14 studzienia pamior viadomy viciebski mastak Fieliks Humien. Jamu było 84 hady.
Fieliks Humien naradziŭsia 28 sakavika 1941 hoda ŭ siale Kalcova Kumarskaha rajona Amurskaj vobłaści ŭ siamji vajskoŭca. Jahonyja dziacinstva i junactva prajšli ŭ častych pierajezdach pa miescy słužby baćki.
Škołu Humien skončyŭ u Vaŭkavysku, a ŭ 1958 hodzie pastupiŭ na mastacka-hrafičny fakultet Viciebskaha dziaržaŭnaha piedahahičnaha instytuta. Śćviardžajecca, što jon byŭ pieršym u SSSR maładym mastakom, čyim dypłomnym prajektam była akvarel.
Z 1965 pa 1974 hod vykładaŭ na mastacka-hrafičnym fakultecie ŭ Viciebskim piedahahičnym instytucie. Z 1967 pa 2006 hod byŭ členam Biełaruskaha sajuza mastakoŭ (vyjšaŭ ź jaho pa ŭłasnym žadańni).
Usio žyćcio pracavaŭ pieravažna ŭ technicy akvareli. Asnoŭnyja žanry — piejzaž, naciurmort, partret.
Z 1972 hoda mastak zładziŭ bolš za 20 piersanalnych vystaŭ, u tym liku za miežami Biełarusi.
Tvory Fieliksa Humiena znachodziacca ŭ Nacyjanalnym mastackim muziei Respubliki Biełaruś, fondach Biełaruskaha sajuza mastakoŭ, Muziei sučasnaha vyjaŭlenčaha mastactva ŭ Minsku, Viciebskim abłasnym krajaznaŭčym muziei (sam majstar padaryŭ jamu bolš za dźvie tysiačy svaich rabot), Mahiloŭskim abłasnym mastackim muziei imia Maśleńnikava, Połackaj karcinnaj halerei, dyrekcyi mastackich vystaŭ Rasii ŭ Maskvie, a taksama ŭ pryvatnych kalekcyjach Biełarusi i zamiežnych krain.
Kamientary