Jak dapamahčy Biełarusi z zamiežža?

Nie zastavajciesia ŭbaku ad biełaruskich padziej, navat kali nie žyviacie ŭ Biełarusi. Piša Alaksandar Čajčyc ź Londana.

Napeŭna nie ja adzin pieražyŭ u apošni miesiac hetyja supiarečlivyja pačućci. Mnie daviałosia być udzielnikam demanstracyjaŭ paśla vybaraŭ u 2006 hodzie, ale ŭ 2010 h. daviałosia sačyć za raźvićciom padziejaŭ praź internet na mabilniku. Prosta raniej ja pracavaŭ u Maskvie, a ciapier — U Londanie, i ciapier nia maju mahčymaści sieści na načny ciahnik i nastupnaj ranicaj pračnucca ŭ Biełarusi. I takich nas, niešmatlikich nieabyjakavych biełarusaŭ u zamiežžy, mnoha.

Z adnaho boku, pradbaču biazhłuzdyja zakidy: «Vy tam siedzicio ŭ svaim zamiežžy, dyk rassłabciesia i nie vučycie nas žyć» abo «Lohka vam tam pikiecikami stajać, kali nie pahražaje atrymać 10 sutak».

Z druhoha boku,

žyvučy ŭ demakratyčnaj krainie, hrech nie karystacca lehalnymi mahčymaściami vykazvać svaju pazycyju, jakich pazbaŭlenyja ludzi ŭ Biełarusi: tyja ž demanstracyi, zvaroty, zakliki.

Spantanny pikiet adbyŭsia ŭ nas u Londanie samoha 19 śniežnia. Potym Zhurtavańnie Biełarusaŭ u Vialikaj Brytanii padrychtavała i dasłała ŭ dziaržaŭnyja orhany padrabiazny memarandum ab sytuacyi ŭ Biełarusi. Aŭtar hetych radkoŭ u svaju čarhu taksama napisaŭ dva listy: adzin — deputatu brytanskaha parlamentu i adzin — brytanskamu deputatu Eŭraparlamentu, ad čyjho ofisa navat atrymaŭ adkaz: «Doktar Tennak rasčaravany, bo niadaŭna sustrakaŭsia z ambasadaram Biełarusi ŭ Vialikaj Brytanii, jaki zapeŭnivaŭ jaho, što vybary buduć svabodnyja i spraviadlivyja i što jany buduć takimi pryznanyja ABSE, čaho, na žal, nia zdaryłasia».

Jašče adzin pikiet pierad ambasadaj RB planujem na 16 studzienia, na Dzień biełaruskaj salidarnaści. Prosta toje, što adbyvajecca ŭ Biełarusi ŭžo nie pieršy hod pry kiravańni A. Łukašenki i što abvastryłasia paśla vybaraŭ u śniežni 2010 h. — heta całkam nieprymalna, nieprystojna i lezie ni ŭ jakija ramki. Prosta kryŭdna, što Biełaruś pieratvaryłasia ŭ złobny Mordor pasiarod samaha demakratyčnaha i zamožnaha kantynentu na planecie. Prosta mnohim chaciełasia b tudy ŭsio ž jašče viarnucca žyć.

Svaje zajavy zrabiła Rada BNR i biełaruskija demakratyčnyja hrupy ŭ zamiežžy. Pryśviečanaja salidarnaści biełaruskaj dyjaspary supołka, na jakoj peryjadyčna źjaŭlajucca zvaroty na ekzatyčnych eŭrapiejskich movach, stvorana ŭ Facebook.

Kali chtoś z šanoŭnych čytačoŭ pražyvaje ŭ zamiežžy, zaklikaju dałučacca da supolnych našych dziejańniaŭ.

Zvaroty ŭ aficyjnyja instancyi — heta karysnaja reč, navat kali jana nia maje intryhoŭnaści i filihrannaj zabaŭnaści jurydyčnaha trolinhu pa metadzie Alaksieja Navalnaha.

Navat kali ŭłada krainy, dzie pražyvajecie, i tak aktyŭna reahuje na biełaruskija padziei (jak ZŠA, Polšča ci Litoŭskaja Respublika), usio roŭna

znajdzicie paŭhadziny i składzicie elektronny list z prapanovaj ci padziakaj i sa śviedčańniem taho, što vy sočycie za padziejami ŭ Biełarusi i za reakcyjaj dziaržavy svajho pražyvańnia na hetyja padziei. Jak padatkapłatnik i zakonapasłuchmiany rezydent (chaj navat i nie hramadzianin), vy majecie prava patrabavać ad uładaŭ, kab jany abaraniali i vašyja intaresy.

Biełaruskaja dyjaspara maje niejkija, choć i abmiežavanyja, hrašovyja, łabisckija i intelektualnyja resursy. Parajcie, jak by jašče nam ich lepš vykarystać dla demakratyi ŭ Biełarusi.

Ad Redaktara. Dziakuj spadaru Čajčycu za jahonyja dopisy i za jahonuju dziejnaść. A ja karystajusia nahodaj, kab nahadać svaju banalnaść: achviarujcie dziesiacinu ci tryccacinu svaich prybytkaŭ na nacyjanalnuju kulturnuju spravu. Na carkvu, na hazety, na stvareńnie filmaŭ i muzyki. Biaz hetaha — nijak.

• 0
• 0
• 0
• 0
• 0
• 0
• 0
• 0