«Vielmi dobra razumieju biełaruskuju movu. Navat nie dumaŭ». Źjaviłasia VIDEA razmovy biełaruskich palitviaźniaŭ ź Zialenskim
U hetaj sustrečy ŭdzielničali šeść vyzvalenych 13 śniežnia palitviaźniaŭ: Viktar Babaryka, Maryja Kaleśnikava, Uładzimir Łabkovič, Maksim Znak, Maryna Zołatava i Alaksandr Fiaduta.
«My vas padtrymlivajem. My nie ŭjaŭlajem, jak heta niejmavierna składana, kali ŭ stanie vajny, adbyvajecca takaja masavanaja ataka i ahresija z boku Rasii, jak ciažka vam z hetym spraŭlacca i vy ŭsio adno znachodzicie mahčymaść nas padtrymlivać», — skazała napačatku Maryja Kaleśnikava.
Paśla jaje słova ŭziaŭ Maksim Znak. Jon źviartaŭsia pa-biełarusku i spytaŭ Zialenskaha, ci moža jon dapamahčy vyrašyć pytańnie z dakumientami, bo palitviaźni, vyviezienyja va Ukrainu, biez pašpartoŭ.
«Vielmi dobra razumieju biełaruskuju movu. Navat nie dumaŭ», — uśmichnuŭsia Zialenski i paabiacaŭ zaniacca vyrašeńniem hetaj prablemy razam z kiraŭnictvam inšych krain.
Viktar Babaryka ŭ svaim vystupleńni zapytaŭsia, čym vyzvalenyja biełaruskija palitviaźni mohuć dapamahčy Ukrainie.
Zialenski adkazaŭ, što najpieršaja dapamoha — kali jany buduć vykarystoŭvać svoj upłyŭ siarod biełaruskaha naroda, kab pašyrać u im praŭkrainskija nastroi, słać adpaviednyja sihnały. «Dapamahajcie, jak vyjdzie», — padsumavaŭ jon.
Babaryka ŭ adkaz paprasiŭ z razumieńniem stavicca da niekatoraj niedaskazanaści ŭ vykazvańniach niadaŭna vyzvalenych palitviaźniaŭ, patłumačyŭšy jaje «paślaturemnym šokam».
«Usie my adzinyja ŭ acency hetaj pazicyi: vy pakutujecie, vy zaznali ahresiju, i vy całkam majecie racyju: svaboda i žyćcio ludziej, jakija addali za jaje žyćcio — najvažniejšaje. I jana pavinna pieramahčy», — zajaviŭ jon.
Uładzimir Łabkovič zajaviŭ pra važnaść taho, kab ciapierašniaje vyzvaleńnie palitviaźniaŭ u Biełarusi nie było apošnim, i paprasiŭ Zialenskaha hetamu spryjać. Taksama jon zaklikaŭ nie atajasamlivać režym Łukašenki ź biełaruskim narodam, zapeŭniŭšy, što siarod prostych biełarusaŭ padtrymka Ukrainy vialikaja. Vielmi važna navat ciapier nie stracić histaryčna-kulturnyja poviazi biełaruskaha i ŭkrainskaha narodaŭ.
Alaksandr Fiaduta taksama vystupiŭ pa-biełarusku i źviarnuŭ uvahu Zialenskaha na toje, što ŭ źniavoleńni asabliva ciarpiać žančyny, a tamu važna prykładać vialikija namahańni, kab vyzvalali ich z Homielskaj kałonii. Taksama jon pažadaŭ Uładzimiru Zialenskamu pieramohi na budučych prezidenckich vybarach.
Času na toje, kab vystupić Marynie Zołatavaj, nie chapiła.
Naprykancy Maryja Kaleśnikava vykazała žadańnie, što biełaruskija palitviaźni buduć mieć mahčymaść sustrecca ź Zialenskim asabista i jaho abniać.
Babaryka: Akty ahresii suprać suvierennaj dziaržavy absalutna nieprymalnyja ŭ sučasnym śviecie
Vyzvalenyja biełaruskija palitviaźni parazmaŭlali ź Zialenskim
Maryja Kaleśnikava padziakavała Zialenskamu za pryjom palitviaźniaŭ
Zialenski parazmaŭlaŭ z Maryjaj Kaleśnikavaj i pavinšavaŭ jaje z vyzvaleńniem
Kamientary