U Minsku prezientavany daviednik «Šou-biźnies Biełarusi 2011»

Prezientacyja novaha daviednika «Šou-biźnies u Biełarusi 2011» adbyłasia viečaram 12 śniežnia ŭ adnym sa staličnych kłubaŭ.

Štohadovy daviednik «Šou-biźnies u Biełarusi» vychodzić u śviet čaćviorty raz. Vypuskaje vydańnie, u jakim pryviedzienyja źviestki pra biełaruski šou-biźnies, staličnaje vydaviectva «Medžyk». Sioleta daviednik vyjšaŭ nakładam 10 tys. asobnikaŭ.

Jak skazaŭ na prezientacyi hienieralny dyrektar vydaviectva «Medžyk» Juryj Budźko, adroźnieńnie novaha daviednika ad papiarednich u tym, što ŭ im źjaviłasia «vielmi šmat novych asob». Abjom vydańnia amal nie źmianiŭsia, ale prykładna treć infarmacyi — pra novych artystaŭ.

Jon adznačyŭ, što papiarednija try hady stvaralniki daviednika pracavali hałoŭnym čynam u Minsku i Minskaj vobłaści. «Nam prosta nie chapała hoda dla taho, kab pašyryć hieahrafiju, — skazaŭ jon. — Ciapier my stali bolš pracavać z rehijonami, i vyśvietliłasia, što dna talentam tam nie vidać». Jon paviedamiŭ, što praca pa stvareńni novaha daviednika «Šou-biźnies u Biełarusi 2012» pačniecca ŭžo z pačatku 2011 hoda, i jon ubačyć śviet ŭ vieraśni-listapadzie nastupnaha hoda.

Jak paviedamiŭ Budźko, da novaha vydańnia daviednika budzie prykładacca miedyjadysk, jaki nie ŭdałosia vypuścić da ciapierašniaj prezientacyi pa techničnych pryčynach. Jon zaŭvažyŭ, što vydaviectva šukaje novyja šlachi raspaŭsiudžańnia daviednika. Tak, pavodle jaho słoŭ, vydańnie «Šou-biźnies u Biełarusi 2010» było nakiravana kožnamu načalniku adździeła kultury rajonaŭ i ŭsim dyrektaram damoŭ kultury Biełarusi. Častka nakładu hetaha hoda taksama budzie raspaŭsiudžvacca biaspłatna.

Nahadajem, składalniki daviednika staviać pierad saboj dźvie zadačy: dapamahčy biełaruskim artystam, padkazaŭšy im adrasy, nieabchodnyja dla paśpiachovaj dziejnaści, a taksama dapamahčy tym, chto arhanizuje kancerty, padkazaŭšy imiony novych cikavych artystaŭ. Sioleta pačaŭ pracavać taksama abjomny partał www.show-biz.by, jaki aprača tekstavaj infarmacyi pra vykanaŭcaŭ uklučaje aŭdyjo- i videamateryjały.

U daviedniku sabranyja źviestki pra biełaruski šou-biźnies, uklučajučy infarmacyju pra vykanaŭcaŭ i kalektyvy roznych žanraŭ (ad akademičnaj muzyki da elektronnych prajektaŭ), tancavalnyja i chareahrafičnyja kalektyvy, pradziusaraŭ, pramoŭtaraŭ, šoumienaŭ i viadučych. Taksama ŭ vydańni jość źviestki pra aficyjnyja struktury, teatralnyja i kancertnyja placoŭki, fiestyvali, pasłuhi, źviazanych z šou-biźniesam.

• 0
• 0
• 0
• 0
• 0
• 0
• 0
• 0