Viciablanka zapłaciła maskoŭskamu ašukancu Br9 młn za «chalaŭnuju» Aŭdzi-A6,
paviedamiŭ karespandentu BIEŁTA prakuror Kastryčnickaha rajona Viciebska Uładzimir Šałuchin.
U traŭni hetaha hoda 28-hadovaj maładoj žančynie na mabilny telefon pryjšło paviedamleńnie pra pieramohu ŭ rekłamnaj akcyi kampanii «Welcom-Telecom». U jakaści ŭznaharody joj była abiacanaja novieńkaja Aŭdzi-A6. Žančyna patelefanavała pa kantaktnym telefonie, dzie joj paćvierdzili skazanaje i prapanavali aznajomicca z umovami akcyi na aficyjnym sajcie kampanii ŭ internecie. Infarmacyja, atrymanaja ŭ suśvietnaj pavucinie, pierakanała viciablanku ŭ realnaści niečakanaj udačy. Nie vieračy svajmu ščaściu, jana źviazałasia ź niejkim Ženiem, ukazanym u jakaści kantaktnaj asoby, i pacikaviłasia, jak zabrać pryz. «Ničoha składanaha», — zapeŭniŭ jaje na druhim kancy drotu pryjazny mužčyna, dadaŭšy, što joj tolki varta zapłacić 1% ad cany aŭtamabila za afarmleńnie dakumientaŭ, a astatnija pytańni pa dastaŭcy kampanija biare na siabie.
Sabraŭšy ŭsie svaje źbieražeńni, viciablanka pieraviała na pryvatnaje imia ŭ Maskvu Br2,2 młn.
Praź niekatory čas pradstaŭnik kampanii pieratelefanavaŭ, paviedamiŭ, što hrošy dajšli, aŭtamabil da adpraŭki rychtujecca, dy tolki, moža, dama žadaje atrymać svoj pryz najaŭnymi? Dama pahadziłasia. Za heta ŭ jaje paprasili jašče 1,5% cany mašyny ŭ jakaści dapłaty za bankaŭski pieravod. Prabiehšysia pa
siabrach-znajomych, pieramožca supiermiehaakcyi naskrebła nieabchodnuju sumu, ale ŭ valucie. Adnak «Ženia» prajaviŭ razumieńnie, pahadziŭšysia pryniać i dalary, i jeŭra. Zatym pajšli novyja raptoŭnyja zatrymki, abiacańni, ścipłyja prośby ab vypłacie hrošaj u suviazi z čarhovymi
fors-mažornymi abstavinami. Skončyłasia historyja tryvijalna: źniknieńniem sajta ŭ internecie i abarvanymi kantaktami ź miłym «Ženiem».
Na ŭśviedamleńnie siabie achviaraj ašukancaŭ žančynie spatrebiłasia niekalki miesiacaŭ i Br9 młn ahułam.
Ciapier pa jaje zajavie adździełam unutranych spravaŭ Kastryčnickaha rajona Viciebska viadziecca pravierka, vyrašajecca pytańnie pra raspačynańnie kryminalnaj spravy pa art.212 Kryminalnaha kodeksa Biełarusi (Kradziež šlacham vykarystańnia kamputarnaj techniki).
Charakterna, što 18 lipienia ŭ AUS Kastryčnickaha rajona pastupiła anałahičnaja zajava ad 51-hadovaj žycharki abłasnoha centra. Za maru pra aŭtamabil čarhovaja «pieramožca» hetaj ža akcyi zapłaciła 59 tys. rasijskich rubloŭ, dadaŭ Uładzimir Šałuchin.
Kamientary