Viktar Hančarenka: Matčy z «Barsiełonaj» buduć samymi cikavymi ŭ majoj trenierskaj karjery
Hałoŭny trenier BATE prakamientavaŭ vyniki losavańnia Lihi čempijonaŭ.
Ab hetym paviedamiŭ hałoŭny trenier barysaŭskaha BATE ŭekspres-kamientaryi pres-słužbie kłuba paśla zakančeńnia losavańnia hrupavoha etapu lihi čempijonaŭ.
«Barsiełona» hulaje ŭ etałonny futboł, źjaŭlajecca paŭnamocnym uładalnikam trafieju, — adznačyŭ Hančarenka. — Mnohija treniery sprabujuć raskusić «Barsiełonu», ale tolki ličanyja mohuć štości joj supraćpastavić. Chutkaść pryniaćcia rašeńniaŭ, rabota ź miačom, vykanańnie — usio heta prysutničaje ŭ družyny z Katałonii na prosta kaśmičnym uzroŭni. I dla kamandy, i dla nas, trenierskaha štaba, heta budzie biascenny vopyt.
Pasprabujem zrabić toje, što nie zaŭsiody ŭdajecca navat «Reału», «Mančesteru» i inšym elitnym kłubam».
«Miłan», pavodle słoŭ Hančarenki, taksama ŭ rekamiendacyi nie maje patreby. «Budź što budzie. Za tyja paru chvilin, što čakali sapiernika z čaćviortaha košyka, užo paśpieŭ prakrucić u hałavie stadyjony, na jakich budziem vystupać, mocnyja i słabyja baki ŭ našych kankurentaŭ, jakuju rasstanoŭku jany vykarystoŭvajuć. Padspudna pačynaješ dumać, jak supraćstajać hrandam jeŭrapiejskaha futboła, kolki ačkoŭ možna nabrać u takoj hrupie. Na stadyjonie „Dynama“ my zdolnyja akazać surjozny cisk na luboha apanienta.
Udabavak dla kamandy važnaja ciapier inšaja meta — my jašče nie atrymlivali pieramoh u hrupavoj stadyi Lihi čempijonaŭ»,— zajaviŭ trenier BATE.
Hančarenka adznačyŭ, što chacieŭ by sustrecca z anhlijskim kłubam «Mančester Junajted». «Nieadnarazova havaryŭ, što chacieŭ by sustrecca mienavita z „MIU“, pakolki lublu hetuju kamandu. Ale niezdavalnieńnia ad losavańnia, naturalna, niama.
Vielmi pryjemna apynucca ŭ takoj kampanii, asabliva kali budzieš sustrakacca z macniejšymi kłubami Ispanii i Italii»,— skazaŭ jon. Čaćviortaj kamandaj hrupy N trenier BATE chacieŭ by bačyć dortmundskuju «Barusiju»: «Tam, jak i ŭ Barsiełonie ź Miłanam, vialiki stadyjon, zaŭsiody zapoŭnieny pad zaviazku.
Hulać pry aŭdytoryi ŭ 70 tysiač čałaviek — heta vielizarny vopyt».
«Hrupa Lihi čempijonaŭ mnie była cikavaja ŭ lubym spałučeńni, — adznačyŭ u intervju BiełaPAN napadajučy BATE Vital Radzivonaŭ. — Absalutna z usimi kamandami hulaŭ by z zadavalnieńniem. Na takim uzroŭni słabych sapiernikaŭ niama. U kožnaha možna čamuści pavučycca, tym bolš što ŭ nas buduć sustrečy z takimi hrandami, jak „Barsiełona“ i „Miłan“. Dy i „Viktoryja“ apošnim časam zadaje modu ŭ češskim futbole».
Futbalist nie zhadziŭsia ź mierkavańniem, što hrupa, u jakuju trapiŭ BATE, — heta «hrupa śmierci». «Treba prosta vychodzić i hulać.
Naša kamanda dasiahnuła takoha ŭzroŭniu, što moža hulać ź lubym sapiernikam»,— skazaŭ Radzivonaŭ.
Kamientary