«Usie prymiežnyja parkoŭki zabityja furami ź litoŭskimi numarami». Łukašenka ŭvioŭ dadatkovyja abmiežavańni dla litoŭskich pieravozčykaŭ

Hałoŭnyja źmieny datyčać litoŭskich hruzavikoŭ, pryčepaŭ i paŭpryčepaŭ.

Ciapier hruzaviki, pryčepy i paŭpryčepy na litoŭskaj rehistracyi, za niekatorymi vyklučeńniami, mohuć ujazdžać i vyjazdžać ź Biełarusi tolki praź biełaruska-litoŭskuju miažu, jakaja ciapier amal poŭnaściu zakrytaja.

Dla polskich pieravozčykaŭ takija abmiežavańni isnujuć jašče z 18 lutaha 2023 hoda. Za niekatorymi vyklučeńniami, u jakija ŭ tym liku trapili aŭtavozy i niehabarytnyja hruzy, astatnija daŭno majuć prava zajazdžać na terytoryju Biełarusi i pakidać jaje tolki praź biełaruska-polski ŭčastak miažy.

Praz heta na čas zakryćcia miažy Polščaj sioleta ŭ vieraśni amal paŭtary tysiačy polskich hruzavikoŭ nie mahli pakinuć Biełaruś.

Litoŭcy stracili pieravahi

U adroźnieńnie ad polskich pieravozčykaŭ, jakija z 2023 hoda mohuć pierasiakać miažu ź Biełaruśsiu vyklučna praź biełaruska-polskuju miažu, litoŭskija dahetul mahli zajazdžać i vyjazdžać u našu krainu praź Litvu, Łatviju i Polšču. A litoŭskija pryčepy i paŭpryčepy možna było vykarystoŭvać dla pieračepki, tamu imi karystalisia nie tolki litoŭskija, ale i polskija pieravozčyki.

Ciapier ža ŭ vykarystańni litoŭskich pryčepaŭ i paŭpryčepaŭ u źviazcy z polskimi ciahačami sensu nie zastałosia, bo zajechać u Biełaruś i vyjechać ź jaje jany mohuć tolki praź biełaruska-litoŭskuju miažu.

Pa słovach dalnabojščyka, jaki siońnia vyjechaŭ ź Biełarusi ŭ Polšču, usie pryhraničnyja parkoŭki z polskaha boku zastaŭlenyja litoŭskimi furami i paŭpryčepami.

Ź jaho słoŭ, polskija transpartnyja kampanii praz abmiežavańni rynulisia źmianiać litoŭskuju prapisku pryčepaŭ na polskuju abo niejkuju inšuju jeŭrapiejskuju. Bo ciapier jak litoŭskija, tak i polskija pryčepy nielha vykarystoŭvać dla pieračepki, a litoŭskija pryčepy možna ŭvozić i vyvozić tolki praź miažu ź Litvoj.

Pry hetym fury ź jeŭrapiejskaj rehistracyjaj mohuć jeździć ad pamiežnych punktaŭ propusku ŭ TŁC i nazad dla pieračepaŭ i pierahruzaŭ, ale tolki nie z pryčepami z polskaj abo litoŭskaj rehistracyjaj.

Čarhi niama

Praz hetyja akaličnaści navat atrymałasia, što ciapier niama hruzavoj čarhi na vyjezd z Polščy ŭ Biełaruś, bo praz Kazłovičy nie mohuć zajechać ni litoŭskija fury ź jakimi-niebudź pryčepami, ni polskija ci jašče jakija — ź litoŭskimi pryčepami.

Furam, jakija da ŭviadzieńnia abmiežavańniaŭ zahruzilisia tavarami ŭ Biełarusi, dali mahčymaść vyjechać praz Polšču abo Łatviju.

Parožnyja hruzaviki adpraŭlajuć u Kamienny Łoh. A kali, naprykład, ciahač maje polskuju rehistracyju, a pryčep abo paŭpryčep — litoŭskuju, to ich adpraŭlajuć z Bresta ŭ Bierastavicu, kab jany mahli tam pakinuć paŭpryčep. Vyvieźci litoŭskija pryčepy ź Biełarusi možna tolki praź miažu ź Litvoj.

