Čatyry mikrarajony na 20 tys. čałaviek pabudujuć u Minsku na miescy vioski Sucharava
U Minsku na miescy byłoj vioski Sucharava pabudujuć čatyry novyja mikrarajony, u jakich zmohuć žyć 20 tys. čałaviek. Pra heta paviedamili ŭ UKB Minharvykankama.
Maštabnaja budoŭla razhorniecca na terytoryi ŭ miežach vuł.Šaranhoviča — Hareckaha — Rafijeva. Pieršyja damy pačnuć uzvodzić užo ŭ červieni biahučaha hoda. Terytoryja budzie asvojvacca pastupova. Dla navasiołaŭ stvorać usie ŭmovy dla kamfartabielnaha pražyvańnia: škoły, dziciačyja sady, mahaziny, abjekty bytavoha absłuhoŭvańnia, aŭtastajanki. Čakajecca, što paŭnacennym haradskim žyćciom novy mikrarajon zažyvie praź piać hadoŭ.
Adznačym, što ŭ Minsku ciapier pačałosia asvajeńnie i inšych terytoryj — žyłych rajonaŭ Lebiadziny i Paŭnočny. U pryvatnaści, zabudova Lebiadzinaha startuje ŭ červieni. U hetym malaŭničym kutočku stalicy praz 4‑5 hadoŭ zmohuć pasialicca amal 25 tys. čałaviek. Nacyjanalny kałaryt u architekturu ŭniasuć kitajskija kampanii, jakija razam ź biełaruskimi kalehami buduć udzielničać u zabudovie rajona. Bolš jak 40 tys. čałaviek zmoža ŭmiaścić žyły rajon Paŭnočny, raźmieščany pamiž pasiołkami Navinki i Zacań. Užo ŭ 2011 hodzie na miescy pustki źjaviacca pieršyja damy mikrarajonaŭ Paŭnočny‑1 i Paŭnočny‑2.
Miž tym u adpaviednaści z adkarekciravanym hienieralnym płanam Minska da 2030 hoda terytoryja stalicy da hetaha terminu pavialičycca na 200 kv.km — da 550 kv.km. Dalej horad, pavodle zadumy architektaraŭ, terytaryjalna raźvivacca nie budzie. Na dumku raspracoŭščykaŭ dakumienta, kolkaść nasielnictva Minska da 2030 hoda nie pavinna pierasiahnuć 2 młn. čałaviek, a štohadovyja abjomy budaŭnictva žylla skłaści nie bolš jak 1,2 młn.kv.m.
Ciapier čytajuć
«Ja nie bomž, u mianie navat biełyja škarpetki». U Minsku dziaŭčyna z Łuhanska raskłała pałatku prosta ŭ padjeździe šmatpaviarchovika, ustryvožyŭšy žycharoŭ2121
Kamientary