Praces Sańnikava. Dzień piaty

Siońnia buduć zasłuchanyja pakazańni śviedkaŭ z boku abvinavačvańnia. Pałova ź ich užo śviedčyli na pracesach nad Mikitam Lichavidam i Arciomam Breusam i Ivanam Haponavym. U zale raźmieščany videamanitor.

17.20

U vyniku sudździa spyniła prahlad videabłohaŭ Ramančuka z ajfonu Mirzajanava. Dalej sud pačaŭ vyvučać ličbavyja materyjały pasudnaha Hniedčyka, u jakich jość klučavyja słovy «Łukašenka», dyktatura i inšyja...

17.05

Prahladajecca videa z ajfonu Mirzajanava — pieradvybarčy vystup Ramančuka. «U čym tut kryminał?» — aburajecca mama Mirzajanava. Tym nia mieniej sud prahladvaje treci videabłoh Ramančuka z ajfonu Mirzajanava. Pamočnik sudździ pytajecca, ci pakazvać fatahrafii asabistaha charaktaru. Sudździa kaža: davajcie hladzieć usio, što jość na dysku.

16.50

Sud vyrašyŭ pierajści da vyvučeńnia piśmovych materyjałaŭ spravy i ahladu videadyskaŭ. Pieršym vyvučajucca kantakty, sms-paviedamleńni, videamateryjały z ajfonu Fiodara Mirzajanava. Prakuror začytvaje sms, jakija Fiodar pasyłaŭ i atrymlivaŭ padčas Płoščy, nazyvaje navat smajliki. Ahučvaje, jakija zvanki byli zroblenyja, atrymanyja i prapuščanyja.

16.45

Vyśvietliłasia, što śviedka Bahdanovič adkryŭ balničny list 4 traŭnia. Advakaty nastojvajuć na paŭtornym vykliku Bahdanoviča, bo jon śviedčyć suprać Sańnikava, Chalip, Statkieviča, Vusa i inšych, nibyta tyja šturchali supracoŭnikaŭ milicyi na prajeznuju častku. Sudździa admoviła ŭ chadajnictvie. U zale aburanyja.

16.30

Usie śviedki na siońnia dapytanyja. Śviedka-milicyjant Paviadajka i student, siabra BCHD Bahdanovič nie pryjšli na pasiedžańnie, bo pieršy znachodzicca ŭ kamandziroŭcy, a druhi zachvareŭ. Sudździa vyrašyła, što ich niajaŭka maje pavažlivyja pryčyny i vyrašyła abmiežavacca ich pakazańniami, dadzienymi na papiarednim śledztvie, choć advakaty byli suprać. Paviadajka asabista zatrymlivaŭ Vasileviča, a Bahdanovič śviedčyŭ, što Sańnikaŭ nibyta šturchaŭ milicyjantaŭ 19 śniežnia. U zale aburanyja, kažuć, što hetym milicyjanty ŭnikajuć adkazaŭ na pytańni (pavodle Radyjo Svaboda).

16:10

Śviedka Kijenia zaznačyŭ, što nijakich pahroz, zaklikaŭ da ahresii i hvałtu jon nia čuŭ, mancirovak i pałak u rukach demanstrantaŭ nia bačyŭ, jak i padazronych butelek. Śviedka kaža, što nia bačyŭ, kab demanstranty užyvali siłu suprać milicyi.

15:45

Śviedka Kijenia kaža, što pamiataje toje, jak milicyja papiaredžvała demanstrantaŭ, što ich akcyja niezakonnaja i ŭ vypadku niepadparadkavańnia da ich budzie prymienienaja «hrubaja fizičnaja siła». «Demanstranty chacieli vieści pieramovy z uradam» (pavodle Radyjo Svaboda).

15.40

Śviedka Kijenia: «Na Kastryčnickaj płoščy była masa narodu, byŭ zality katok i hučnaja muzyka. kandydataŭ čutno nie było, ich pierabivała muzyka. Tolki ŭryŭki było čuvać. Z nahody vynikaŭ vybaraŭ havaryli pra niejki niezaležny ekzit-poł. Vioŭ repartaž pa telefonie, tamu analizavać padziei času nie było. Mnie zapomniłasia, što vychad ludziej na praśpiekt adbyŭsia stychijna, spantanna, u adzinym paryvie».

