačatkam rehijanalnaj kampanii «Za spraviadlivyja vybary». Mierapryjemstva adbyłosia ŭ ofisie abłasnoj arhanizacyi AHP.

Jak paviedamiŭ staršynia abłasnoj arhanizacyi AHP Vasil Palakoŭ, akramia arhanizataraŭ zarehistravalisia 62 udzielniki Narodnaha schodu.

«Da hetaha była praviedziena šyrokaja infarmacyjnaja kampanija, raspaŭsiudzili prykładna 70 tysiač ulotak-zaprašeńniaŭ. Nievialikaja kolkaść žadajučych uziać udzieł u niezaležnym nazirańni na bližejšych parłamienckich vybarach havoryć ab tym, što na hety čas prablema sumlennych vybaraŭ jašče nie nastolki aktualnaja, jak, skažam, u rasijskim hramadstvie, dzie kolkaść naziralnikaŭ za dva-try miesiacy pavialičyłasia ŭ razy, i dzie heta tema — sumlennych vybaraŭ — stała topavaj palityčnaj navinoj dla pieravažnaj bolšaści aktyŭnych hramadzian», — prakamientavaŭ palityk.

Arhanizatary mierapryjemstva pavinšavali ŭdzielnikaŭ z Dniom Voli, a zatym prezientavali kampaniju «Za spraviadlivyja vybary».

«Udzielniki mieli mahčymaść vystupić, vykazać svaju pazicyju, byli roznyja cikavyja prapanovy ab tym, jak zrabić vybary sumlennymi i prazrystymi. Viadoma, hałoŭnaje — sumiesnaja praca, ruchacca krok pa kroku, a nie marnavać čas na niejkija tearetyčnyja dyskusii. U vyniku pryniali rezalucyju, u jakoj padkreślivajecca, što nieabchodna arhanizavać kampaniju, pracavać sumiesna, kab usim było zrazumieła, što ŭ Biełarusi niama vybaraŭ, što ŭłada ašukvaje ludziej i niezakonna ŭtrymlivajecca na viarchušcy palityčnaj piramidy», — padkreśliŭ Palakoŭ.

Jon zaŭvažyŭ, što asablivych pieraškod arhanizataram ułady nie čynili. Na vulicy pa pierymietry budynka stajali milicyjaniery, z aŭtamabilaŭ zdymali na kamiery, ale zatrymańniaŭ nie było. Na budynku ofisa byŭ vyviešany bieł-čyrvona-bieły ściah, ale prablem u suviazi z hetym nie ŭźnikała, milicyja nie patrabavała jaho źniać.

«Chtości, moža być, nie dajšoŭ da ofisa z-za taho, što ŭbačyli milicyju, jakaja zdymała na kamiery. Ale nikoha nie spyniali, nie apytvali, dakumienty nie praviarali. Prosta vizualnaje nazirańnie, biez aktyŭnych dziejańniaŭ», — dadaŭ palityk.

U rezalucyi, pryniataj na Narodnym schodzie, havorycca ab tym, što na ŭsich etapach bližejšaj vybarčaj kampanii nieabchodna vykarystoŭvać adzinaje pasłańnie hramadzianam Biełarusi pra nieabchodnaść demakratyčnych pieraŭtvareńniaŭ, pra adsutnaść ŭ krainie vybaraŭ, ab prablemie palitźniavolenych. Taksama vyrašana pryciahnuć maksimalnuju kolkaść vałancioraŭ da nazirańnia z metaj źmianieńnia praktyki praviadzieńnia vybaraŭ.

• 0
• 0
• 0
• 0
• 0
• 0
• 0
• 0