Kazulin schudnieŭ da 64 kilahramaŭ

49-ty dzień praciahvajecca palityčnaja haładoŭka byłoha kandydata ŭ prezydenty Alaksandra Kazulina. Svajaki j siabry palityka spadziajucca, što palityčnyja padziei apošniaha času paŭpłyvajuć na jaho j jon spynić haładoŭku.

Kiraŭniki administracyi viciebskaj kalonii, dzie trymajuć Alaksandra Kazulina, nie adkazvajuć na bolšaść telefonnych zvankoŭ – akramia zvankoŭ z chatniaha telefonu Kazulinych. Tolki hetak u druhoj pałovie dnia žoncy palityka Irynie ŭdałosia atrymać źviestki pra stan zdaroŭja jaje muža na 49-ty dzień haładoŭki. Iryna Kazulina raspaviała:

(Kazulina:) «Skazali, što ŭsio, jak i ŭčora. Vaha 64 kilahramy. Pra cisk nie skazali ničoha. Jon praciahvaje špacyry na vulicy, jašče chodzić. Budziem spadziavacca, što Boh jamu dapamoža».

Haładoŭku Alaksandar Kazulin pačynaŭ, kali važyŭ 91 kilahram. Takim čynam, palityk zhubiŭ užo 27 kilahramaŭ. Pavodle niekatorych daktaroŭ, dla čałavieka padobnaj kamplekcyi heta krytyčnaja masa, paśla jakoj u arhaniźmie pačynajucca niezvarotnyja pracesy. Toje, što z kožnym dniom zdaroŭje Kazulina horšaje, pryznajuć i turemnyja daktary.

U kancy dnia Iryna Kazulina źbirajecca nakiravać mužu telehramu, u jakoj painfarmuje pra toje, što zroblena dziela vykanańnia jahonych patrabavańniaŭ. Iryna spadziajecca, što telehrama paŭpłyvaje na rašeńnie spynić haładoŭku. Žančyna źbirajecca paviedamić pra zvarot lideraŭ apazycyi da prezydentaŭ ZŠA, Rasiei, Francyi j Niamieččyny, a taksama pra ichny zvarot u AAN z prośbaj razhledzieć prablemu parušeńnia pravoŭ čałavieka ŭ Biełarusi.

Iryna Kazulina paviedamiła «Svabodzie», što da kanca dnia čakaje padpisańnia liderami apazycyi lista da premjera Siarhieja Sidorskaha. Taki list da kiraŭnika ŭradu jość adnym z patrabavańniaŭ spadara Kazulina, i jahonaje źjaŭleńnie taksama moža pierakanać palityka skončyć akcyju.

Adnak siabar Kazulina były deputat Siarhiej Skrabiec nie pierakanany, što hetaha chopić, kab Alaksandar Kazulin spyniŭ haładoŭku.

(Skrabiec:) «Kaniečnie, heta akazvaje svoj upłyŭ na rašeńnie Kazulina – vychodzić ci nie vychodzić z haładoŭki. Ale pakul niama rašeńnia ambasadaraŭ krainaŭ Eŭraźviazu padtrymać patrabavańni Kazulina. My čakajem – moža, niešta jašče adbudziecca».

Sam Siarhiej Skrabiec jašče na minułym tydni zaklikaŭ Alaksandra Kazulina spynić haładoŭku. Z takim prośbami da palityka źviartajecca ŭsio bolš ludziej. Zaklik spynić haładoŭku dasłała z Kanady na imia Alaksandra Kazulina staršynia Rady BNR Ivonka Surviła.

Nahadajem, Alaksandar Kazulin byŭ asudžany na piać z pałovaj hadoŭ źniavoleńnia za chulihanstva j arhanizacyju vuličnych biesparadkaŭ 25 sakavika. Palityk svajoj viny nie pryznaje i vinavacić biełaruskija ŭłady ŭ pieraśledzie jaho z palityčnych pryčynaŭ.

• 0
• 0
• 0
• 0
• 0
• 0
• 0
• 0