U Biełarusi zdymajucca ŭsie abmiežavańni na vyvaz tavaraŭ fizasobami
Adpaviednuju pastanovu pryniaŭ Saŭmin.
U Biełarusi 15 lutaha admianiajucca abmiežavańni i zabarony na vyvaz fizičnymi asobami spažyvieckich tavaraŭ za miažu, paviedamili ŭpres-słužbie Dziaržaŭnaha mytnaha kamiteta.
Pastanovaj Saŭmina ad 6 lutaha 2012 hoda № 124 pryznana, što straciła siłu pastanova ŭrada ad 11 červienia 2011 hoda № 755 «Ab niekatorych mierach pa abaronie spažyvieckaha rynku».
Červieńskaj pastanovaj byŭ zaćvierdžany pieralik tavaraŭ i normy ich vyvazu fizičnymi asobami, pry pieravyšeńni jakich padlahaŭ vypłacie śpiecyjalny zbor.Taksama byŭ pryniaty pieralik tavaraŭ, časova zabaronienych da vyvazu fizasobami. Zaraz usie abmiežavańni i zabarony z 00.00 15 lutaha 2012 hoda zdymajucca, udakładnili ŭ DMK.
Nahadajem, zhodna z pastanovaj № 755, u pieraliku časova zabaronienych da vyvazu tavaraŭ značylisia bytavyja chaładzilniki i marazilniki vytvorčaści ZAT «Atłant»; hazavyja plity SP «Bresthazaaparat»; cemient vytvorčaści AAT «Krasnasielskbudmateryjały», RUP «Biełaruski cemientny zavod» i «Kryčaŭcemientnašyfier», sintetyčnyja myjnyja srodki AAT «Barchim», a taksama krupy i makaronnyja vyraby niezaležna ad vytvorcy.
U pieralik tavaraŭ, vyvaz jakich narmavany, byli ŭklučany: śvinina i miasa ptuški, cukar, muka, syčužnyja syry (možna było vyvozić nie bolš jak 2 kh); masła śmietankovaje (1 kh); tytuniovyja vyraby biełaruskaj vytvorčaści (2 pački); miasnyja i małočnyja kansiervy (5 blašanak). Pry pieravyšeńni hetych norm fizasoby abaviazany byli vypłačvać śpiecyjalny zbor, pamier jakoha składaŭ dvuchrazovuju siaredniuju canu tavaru.
Zabarona i abmiežavańni nie tyčylisia vyvazu zhadanych tavaraŭ u krainy Mytnaha sajuza — Rasiju i Kazachstan.
Varta zaznačyć, što z červienia minułaha hoda ŭ Biełarusi taksama dziejničajuć abmiežavańni na vyvaz fizasobami aŭtamabilnaha paliva. Pavodle źviestak DMK, na jaho abmiežavańni zastajucca. Kantrol za vyvazam paliva ŭstanoŭleny pastanovaj Saŭmina № 753.
Pytańnie ŭviadzieńnia vyšejpieraličanych abmiežavalnych mier abmiarkoŭvałasia 10 červienia na sustrečy Alaksandra Łukašenki ź dziaržsakratarom Savieta biaśpieki Leanidam Malcavym.
Łukašenka tady źviarnuŭ uvahu na prablemu «aktyŭnaha vyvazu ŭ sumiežnyja krainy sacyjalna značnych tavaraŭ, u tym liku aŭtmabilnaha paliva, praduktaŭ charčavańnia, na jakija ceny ŭ Biełarusi značna nižejšyja, čym u susiedziaŭ».
Kamientary