Zakonaprajekty ab paharšeńni ŭmovaŭ hramadska-palityčnaj dziejnaści pryznany kanstytucyjnymi

Kanstytucyjny sud (KS) Biełarusi pryznaŭ zakonnymi papraŭki ŭ zakon ab masavych mierapryjemstvach i zakony, što rehulujuć hramadska-palityčnuju dziejnaść.

Jak paviedamlaje internet-sajt KS, adpaviednaje rašeńnie pryniata Kanstytucyjnym sudom 28 kastryčnika. Zakonaprajekty razhladalisia «ŭ paradku abaviazkovaha papiaredniaha kantrolu».

Pa vynikach razhladu jany pryznany adpaviednymi Kanstytucyi Respubliki Biełaruś. «Razam z tym Kanstytucyjnym sudom sfarmulavany pravavyja pazicyi, nakiravanyja na ŭdakładnieńnie kanstytucyjna-pravavoha sensu niekatorych norm hetych zakonaŭ», — havorycca ŭ paviedamleńni.

Nahadajem, zakonaprajekty, jakija robiać bolš žorstkimi praviły praviadzieńnia masavych mierapryjemstvaŭ, a taksama ŭmovy dla dziejnaści palityčnych partyj i hramadski arhanizacyj, byli pryniaty Pałataj pradstaŭnikoŭ 3 kastryčnika adrazu ŭ dvuch čytańniach na zakrytym dla ŚMI pasiadžeńni. Vierchniaja pałata parłamienta ŭchvaliła dakumienty 21 kastryčnika.

Pryniaćcie hetych dakumientaŭ vyklikała vialiki rezanans u hramadstvie. Lidary biełaruskich NDA i pravaabaroncy ŭ sumiesnaj zajavie zaklikali ŭłady admianić represiŭnyja zakonaprajekty.

Pavodle ich mierkavańnia, papraŭki ŭ zakon «Ab masavych mierapryjemstvach» «parušajuć pravy hramadzian na mirnyja schody, harantavanyja jak Kanstytucyjaj Biełarusi, tak i bazavymi normami mižnarodnaha prava, uvodziać administracyjnuju adkaznaść hramadzian za niavinnyja dziejańni i biaździejnaść».

Papraŭki ŭ zakony, jakija rehulujuć hramadska-palityčnuju dziejnaść, jak ličać lidary biełaruskich NDA i pravaabaroncy, «stvarajuć novyja padstavy dla kryminalnaha pieraśledu aktyvistaŭ hramadzianskaj supolnaści i ŭdzielnikaŭ mirnych masavych akcyj, parušajuć svabodu vykazvańniaŭ, schodaŭ i abjadnańniaŭ».

Na dumku pradstaŭnikoŭ apazicyi i pravaabaroncaŭ, nazvanyja zakanadaŭčyja akty «majuć jaŭna antypravavy charaktar, skiravany na praźmiernaje abmiežavańnie pravoŭ i svabod hramadzian». «Pryniaćcie takoha represiŭnaha zakanadaŭstva budzie aznačać lehalizacyju hvałtoŭnych mietadaŭ baraćby z palityčnymi apanientami, stvoryć u krainie atmaśfieru strachu, padšturchnie hramadstva da radykalizmu i zrobić niemahčymym kanstruktyŭny hramadski dyjałoh. Na inicyjataraŭ pryniaćcia hetych zakonaprajektaŭ, a taksama na ich raspracoŭščykaŭ — deputataŭ Pałaty pradstaŭnikoŭ i členaŭ Savieta Respubliki — kładziecca adkaznaść za takija nastupstvy nieabdumanaj zakanatvorčaj dziejnaści», — havorycca ŭ zajavie lidaraŭ biełaruskich NDA i pravaabaroncaŭ.

Nie ŭvodzić u dziejańnie novyja zakony aficyjny Minsk taksama zaklikali pradstaŭniki mižnarodnaj hramadskaści, u tym liku Jeŭrasajuz i ABSIE. Pavodle ich mierkavańnia, novaŭviadzieńni ŭ zakanadaŭstva jašče bolš abmiažujuć fundamientalnyja pravy na svabodu schodaŭ i asacyjacyj u Biełarusi.

• 0
• 0
• 0
• 0
• 0
• 0
• 0
• 0