15.30

Nastupny śviedka Siarhiej Kijenia, supracoŭnik infarmacyjnaha ahienctva Interfaks. Śviedka kaža, što 19 śniežnia byŭ na Kastryčnickaj płoščy i Płoščy Niezaležnaści jak žurnalist, aśviatlaŭ dziejnaść pravaachoŭnych orhanaŭ.

15.15

Nastupny śviedka — Vasil Martos, kiroŭca 5-ha aŭtobusnaha parku Minska. Kiroŭca raspavioŭ, što 19 śniežnia jon pracavaŭ u druhuju źmienu na maršrucie numar 1, i z 21-j hadziny byli ciažkaści dla ruchu i byli vymušanyja źmieny maršrutu, pakolki išła demanstracyja pa prajeznaj častcy. «Ja zrazumieŭ, što naŭprost da vakzału nie dajedu i źmianiŭ maršrut». Ź milicejskaj mašyny, jakaja išła za demanstrantami, zaklikaŭ razyścisia kiroŭca nie čuŭ. Śviedka pryznaŭ, što moh by prajechać i pa svaim maršrucie, ale nie ŭkłaŭsia b u hrafik, za što moh by pazbavicca premijalnych. Pasažyry nie vykazvali svajo niezdavalnieńnie, pryznaŭ śviedka. Jon zaznačyŭ, što na jahonym maršrucie časta jeździać kartežy Łukašenki i ŭ jaho isnujuć schiemy abjezdu.

15.05

Śviedka Andrej Pratapiej z Absalutbanka. Abmienny punkt hetaha banka byŭ začynieny 19 śniežnia dačasna, pra niejkija straty ad demanstracyi śviedka skazać nie zmoh.

Sudździa pytajecca, ci pamiatajecie vy pakazańni na papiarednim śledstvie?

Śviedka: Mianie nie dapytvali. Paśla taho, jak śviedku pakazali pratakoł, to jon uzhadaŭ, što da jaho pryjaždžaŭ śledčy. Hety śledčy jamu i patłumačyŭ, što pryčyna daterminovaha zakryćcia universamu «Centralny», dzie znachodzicca abmienny punkt ich banka, 19-ha śniežnia — masavyja biesparadki.

(pavodle Radyjo Svaboda)

14.34

Praciahvajecca dopyt śviedki Makajeva. Jon nie bačyŭ u rukach demanstrantaŭ nijakaj zbroi, armatury, ledarubaŭ. Nie čuŭ zaklikaŭ da hvałtu.

14.00

Praces adnaviŭsia. U sud źjaviŭsia tolki adzin śviedka. Heta pradprymalnik Alaksandr Makajeŭ. Adkazvaje na pytańni sudździ pa-biełarusku. Raskazvaje, jak išoŭ z Kastryčnickaj da Niezaležaści. Na pytańnie prakurora pra toje, adkul śviedka daviedaŭsia pra akcyju, Makajeŭ pačaŭ kazać pra adsutnaść vybaraŭ u krainie. Sudździa zrabiła na heta zaŭvahu, nastojliva pariŭšy adkazvać tolki na pastaŭlenyja pytańni. Tym nie mienš, pradprymalnik jašče kolki razoŭ nahadaŭ pra vybary.

Makajeŭ kaža pra spantanaść dziejańniaŭ demanstrantaŭ. Śćviardžaje, što nie čuŭ kankretnych proźviščaŭ čynoŭnikaŭ, ź jakimi mieli vieścisia pieramovy.

Kaža, što na hanku Doma ŭrada było bolš žurnalistaŭ i milicejskich kiraŭnikoŭ, čym mitynhoŭcaŭ.

Makajeŭ, jak davieranaja asoba kandydata ŭ prezidenty Mikoły Statkieviča, śćviardžaje, što viedaŭ pra peŭnyja scenary akcyi 19-ha. «Heta musiła być vyklučna mirnaja akcyja suprać falsifikacyi vybaraŭ».

Pradprymalnik pryhadaŭ, što na Kastryčnickaj była vielmi hučnaja muzyka, jakaja zaminała vystupoŭcam.

Raskazvaje pra vialikuju kancentracyju siłavikoŭ u rajonie pravdzieńnia apazicyjnaj akcyi. «Faktyčna, heta była vajskovaja apieracyja».

Makajeŭ kaža, što asabista nie čuŭ zaklikaŭ vychodzić na prajeznuju častku. Pryhadvaje, što pieršapačatkova ludzi nie viedali, kudy rušyć. U natoŭpie čulisia roznyja prapanovy, u tym liku iści da Administracyi prezidenta. Nie pryhadvaje, dzie ŭ časie ruchu pa praśpiekcie znachodzilisia lidary apazicyi.

