Pasoł Rasii zajaviŭ pra praciah pastavak nafty na Kubu, niahledziačy na pahrozy Trampa ŭvieści pošliny
Rasija nieadnarazova pastaŭlała naftu na Kubu ŭ apošnija hady i nie źbirajecca admaŭlacca ad novych pastavak, zajaviŭ rasijski pasoł u respublicy Viktar Karaneli.
«My zychodzim z taho, što hetaja praktyka [ekspart nafty na Kubu] budzie praciahnuta», — skazaŭ dypłamat u intervju «RIA Naviny».
Zajava pradstaŭnika Rasii prahučała paśla taho, jak prezident ZŠA Donald Tramp padpisaŭ ukaz, jaki dazvalaje ŭviadzieńnie dadatkovych pošlin na tavary z krain, što naŭprost abo ŭskosna pastaŭlajuć naftu na Kubu. Pry hetym kankretny pamier mahčymych mytaŭ u dakumiencie nie ŭkazany. Adnačasova Tramp abviaściŭ u ZŠA nadzvyčajnaje stanovišča z-za pahrozy nacyjanalnaj biaśpiecy z boku Kuby, nahadvaje Moscow Times.
Raniej amierykanski prezident nieadnarazova zajaŭlaŭ, što Kuba «vielmi blizkaja da kałapsu» i «voś-voś abryniecca», bo pazbaviłasia pastavak nafty ź Vieniesueły i źviazanych ź imi dachodaŭ. Krynicy Politico ŭ administracyi Trampa adznačali, što Vašynhton maje namier damahacca źmieny režymu na Kubie, u tym liku z dapamohaj błakady impartu nafty.
U kancy studzienia ŭ kampanii Kpler padličyli, što respublika pry siońniašnim uzroŭni popytu i ŭłasnaj niaznačnaj zdabyčy nafty zmoža pratrymacca bieź impartu paliva jašče 15—20 dzion.
Na hetym fonie administracyja Trampa pačała aktyŭna šukać unutry kubinskaha ŭrada fihuru, jakaja dapamoža zrynuć ciapierašniuju ŭładu da kanca 2026 hoda.
Na dumku vašynhtonskich stratehaŭ, ekanomika Kuby znachodzicca «na miažy kałapsu» paśla straty padtrymki Vieniesueły, a ŭrad nikoli nie byŭ nastolki ŭraźlivym. U pošukach prydatnaj kandydatury pradstaŭniki ZŠA sustrakajucca z kubinskimi emihrantami ŭ Majami i Vašynhtonie. Adnak kankretnaha płana pa źmienie ŭłady na Kubie, jak adznačała WSJ, u Biełaha doma pakul niama.
Rasija, u svaju čarhu, nakiravała na Kubu ciažki vajenna-transpartny samalot Ił-76, jaki zvyčajna vykarystoŭvajecca dla pierakidki vajennaj techniki. Paśla prybyćcia borta ŭ respubliku kiraŭnik MZS Rasii Siarhiej Łaŭroŭ zajaviŭ, što Maskva hatovaja praciahvać «akazańnie nieabchodnaj palityčnaj i materyjalnaj padtrymki» Havanie, jakaja znachodzicca pad ciskam administracyi Trampa.
Ciapier čytajuć
Adstaŭny padpałkoŭnik milicyi adsudziŭ kvateru ŭ svajoj dački. Hučnaja siamiejnaja historyja z Bresta7
Kamientary
"ZŠA prapanavali Indyi zamianić rasijskuju naftu na vieniesuelskuju"
-NN
cikava, vyhladaje jak heta było usio zapłanavana D. Trampam. Saška nie śpi ŭ šapku, Indusy za 22 $ urałs biaruć, ty kažy impieryjalistam 10 $ nie bolš ))