Vajskovy Novy hod – fotarepartaž

Da śviatočnaj nočy ŭ vojsku rychtujucca za niekalki tydniaŭ. Aficery za płanavańniem hrafiku słužby, sałdaty sa zboram śviatočnaha stała, a nampalit za vyznačeńniem tych, chto budzie śviatkavać i kantralavać śviatkavańnie žaŭnieraŭ terminovaj słužby ŭ kazarmie.

Nie viedaju, jak dzie, ale ŭ nas na terminovaj słužbie ŭ v/č suviazi horada Barysaŭ śviatkavańnie adbyvałasia tak.

Padrychtoŭka ŭ žaŭnieraŭ raspačynajecca z atrymańnia śniežańskaha «hrašovaha zabieśpiačeńnia». Tyja niekalki dziasiatkaŭ tysiač, jakija sałdaty terminovaj słužby atrymlivajuć «zarobku» u miesiac, składajucca ŭ abščak navahodniaha stała. Hrošy sałdaty daviarajuć samym adkaznym ci tym, kaho pryznačać na zakup charčoŭ starejšyja pa słužbie. Za niekalki dzion da 31 śniežnia jany razam sa svaimi praparščykami-staršyniami vypraŭlajucca ŭ kramu pa zakupy. Ciahnuć adtul usio samaje standartnaje i prostaje da navahodniaha stała — ad harochu na sałaty da tortaŭ i mandarynaŭ. Vyrabić haračyja stravy dapamoža stałoŭka.

Śviata da nas idzie

Za niekalki dzion da Novaha hoda sa staršynskich kapciorak vyciahvajucca nabytyja dembielami jašče za savieckim časam jełačnyja cacki. Inšyja ŭpryhožvańni apieratyŭna vyrablajucca na miescy. Vycinanki i hirlandy — z makułatury. Pry vyrabie adnoj ź ich zapomniłasia «Płan-kanśpiekt praktyčnaha zaniatka — stralba pa nieruchomaj mišeni z pastavy ležačy». U vychodny 31 śniežnia, kab niečym zaniać žaŭnieraŭ, abjaŭlajecca ŭsieahulnaja pryborka ŭsiaho, što tolki možna ŭ vojsku prybirać. Śviata ad hetaha stanovicca realna bližejšym. U stałoŭku viečaram iduć tolki papić harbaty — rychtujuć straŭniki. Zrešty, kali ježy zakuplena dastatkova, paŭnavartasna pajeści ŭ stałoŭcy niekatorym ŭdajecca tolki 2 ci 3 studzienia.

Tyja, kaho pryzvali ŭletku i kamu słužyć paŭtara hoda, vymušany adśviatkavać u vojsku dva «novyja hady». Ad hetaha časam kryŭdujuć niekatoryja: «Joły-pały, a na hraždancy śviata, chłopcy tusujucca, a my tut…». Ale mienavita jany, sustreŭšy druhi Novy hod u vojsku, praź niekalki tydniaŭ «dembielnucca» i pojduć damoŭ, i ad hetaha śviata dla ich robicca jašče bolš śviatočnym. Zrešty, była ŭ biełaruskim vojsku praktyka, kali za asablivyja dasiahnieńni ci ŭ adpačynak žaŭniera mahli adpravić na Novy hod damoŭ. Ale praktyka apošnich hadoŭ, kali šmat chto ź ich u navahodniuju noč traplaŭ u pastarunak za chulihanku ci ałkahol, takoje ščaście admianiła. Dyscyplinarnuju statystyku kamandziram vajskovych častak psavać nie chočacca.

U čakańni himna

Čas da imhnieńnia Novaha hoda pačynaje ściskacca ŭžo ź viečara 31-ha. Z «leninak» vyciahvajucca stały i rastaŭlajucca ŭ kazarmach jak na viasiellach — litaraj «P», «H» ci «I». Usio zaležyć ad kolkaści stałoŭ i vajskovaj fantazii. Niechta adniekul vyciahvaje kaścium Dzieda Maroza — karotkaja emacyjnaja razradka. Śniahurkaj tut być abraźliva — kalektyŭ ža mužčynski. Prychodziać adkaznyja aficery, jany kantralujuć śviatkavańnie — takaja słužba. Sa stałoŭki padciahvajuć vyvarki varanaj bulby i smažanych kurej. Usie ŭ stanie mituślivaha nastroju čakańnia, a dla kahości — słužba. «Zasośniki» z sałdat i siaržantaŭ stajać u navahodniuju noč u naradach — heta tyja, chto ciaham hoda niejak praviniŭsia: spaźniŭsia, pryjšoŭ sa zvalnieńnia niećviarozy i hetak dalej. Takim tut nie zajzdrościać.

Paśla pavierki na płacy ŭsie padymajucca ŭ kazarmu, jakaja da ranicy zamykajecca — kab nikomu nie pažadałasia ŭciekčy ŭ samavołku na jalinu. U prybiralniu zaciahvajuć čuhunnuju śmietnicu — «kuryłka» ciapier tut. Płan śviatkavańnia: ježa i televizar — usio da 2-j hadziny nočy, potym adboj. Nie razhulaješsia.

Tradycyjna vinšavać vajskoŭcaŭ pryjazdžaje i kamandzir vajskovaj častki. Heta razumieješ, kali hučyć kamanda dziažurnaha «Stroicca!». Za hadzinu da Novaha hoda ŭ kazarmu ŭvachodzić užo čyrvonieńki pałkoŭnik. Dembieli, jakija bačyli minuły vajskovy Novy hod, trochi ździŭlajucca — niešta vielmi padobnaje vinšavańnie da letašniaha. Ale heta razumiejuć tolki jany, tamu i nie asabliva słuchajuć. Akramia standartnych pažadańniaŭ, druhi raz pralataje: «My — vajskoŭcy i mužyki, i hetym my adroźnivajemsia ad bab. Z Novym hodam!».

Usie ŭžo za stałom. Rassadžvajucca zhodna z terminami słužby. Kantralujuć usio za sałdackimi stałami dembieli, a najlepšyja prysmaki stajać kala ich. 6 kanałaŭ standartnaha telebačańnia zabaŭlajuć jak mohuć. Niechta telefanuje damoŭ — mabilnikaŭ u hety viečar nichto nie chavaje. Niejkija kancerty. Vystup Łukašenki, himn paśla jaho jak by ŭnieśli Novy hod u adnu sa šmatlikich kazarm biełaruskaha vojska. Bolšaść ravie himn prosta dla śmiechu — inšaha emacyjnaha vychadu tut niama i nie moža być. Chacia dembieli znojduć mahčymaść pranieści ałkahol i napicca ŭ hetu karotkuju noč. Krychu śmiešnych konkursaŭ na chutkasnaje pajadańnie tartoŭ i śmiatany — i para adboju. Novy hod, pad zbornyja pachi tytuniu, aliŭje, vilhaci, potu i sałdackich anučaŭ, pryjšoŭ i ŭ kazarmu. Chutka damoŭ…

Aficery i sałdaty, chłopcy chto ŭ vojsku ciapier, a jak u Vas prajšoŭ Novy hod i što vy chočacie pažadać svajoj krainie i kachanym?

• 0
• 0
• 0
• 0
• 0
• 0
• 0
• 0