13.15

Abvieščany pierapynak da 14.00.

12.53

Čakajecca prahlad čarhovaha rolika z udziełam Mirzajanava i Vasileviča kala raźbitych dźviarej Doma ŭrada paśla sutyčki ź milicyjaj. Čujucca kryki «Svaje, svaje!».

Vasilevič śćviardžaje, što nie akazvaŭ supracivu milicyjantam, a tolki «ŭchilaŭsia ad udaraŭ dubinak». Kaža, što bačyŭ, jak śpiecnaz źbivaŭ ludziej. Mirzajanaŭ acharaktaryzavaŭ dziejańni milicyi jak «žorstkaje i biessensoŭnaje źbićcio hramadzian», jakija nie «ŭjaŭlali nijakaj niebiaśpieki». Mirzajanaŭ nie zhodny z farmuloŭkami «siłavy kantakt» ci «sutyknieńnie». Pa jaho słovach, milicyjanty źbivali ludziej dziela ŭłasnaha zadavalnieńnia, bo heta, na jaho dumku, «u ich u kryvi».

Krytyčnyja słovy na adras milicyi raźviesialili «studenckuju» halorku. Mirzajan kaža, što ŭ ludziej nie było ŭ rukach ničoha akramia ściahaŭ.

Advakat Varvaševič źviarnuŭ uvahu, što rolik zmantavany ź niekalkich frahmientaŭ, a tamu, na jaho dumku, rolik nie varta dałučać da spravy. Jon adznačyŭ niekalki momantaŭ: voś ludzi stajać tvar da tvaru z šeraham śpiecnazaŭcaŭ, a potym milicyjanty bjuć demanstrantaŭ, ale nichto pry hetym nie akazvaje supraciŭleńnia. Zaklikaŭ razyścisia z boku milicyjantaŭ nie čutno.

12.43

Čarhovy rolik. Na im bačna, jak byŭ stvorany žyvy kalidor u nakirunku Doma ŭrada. Čutnyja zakliki nie razychodzicca, tamu što lidary apazicyi, prysutnyja na płoščy, źbirajucca iści na pieramovy z uradam. Vasilevič kaža što nie pamiataje zaklikaŭ iści na pieramovy. Pa jaho słovach, ačapleńnie było stvoranaje, kab adfiltravać pravakataraŭ. Hetyja słovy paćvierdziŭ Mirzajanaŭ. Jon kaža, što ŭ natoŭpie prysutničali ludzi z paŭpustymi plaškami śpirtnoha, jakija čaplalisia da demanstrantaŭ. Mirzajanaŭ nastojvaje na tym, što vokny raźbili nie demanstranty.

Advakty adznačyli, što i na hetym roliku niama jakich-niebudź hvałtoŭnych dziejańniaŭ z boku ŭdzielnikaŭ akcyi pratestu, a taksama padazronych pradmietaŭ na ziamli.

12.38

Advakaty Sańnikava Varvaševič i Kavaleŭskaja ŭnieśli tłumačeńni nakont taho, što kandydata na videa niama. Taksama ŭkazali na toje, što charaktar dziejańniaŭ ludziej na videa pieravažna mirny. Była zroblenaja istotnaja zaŭvaha pra toje, što na videa bačna, što na prylehłym da hanka Doma ŭrada ŭčastku nie bačna nijakich padazronych pradmietaŭ: mancirovak, armatury, pałak, butelek.

12.22

Prakuror raspytaje Vasileviča, jaki na videa nanosiŭ udary pa dźviarach uradavaha budynka. Mirzajanaŭ zrabiŭ zaŭvahu, što navat na videa bačna, što jon nie moh bačyć dziejańni Vasileviča. Vasilevič kaža, što vokny nie biŭ, a tolki źbiŭ askiepak škła ŭ vierchniaj častcy dźviarnoha prajoma. Kaža, što zrabiŭ heta, kab likvidavać niebiaśpieku dla inšych demanstrantaŭ.

12.10

Pačynajecca prahlad videazdymak padziej 19 śniežnia kala Doma ŭrada, u jakich udzielničali Illa Vasilevič i Fiodar Mirzajanaŭ. Prysutnym u zale ničoha nie bačna, tamu što manitor paviarnuli ŭ bok abvinavačanych, advakataŭ i sudździ.

