Biełaruski viadučy raskazaŭ pra svaju bjuci-rucinu ŭ 32 hady — heta nie tolki krem dla tvaru

Maksim pačaŭ vučycca dohladu za skuraj, jašče kali byŭ padletkam. Pieršym bjuci-srodkam dla jaho była salicyłavaja kisłata — chłopiec vykarystoŭvaŭ jaje, kab zmahacca z pryščami. U studenckija hady Maksim vyrašyŭsia na prafiesijny dohlad i pajšoŭ da kaśmietałahini na čystku, kab prybrać z tvaru vysypańni: było baluča, ale efiektyŭna.

Ź ciaham času jon zrazumieŭ, što dohlad za skuraj — heta nie tolki salicyłavaja kisłata i vada z myłam. Ciapier u jaho šmatstupienčataja bjuci-rucina, pra jakuju Maksim žartuje ŭ sacsietkach:

«U mianie zapytvajuć pašpart u kramach, a maju dziaŭčynu biesiać hetyja maje praviły dohladu za skuraj tvaru».

Pieršaja častka ruciny — dohladavaja kaśmietyka. Chłopiec piša, što karystajecca joj ranicaj i pierad snom, i dla jaho heta abaviazkovaja častka dnia.

«Nie vychodžu z doma biez kremu na tvary i nie kładusia bieź jaho spać. Čym ja karystajusia: abaviazkova ŭmyvałka i ŭvilhatnialny krem, amal abaviazkova tonik. Pierad vychadam z doma jašče nanošu SPF-krem, kab nie było strašnaha słova «fotastaleńnie». Tak, u pachmurnaje nadvorje taksama treba», — raskazvaje Maksim.

Chłopiec nazyvaje ŭvilhatnieńnie skury svaim lubimym etapam u dohladzie. Dla jaho heta nastolki važna, što ŭ redkich vypadkach, kali jon zabyvaje namazacca kremam i zhadvaje pra heta paśla vychadu z doma, jon viartajecca, kab nanieści krem.

Takaja rucina, viadoma, zajmaje čas, tym bolš što časam chłopiec teściruje na sabie i antyŭzrostavyja srodki. Atrymlivajecca pa 20‑30 chvilin na dohlad rankam i ŭviečary, to-bok hadzina na dzień i 7 hadzin na tydzień — heta biesić i Maksima, i jaho dziaŭčynu, pryznajecca jon.

Akramia chatniaha dohladu za skuraj, Maksim vydatkoŭvaje čas i na prafiesijny:

«Ja chadžu da kaśmietałahiń. Pracavaŭ z roznymi, zaŭsiody źviartaŭ uvahu na vodhuki i padychod. Kruta, kali vam nie abiacajuć vyrašyć usie prablemy za adzin sieans.

Nie, chadzić da kaśmietołahaŭ mužčynie nie soramna. Asabista ja liču, što chacia b na kansultacyju varta schadzić kožnamu. Nie, zvarot da kaśmietołaha ničoha nie kaža pra seksualnuju aryjentacyju».

Maksim raskazvaje, što za pracedury rabiŭ u śpiecyjalistki:

«Zrazumieła, čystka. Jašče rabiŭ łaziernuju epilacyju na tvary, kab nie raśli vusy i barada — kazali, što stanu skury heta taksama dapamahaje. Byŭ jašče karbonavy pilinh, alhinatnaja maska.

Napeŭna, heta niešta samaje jaskravaje-prykolnaje. Byli jašče roznyja karysnyja prafiesijnyja ŭvilhatnieńni i ŭmacavańnie skury kremami, vitaminami i čym tam jašče heta možna rabić».

Jašče adno bjuci-praviła Maksima — nikoli nie dakranacca rukami da tvaru: jość mierkavańnie, što praz ruki my možam pieranieści na tvar brud i bakteryi, a taksama raściahvajem skuru, što spryjaje zmorščynam. Paršuta kaža, što nie dazvalaje i inšym ludziam dakranacca da jaho tvaru. Adzinaje vyklučeńnie — jaho dziaŭčyna.

Dalej idzie dyjeta. Maksim nie pje małako z łaktozaj i imkniecca ŭvohule pić kavu biez małaka, pje nie mienš za litr vady štodzień, amal nie spažyvaje čypsy, ałkahol i sałodkuju haziroŭku. Praŭda, dazvalaje sabie šmat sałodkaha.

Usio heta moža pracavać u 32, ale ŭ budučym moža pryjści čas i dla bolš surjoznych mietadaŭ. Maksim ich prymaje:

«Ja narmalna staŭlusia da botaksu i inšych bolš invaziŭnych mietadaŭ, čym prosta pamazacca kremam. Dobra staŭlusia da płastyčnaj chirurhii, kali heta asensavany vybar, sam rabiŭ sabie apieracyju na vušy.

Kali heta biaśpiečna, kali vy sami hetaha chočacie i heta zrobić vas ščaślivym ci ščaślivaj — varta rabić. I z dobrymi śpiecyjalistami ci śpiecyjalistkami, viadoma».

• 3
• 1
• 1
• 4
• 1
• 0
• 0
• 0