Pavialičyć

Pry hetym niekatoryja ŚMI padajuć navinu tak, nibyta Łukašenka ŭvioŭ poŭnuju zabaronu na zajezd na terytoryju Biełarusi hruzavikoŭ, zarehistravanych u Litvie i Polščy, ale heta nie tak.

Što na łatvijskim kirunku?

Łatvijskija pieravozčyki z usich troch susiednich krain ES ciapier znachodziacca ŭ najbolš vyhadnym stanoviščy, bo pieravozčyki z Łatvii, jak i ź inšych krain ES (aproč Litvy i Polščy), majuć prava zajazdžać i dastaŭlać hruzy dla nastupnaj pierahruzki abo pieračepki biez pryviazki da łatvijska-biełaruskaj miažy.

Što da samoj čarhi na łatvijskim kirunku, to jana tam elektronnaja, i paśla zakryćcia miažy Litvoj jana vyrasła z 1‑2 dzion da 11. Pa stanie na 3 listapada bližejšyja volnyja słoty na vyjezd z Łatvii dla hruzavikoŭ z tavaram — 14 listapada. Dla hružanych fur, jakija majuć prava na pryjarytetny prajezd, — na 10 listapada. Bolš za ŭsio daviadziecca čakać parožnim hruzavikam: dla ich samy blizki słot jość tolki na 18 listapada. Uvohule adziny dziejny punkt propusku na miažy z Łatvijaj za sutki hatovy prapuskać u Biełaruś 120 hruzavikoŭ.

Što z cenami na dastaŭku i čaho čakać dalej?

Čałaviek, jaki zajmajecca aptovymi pastaŭkami tavaraŭ z Polščy ŭ Biełaruś, kaža, što kali raniej za furu z Varšavy da Minska płacili ad 1800 da 2200, maksimum 2500 jeŭra, to ciapier jamu nazyvajuć ličbu 3500 jeŭra.

«Kali Polšča zakryła miažu, to za furu z Varšavy da Minska na piku brali pa 4‑5 tysiač. Z adnaŭleńniem pracy ceny pajšli ŭniz, ale ciapier znoŭ vyraśli, choć i nie da pikavych pakazčykaŭ», — kaža biznesoviec.

Łahist ličyć, što ciapierašniaja situacyja choć i padobnaja da toj, jakaja skłałasia, kali miažu zakryła Polšča, ale nazyvaje jaje nie takoj składanaj.

«Praz dva punkty propusku na miažy ź Litvoj za sutki prajazdžała hruzavikoŭ u 2‑4 razy mienš, čym praz adzin polski. Tamu ahułam zakryćcio miažy Litvoj vyhladaje nie tak strašna. Adzinaje, što niejki čas u pieravozčykaŭ budzie niedachop pryčepaŭ, ale heta, ja dumaju, jany vyrašać davoli chutka», — ličyć śpiecyjalist.

Na dumku łahista, ciapierašnija abmiežavańni ŭ pieršuju čarhu nakiravanyja na Litvu.

«Pakul miaža ź Litvoj zastaniecca zakrytaj, litoŭskija pieravozčyki, u adroźnieńnie ad ich polskich i łatvijskich kaleh, nie zmohuć pracavać na biełaruskim kirunku».

Siarod farmalna litoŭskich pieravozčykaŭ niejkaja častka de-fakta budzie biełaruskimi, ale ich dola budzie nievialikaja. Reč u tym, što paśla ŭviadzieńnia zabarony na pracu biełaruskich pieravozčykaŭ u Jeŭrasajuzie mnohija biełarusy adkryli transpartnyja kampanii ŭ ES. Ale Litva i Łatvija karystalisia mienšaj papularnaściu ŭ jakaści miesca rehistracyi, čym Polšča.

• 2
• 0
• 6
• 8
• 0
• 0
• 1
• 0