Abvinavačanyja hladziać frahmient stojačy, tvary zasiarodžanyja.

11.55

Začytvajucca pakazańni Aleha Hniedčyka nakont padziej 19 śniežnia, zroblenyja ŭ časie śledstva. Ź ich vynikaje, što Hniedčyk razam ź inšymi pryjšoŭ na płošču Niezaležnaści z Kastryčnickaj. Nibyta ŭ peŭny momant pačuŭ kryk «Idziom na Dom!», a zatym pačuŭ zvon raźbitaha škła. Hniedčyk zajaviŭ u svaich pakazańniach, što pieršapačatkova padumaŭ, što bićciom voknaŭ kiravaŭ kandydat Rymašeŭski, bo stajaŭ pobač z uvachodam. Sam kinuŭsia da ŭvachodu, «nanios nie mienš za 9 udaraŭ» pa stale, jaki zakryvaŭ uvachod u budynak. Potym pačuŭ zakliki Rymašeŭskaha paźbiahać pravakacyj i razam ź jaho achoŭnikam pačali adciahvać ludziej, jakija bili vokny. U pakazańniach Hniedčyka havorycca, što jon bačyŭ ludziej z vudami, ledarubami.

Siońnia Hniedčyk admaŭlajecca ad słovaŭ pra Rymašeŭskaha, spasyłajučysia na cisk u časie śledstva. Jon nastojvaje na tym, što zaklikaŭ da pahromaŭ nie było, a tolki zakliki iści na pieramovy.

11.36

Sud raspačaŭ razhlad 8 toma spravy. Abvinavaŭca ahučvaje dakumienty, dałučanyja da sprvy: pastanova ab zatrymańni kandydata ŭ prezidenty Andreja Sańnikava, pratakoł zatrymańnia, pašpart kandydata, kopija paśviedčańnia ab šlubie ź Irynaj Chalip, kopija paśviedčańnia ab naradžeńni syna Sańnikava i Chalip.

Sudździa ahučvaje pratakoły vočnych stavak pamiž padazravanym Hniedčykam i śviedkami Fabišeŭskim i Jałavikom. Sprava datyčyć pieradvybarčaj kampanii. Hniedčyk admaŭlajecca ad pakazańniaŭ, matyvujučy heta tym, što heta nie datyčyć spravy ab masavych biesparadkach. Jon kaža, što nie pamiataje niekatoryja detali spravy, tamu što ŭ časie śledstva jaho dapytvali pa 8-10 hadzin, akramia taho prajšło dastatkova šmat času.

11.11

Rešta śviedkaŭ, 6 čałaviek, buduć dapytanyja ŭ 14.00. Sud pierachodzić da vyvučeńnia 7 toma spravy.

11.02

Nastupny śviedka — Pavieł Hajduk, pradstaŭlaje zamiežnaje pradpryjemstva«BiełJeŭrasietka». Jon raskazvaje pra asablivaści pracy adnaho z handlovych abjektaŭ va ŭniviersamie «Centralny» (pr. Niezaležnaści, 23). Jon kaža, što krama začyniłasia razam z univiersamam na hadzinu raniej. Vykazaŭ ułasnuju zdahadku, što zrabili heta ŭ suviazi z demanstracyjaj. Jon kaža, što ŭ vyniku hetaha nie była nijakaj materyjalnaj škody nie było naniesiena. Jon zaśviedčyŭ, što nie było i ŭpuščanaj vyhady ad zakryćcia kramy. Jamu ničoha nie viadoma pra jakija-niebudź fakty supraćpraŭnych dziejańniaŭ demanstrantaŭ u dačynieńni da handlovaha abjekta.

10.42

Vystupaje śviedka ad Minskaha mietrapalitena, hałoŭny revizor pa biaśpiecy ruchu, Aleh Hłoŭ. Jon nie znajomy z abvinavačanymi, 19 śniežnia na pracy nie byŭ.

Jon kaža, što stancyja mietro «Kastryčnickaja» 19 śniežnia była začynienaja ŭ 19.58, «Kupałaŭskaja» — z 20.02. Pryčyna — vialikaje skapleńnie ludziej u rajonie vyšejzhadanych stancyj. Jon kaža, što naŭprostavaj škody demanstranty nie nanieśli stancyjam, škodu možna aceńvać tolki za prastoj. Rašeńnie pra zakryćcio prymała milicyja.

