Advakat: Sańnikaŭ «ujaŭlaje saboj žudasnaje vidovišča»

Kandydat u prezidenty Biełarusi Andrej Sańnikaŭ mocna źbity i «ŭjaŭlaje saboj žudasnaje vidovišča». Pra heta paviedamiŭ advakat palityka Pavieł Sapiełka.

Advakat sustrakaŭsia sa svaim padabaronnym viečaram 20 śniežnia. Pavodle słoŭ Sapiełki, Sańnikaŭ, źbity padčas akcyi ŭ Minsku 19 śniežnia, «praktyčna nie moža chadzić». «Naha ŭ jaho ci mocna vyciataja, ci vyvichnutaja. Jamu tam navat nie pastavili dyjahnaz, choć u mianie skłałasia ŭražańnie, što jana moža być i złamanaja.

Akramia hetaha, jaho bili pa hałavie, tamu addalenyja nastupstvy adčuvajucca. Traŭmavanyja ŭ jaho i ruki — na ich hiematomy», — skazaŭ advakat.

Jon paviedamiŭ, što padčas dopytu Sańnikavym zajaŭlena chadajnictva «pra nakiravańnie na miedycynski ahlad na pradmiet ustanaŭleńnia stupieni ciažkaści cialesnych paškodžańniaŭ». «Pa vynikach hetaha ahladu my budziem, napeŭna, padavać skarhu ŭ prakuraturu dla taho, kab pryciahnuć da adkaznaści tych asob, jakija absalutna niematyvavana prymianili siłu ŭ dačynieńni da Sańnikava.

Pavodle maich ujaŭleńniaŭ pra zakonnaść, jaho pavinny byli adpravić na ahlad nieadkładna», — padkreśliŭ Sapiełka.

Advakat nie zmoh skazać, kali ŭ nastupny raz zmoža sustrecca sa svaim padabaronnym. «Sprava ŭ tym, što ciapier vielmi šmat zatrymanych u KDB, a izalatar kamiteta maje abmiežavanyja mahčymaści pa adnačasovym pryjomie naviedvalnikaŭ. Čakaju, kali budzie nastupnaje śledčaje dziejańnie z udziełam Andreja Alehaviča, tady ja jaho ŭbaču», — rastłumačyŭ Sapiełka.

«Pa stałaj praktycy pravaachoŭnych orhanaŭ, kab pazbavić mianie mahčymaści infarmavać hramadskaść pra stan spraŭ, ź mianie pa dobraj tradycyi ŭziataja padpiska ab nievydavańni danych papiaredniaha rasśledavańnia», — paviedamiŭ advakat. «Ale heta nie pieraškadžaje mnie zajavić ab tym, što

Andrej Alehavič absalutna nievinavaty i padazreńni, vystaŭlenyja ŭ dačynieńni da jaho, absalutna nie majuć pad saboj padstaŭ. Usie padziei padčas masavaha mierapryjemstva my, bok abarony, ličym jaŭnaj pravakacyjaj»,

— padkreśliŭ Pavieł Sapiełka.

Varta adznačyć, što dahetul nieviadoma pra stan zdaroŭja jašče adnaho kandydata ŭ prezidenty — Uładzimira Niaklajeva. Jon taksama byŭ žorstka źbity śpiecnazaŭcami padčas akcyi 19 śniežnia i dastaŭleny ŭ balnicu chutkaj miedycynskaj dapamohi. Praź niekalki hadzin nieviadomyja ludzi ŭ cyvilnym vykrali palityka z reanimacyjnaj pałaty na vačach u jaho žonki.

Hałoŭny ŭrač balnicy Viktar Sirenka paviedamiŭ žurnalistam, što Niaklajevu dyjahnastavanyja «ŭdary miakkich tkanak tvaru i hiematoma kalavačničnaj vobłaści — inšych paškodžańniaŭ nie vyjaŭlena». Adnak blizkija Niaklajeva miarkujuć, što ŭ jaho bolš surjozny dyjahnaz, bo jon znachodziŭsia biez prytomnaści 7 chvilin, byŭ źmieščany ŭ adździaleńnie reanimacyi i nie moh stajać na nahach.

Advakat Niaklajeva Tamara Sidarenka pakul nie moža sustrecca sa svaim padabaronnym, tamu pra jaho ciapierašni stan nie viadoma.

22 śniežnia ministr unutranych spraŭ Anatol Kulašoŭ zajaviŭ žurnalistam, što zatrymanyja kandydaty Andrej Sańnikaŭ i Uładzimir Niaklajeŭ «absalutna zdarovyja, absalutna narmalna, kamfortna siabie adčuvajuć».

Jon taksama paviedamiŭ, što nikomu z zatrymanych u ramkach rasśledavańnia kryminalnaj spravy pra masavyja biesparadki ŭ Minsku 19 śniežnia pakul abvinavačańnie nie pradjaŭlena, ciapier iduć dopyty. «Kandydaty znachodziacca ŭ adpaviednych miescach. U ramkach rasśledavańnia kryminalnaj spravy ich dziejańniam budzie dadziena pravavaja acenka», — zajaviŭ Kulašoŭ.

Nahadajem, Niaklajeŭ i Sańnikaŭ znachodziacca ŭ śledčym izalatary KDB. Pozna viečaram 22 śniežnia minajuć troje sutak z momantu ich zatrymańnia, paśla čaho jany pavinny być abo vyzvalenyja, abo termin papiaredniaha zatrymańnia budzie praciahnuty.

• 0
• 0
• 0
• 0
• 0
• 0
• 0
• 0