Dźmitryj Us pačynaje kampaniju za źmienu Vybarčaha kodeksu

Dźmitryj Us — były kandydat u prezidenty — pačynaje kampaniju za pierahlad vybarčaha zakanadaŭstva. Jon ličyć, što biez hetaha zrabić budučyja vybary ŭ krainie prazrystymi i svabodnymi niemahčyma.

Dźmitryj Us siońnia paviedamiŭ, što źmieny ŭ Vybarčy kodeks užo padrychtavanyja.

Hałoŭnaja meta — zrabić prazrystym i kantralavanym padlik biuleteniaŭ.

«Kab kandydaty ŭ prezidenty i ich davieranyja asoby, a taksama kandydaty ŭ deputaty ŭsich roŭniaŭ atrymali prava pasyłać va ŭčastkovyja vybarčyja kamisii svaich pradstaŭnikoŭ z pravam być siabrami ŭčastkovych kamisij. Takim čynam u kamisijach źjaviacca niezaležnyja ludzi.

Jany buduć ličyć biuleteni i padpisvać ich z abodvuch bakoŭ. Tak budzie naładžany kantrol za padlikam hałasoŭ vybarcaŭ».

​​Dziejnaje zakanadaŭstva praduhledžvaje mahčymaść unosić źmieny ŭ Vybarčy kodeks — kanstatuje sakratar Centralnaj vybarčaj kamisii Mikałaj Łazavik:

«Dla taho, kab ažyćciavić zakanatvorčuju inicyjatyvu hramadzian, patrebna spačatku zarehistravać inicyjatyŭnuju hrupu i toje pytańnie, jakoje budzie vynosicca na razhlad parłamienta. Nu, a dalej inicyjatyŭnaja hrupa źbiraje podpisy hramadzianaŭ. I kali jana atrymaje nieabchodnuju padtrymku, to ŭnosić zakonaprajekt u parłamient.

A tam dakumient razhladajecca ŭ zvyčajnym paradku. I ŭ vyniku jon moža być albo pryniaty, albo adchileny».

Dźmitryj Us kaža, što jaho kamanda maje namier sabrać nie mieniej za 100 tysiač podpisaŭ dla taho, kab damahčysia źmieny vybarčaha zakanadaŭstva:

«Užo pa rehijonach pryznačanyja pradstaŭniki, jakija zojmucca spravaj u abłaściach i rajonach. Praktyčna ŭžo jość, ja dumaju, bolš za tysiaču čałaviek. Heta kamanda, jakaja źbirała podpisy, kali ja byŭ kandydatam u prezidenty. Jana zastałasia. I da jaje, ja miarkuju, padklučacca aktyvisty niekatorych inšych byłych kandydataŭ u prezidenty. A taksama ludzi, jakija nieabyjakavyja da losu svajoj krainy».

Miž tym 18 kastryčnika Alaksandr Łukašenka ŭžo abmiarkoŭvaŭ płany praviadzieńnia vybarčaj kampanii 2012 hoda ŭ Pałatu pradstaŭnikoŭ sa staršynioj CVK Lidzijaj Jarmošynaj.

I zajaviŭ pra niedapuščalnaść źmianieńnia vybarčaha zakanadaŭstva:

«Ja b nie staŭ razhladać varyjanty, jak ad nas siońnia niekatoryja patrabujuć, łomki vybarčaha zakanadaŭstva. Heta absalutna nieprymalna napiaredadni palityčnaj kampanii», — padkreśliŭ Łukašenka.

Darečy, u studzieni 2012 hoda zakančvajucca paŭnamoctvy ciapierašniaha składu Centralnaj vybarčaj kamisii. Zhodna z zakanadaŭstvam, da hetaj daty pavinny być nazvanyja proźviščy ŭsich 12 pastajannych siabraŭ kamisii novaha składu.

• 0
• 0
• 0
• 0
• 0
• 0
• 0
• 0