Śviedka ničoha nie viedaje pra sproby demanstrantaŭ nanieści škodu stancyjam mietro. Jon kaža, što zakryćcio stancyj źjaŭlajecca stałaj praktykaj u časie masavych mieraprymstvaŭ. Jon nie zmoh patłumačyć, čamu stancyi nie pracavali da poźniaj nočy, navat paśla taho, jak ludziej na vulicach nie zastałosia. Jon paćvierdziŭ, što na płoščy Niezaležnaści mietro ŭ toj viečar pracavała ŭ zvyčajnym režymie. Bo tam «nie składvałasia takaja niebiaśpiečnaja situacyja», jak na «Kastryčnickaj» i «Kupałaŭskaj».

10.25

Sudździa pastanaviła začytać pakazańni śviedki Alaksandrava, dadzienyja ŭ časie papiaredniaha śledstva, bo zaŭvažyła supiarečnaści ŭ tych pakazańniach i siońniašnich śviedčańniach u sudzie.

Začytvajucca papiarednija pakazańni.

Ź ich vynikaje, što pałac byŭ začynieny, a mierapryjemstvy admienienyja z-za padziejaŭ na płoščy. A kankretna z-za «ahresiŭnych dziejańniaŭ natoŭpu».

Dziejańni natoŭpu acanili ŭ 2,5 młn rubloŭ.

Śviedka nastojvaje na tym, što niasie adkaznaść tolki za svaje śviedčańni. Siońnia śviedka kaža, što nie moža kazać pra ahresiju. Jon čuŭ tolki hučnyja vykryki z boku centralnaha ŭvachodu, ale jon nie čuŭ, što kankretna vykrykvali. Na pytańnie advakataŭ, ci čuŭ jon raniej hučnyja vykryki (u časie navahodnich śviatkavańniaŭ, haradskich mierapryjemstvaŭ), adkazaŭ, što takoha nie byvaje. Kaža, što akcyja 19-a była vyklučnaj padziejaj. Tamu i źviarnuła ŭvahu jaho i jaho kalehaŭ.

Na prystupkach u časie akcyi śviedka nie byŭ.

10.05

Fiodara Mirzajanava budzie baranić advakat Novik, advakat Halijeŭ zaniaty na inšym pracesie.

Načalnik słužby biaśpieki Pałaca prafsajuzaŭ Andrej Alaksandraŭ raskazaŭ, što 19-ha byŭ na pracoŭnym miescy. Kaža, što pryblizna ŭ 20.00 atrymaŭ zadańnie zamknuć centralny ŭvachod. Pa jaho słovach, heta było zroblena zhodna raspracavanaha raniej płana. Paśla niekalkich pytańniaŭ abvinavaŭcy patłumačyŭ, što ŭsio ž pryčynaj zakryćcia ŭvachodu staŭ natoŭp mitynhoŭcaŭ. Pry hetym jon adznačyŭ, što dostup naviednikam pałaca mitynhoŭcy nie pierakryvali. Tym bolš, što na toj momant usie zapłanavanyja ŭ pamiaškańniach ustanovy mierapryjemstvy skončylisia.

Śviedka Alaksandraŭ nie zmoh samastojna patłumačyć sudu, jakim čynam vyličvaŭsia pamier materyjalnaj škody, nibyta naniesieny pałacu ŭ vyniku akcyi na Kastryčnickaj. Jon zajaviŭ, što heta nie ŭ jaho kampietencyi.

Abvinavačanyja nie vykazali pytańniaŭ da śviedki. Na pytańnie advakata, ci sprabavaŭ chtości z demanstrantaŭ patrapić u siaredzinu pałaca, adkazaŭ, što nie viedaje takich faktaŭ.

Śviedka nie zmoh adkazać, ci paŭpłyvała akcyja na Kastryčnickaj na pracu ŭstanovaŭ, što arandujuć płošču ŭ pałacy. Jon raskazaŭ, što šerah mierapryjemstvaŭ (hurtki, kursy), zapłanavanych na 19-je, pryblizna za tydzień byli pieraniesienyja na inšyja daty zhodna rasparadžeńnia kiraŭnictva pałaca.Jon patłumačyŭ, što častkova heta było źviazana z praviadzieńniem vybaraŭ u toj dzień.

Jon zajaviŭ, što nie viedaje nijakich faktaŭ pieraškody pracy pałaca z boku demanstrantaŭ.

• 0
• 0
• 0
• 0
• 0
• 0
• 0
• 0