Zładziła hrupa žančyn. Im nie dazvolili pieradać zvarot da ŭdzielnikaŭ Usiebiełaruskaha narodnaha schodu.
6 śniežnia ŭ Minsku, na płoščy Svabody, adbyŭsia niesankcyjanavany pikiet pradstaŭnikoŭ hrupy žančyn, paciarpiełych ad asabliva ciažkich złačynstvaŭ, niazhodnych z rašeńniami sudoŭ pa svaich hramadzianskich spravach i kryminalnych spravach blizkich.
U akcyi ŭdzielničali bolš za 30 čałaviek z usich rehijonaŭ krainy. Jany trymali raściažkami z nadpisami: «Administracyja prezidenta Respubliki Biełarusi — nadziejnaja abarona biezzakońnia ŭ krainie!», «Kruhavaja paruka čynoŭnikaŭ — biaspraŭje naroda!» i «Patrabujem ad čynoŭnikaŭ vykanańnia Kanstytucyi i zakonaŭ krainy!».
Jak adznačyła na pikiecie juryst Tamara Siarhiej, na praciahu šerahu hadoŭ prava tych, chto sabraŭsia parušajucca čynoŭnikami i nie adnaŭlajucca. Ź vieraśnia 2009 hoda ŭdzielniki pikietu nieadnarazova źviartalisia da kiraŭnika Administracyi prezidenta Uładzimira Makieja z adzinaj prośbaj vysłuchać zajaŭnikaŭ. «Adnak nam zaŭsiody admaŭlali. Takim čynam, ułada nie tolki nie vyrašaje našy prablemy, ale i nie choča nas vysłuchać. A pavodle ž treciaha artykuła Kanstytucyi Respubliki Biełaruś ułada ŭ krainie naležyć nie čynoŭnikam, a narodu. Ale narod u nas pieratvaryli ŭ prośbita, jaki chodzić z praciahnutaj rukoj i, jak miłaścinu, prosić abaranić jaho pravy», — skazała juryst.
Jana źviarnułasia da ŭdzielnikaŭ Usiebiełaruskaha narodnaha schodu z prośbaj abaranić pravy tych, chto sabraŭsia, padtrymać inicyjatyvu ab stvareńni pa prykładzie Vialikabrytanii niezaležnaj hramadskaj kamisii pa pierahladzie kryminalnych i hramadzianskich spraŭ, a taksama zapatrabavać ad čynoŭnikaŭ vykanańnia Kanstytucyi i zakonaŭ krainy.
Supracoŭniki śpiecsłužbaŭ u cyvilnym nazirali za akcyjaj i viali videazdymku pikietu, jaki praciahvaŭsia kala 40 chvilin. Zatym pradstaŭniki hrupy žančyn nakiravalisia ŭ Hienieralnuju prakuraturu i ŭručyli zajavu na imia hienprakurora Ryhora Vasileviča z prośbaj pryciahnuć da adkaznaści namieśnika staršyni Minharvykankama Michaiła Ciciankova «za niezakonnuju sprobu pieraškodzić praviadzieńniu pikietu». Pravaachoŭnyja orhany nie dazvolili ŭdzielnikam hrupy pieradać zvarot za podpisami bolš za 60 hramadzian ŭdzielnikam Usiebiełaruskaha narodnaha schodu.
Ciapier čytajuć
Uvodziać adkaznaść za prapahandu homaseksualnaści, biaździetnaści, a taksama za niezakonnaje pradstaŭleńnie Biełarusi na mižnarodnaj arenie20
Kamientary