Vybaram va Ukrainie ciapier pieraškadžajuć dźvie vialikija prablemy
Zajava Uładzimira Zialenskaha pra jaho hatoŭnaść pravieści vybary nie źjaviłasia b, kali b nie słovy Donalda Trampa. U hetym sensie reakcyja prezidenta Ukrainy była chutkaj i maksimalna pradmietnaj: chočacie vybary — niama prablem. Dakładniej, jość. Dźvie, piša VVS Ukraina.
Kali maksimalna spraścić hety naratyŭ, praviadzieńniu vybaraŭ va Ukrainie ciapier pieraškadžajuć dźvie prablemy.
Pieršaja — vajna
Štodnia na ŭkrainskija harady i vioski prylatajuć sotni rasijskich dronaŭ i dziasiatki rakiet. U tym ža Kijevie byvajuć dni, kali jaho žychary pa dziesiać hadzin zapar siadziać bieź śviatła. Udary prypadajuć nie tolki na vajskovyja abjekty i enierhietyčnuju infrastrukturu, ale i na žyłyja šmatpaviarchoviki.
Heta nie samy lepšy momant dla praviadzieńnia pieradvybarčaj ahitacyi i arhanizacyi hałasavańnia, piša Bi-bi-si, (asabliva ŭličvajučy, što adrasy vybarčych učastkaŭ buduć u adkrytym dostupie, i kali b niechta, naprykład Rasija, zachacieŭ ź niejkaj pryčyny sarvać volevyjaŭleńnie, jana mahła b nanieści ŭdary prosta pa hetych kaardynatach, paśla nazvaŭšy ich vajskovymi abjektami).
Druhaja — arhanizacyjnaja
Dziejnaje va Ukrainie vybarčaje zakanadaŭstva nie daje adkazaŭ, naprykład, na pytańnie, jak arhanizavać hałasavańnie dla niekalkich miljonaŭ uciekačoŭ ad vajny, — bo ŭžo ciapier zrazumieła, što ŭčastki ŭ budynkach pasolstvaŭ i konsulstvaŭ nie zmohuć pryniać navat niaznačnuju častku hetych ludziej, kali jany zachočuć prahałasavać.
Abo jak prahałasujuć sotni tysiač bajcoŭ USU na pieradavoj (nie kažučy ŭžo pra toje, jak zabiaśpiečyć ich vidavočnaje prava być abranymi ŭ orhany ŭłady krainy, jakuju jany abaraniajuć).
Jość jašče treciaja prablema — hrošy na hetyja vybary, ale jaje pakul vyniesiem za dužki.
Što pazaŭčora skazaŭ Zialenski? Što jon absalutna nie suprać vybaraŭ.
Jon skazaŭ, što druhoje pytańnie Kijeŭ biare na siabie. Zabarony na praviadzieńnie prezidenckich vybaraŭ padčas vajny sapraŭdy niama ŭ Kanstytucyi Ukrainy, tamu varta admianić zakanadaŭčuju zabaronu na kampaniju padčas vajennaha stanovišča, a taksama zakanadaŭča razhledzieć pytańnie hałasavańnia ŭ «asablivy pieryjad». Heta zadača nietryvijalnaja, ale kali vielmi treba — jaje možna realizavać, i — napierad. Adpaviednyja daručeńni Zialenski svajoj zajavaj užo daŭ.
Kanstytucyja dakładna zabaraniaje tolki parłamienckija vybary padčas vajennaha stanovišča, a voś zabarona na ŭsie astatnija vidy vybaraŭ źmiaščajecca ŭ zakonie pra pravavy režym vajennaha stanovišča, jaki možna źmianić 226 hałasami — jak i vybarčaje zakanadaŭstva.
A voś vyrašyć pieršuju zadaču Ukraina dakładna nie moža.
Što ž, kaža Uładzimir Zialenski svajmu amierykanskamu kalehu, kali vam tak patrebnyja vybary i my nie suprać — zrabicie ich, kali łaska, realnymi.
Zrabicie tak, kab udzielniki vybaraŭ mahli źbirać pieradvybarčyja mitynhi. Kab ludzi nie bajalisia iści na ŭčastki. Kab členy kamisij mahli paličyć addadzienyja hałasy, nie bajučysia, što praces padliku sarvie «šachied» ci «kalibr».
Inšymi słovami, heta pavinna być paśla pačatku dastatkova praciahłaha pieramirja, jakoha nastojliva patrabuje apošni hod Kijeŭ i ad jakoha nie mienš nastojliva admaŭlajecca Maskva.
Reziumujučy: zajavaj pra vybary Zialenski prosta pierakinuŭ miač na pole Vašynhtona i paćvierdziŭ, što jon vybaraŭ nie baicca.
Ciapier čytajuć
«Ja taja samaja ŭ futry». Maładaja švačka pracavała ŭ futry, pakul dziaržTB raskazvała, što na fabrycy ŭ Žłobinie nie choładna11
Kamientary
Tak-ta Ukraina parłamienska-prezidenskaja respublika pa Kanstytucyi, a nie ofisna-prezidenskaja jak jaje Ziermaki arhanizavali. I zvalnieńnie Załužnaha padčas vajny było bolš apasnym rašeńniem dla krainy.
Patrebny ŭrad "nacyjanalnaj jednaści"
Na akupavanych terytoryjach vybary niemažlivyja. Tam pucin praviadzie svaje vybary i paśla hetaha novaja ŭłada jak by stanie zakonnaj.
U frantovaj i pryfrantovaj pałasie vybary niemažlivyja praź niebiaśpieku.
U jeŭropie vybary niemažlivyja (siarod biežancaŭ) bo nichto ich nie budzie ładzić.