Jość stoł, kanforki, vanna i ŭnitaz — što jašče treba dla ščaścia za 280 dalaraŭ? Žart, jaki staŭ realnaściu ŭ Minsku
Zdajecca, hety žart užo vychodzić z-pad kantrolu. Trend na arendu žylla biez azdableńnia pačaŭsia prykładna ŭ toj momant, kali ŭ Minsku startavała budaŭnictva vialikaha žyłoha masivu na miescy byłoha aeraporta. Ludzi nakuplali niedarahich mietraŭ, i z apošnimi treba było niešta rabić. Kamuści pryjšła ideja zdavać hołyja bietonyja «kvadraty» niepatrabavalnym kvatarantam, i pajšło.
U takoha vidu žylla jość plus: jano zvyčajna niadoraha kaštuje. Ale nie zaŭsiody. Naprykład, zaraz u «Minsk-Śviecie» zdajecca adnapakajoŭka biez adździełki za davoli niemaleńkija $280, piša Onliner.by.
Kvatera znachodzicca ŭ domie «Miłan» na vulicy Ščamialova, 30. Adznačajecca, što arandatara šukajuć na doŭhi termin — nie mienš za dva hady. Ź plusaŭ: u kvatery prapisany čałaviek, a značyć, kamunalnyja płaciažy buduć nievysokija.
— Biez ramontu, ale dla žyćcia jość usio nieabchodnaje, — adznačaje aŭtar abjavy. — Ustalavany ŭnitaz, vanna, stalnica z myjkaj, na padłozie linoleum, ścieny prahruntavany. Razietki ŭsie jość i vyklučalnik. U sanvuźle jość truby i 220 V dla padłučeńnia pralnaj mašynki.
Kali tak padumać, to sapraŭdy, u kvatery jość minimalny nabor dla isnavańnia. Ale, pahadziciesia, žyllo — heta nie tolki pra funkcyjanał. Akramia nieabchodnaści pajeści, pamycca i schadzić u tualet čałaviek maje patrebu jašče i va ŭtulnaści: lusterka, jomistyja šafy, štory na voknach… Łožak, viadoma, taksama b nie zaškodziŭ.
Źniać takuju napaŭhatovuju kvateru možna za $280 u miesiac.
Cikava, što ŭłaśnik zapatrabuje jašče i załoh pamieram miesiačnaj arendnaj płaty. Heta davoli raspaŭsiudžanaja praktyka, jakaja daje ŭładalnikam harantyju, što paśla vyjezdu kvatarantaŭ majomaść kvatery budzie ŭ paradku.
Kamientary