Škoły va ŭsich rehijonach Rasii pačali rychtavać da mahčymych atakaŭ bieśpiłotnikaŭ, paviedamiŭ namieśnik kiraŭnika Minaśviety Alaksandr Buhajoŭ.
Pavodle jaho słoŭ, navučalnym ustanovam razasłali dakumienty, u jakich raśpisany ałharytm dziejańniaŭ u vypadku nalotu dronaŭ, piša Moscow Times.
«U nas dva razy na hod prachodziać usierasijskija vučeńni. Adzin z pytańniaŭ, jakija adpracoŭvajucca, — pavodziny i dziejańni i vučniaŭ, i nastaŭnikaŭ, i naohuł piersanału adukacyjnych arhanizacyj u takich situacyjach», — skazaŭ Buhajoŭ.
Usierasijskija vučeńni pa dziejańniach pry terarystyčnaj pahrozie dla vučniaŭ i supracoŭnikaŭ škoł upieršyniu praviali ŭ žniŭni 2023 hoda. Ich arhanizavała Minaśviety sumiesna z MNS, MUS i Rashvardyjaj.
U 2025 hodzie takija vučeńni prajšli ŭ 88 rehijonach Rasii 29 i 30 krasavika, a taksama 28 i 29 žniŭnia. Pa vynikach mierapryjemstvaŭ navučalnyja ŭstanovy vykładvali spravazdačy.
Sudziačy pa pradstaŭlenych kadrach, siłaviki litaralna insceniravali ataki dronaŭ i zachop zakładnikaŭ.
U mnohich vypadkach u adpracoŭcy abarončych dziejańniaŭ udzielničali ludzi ŭ kamuflažy i z zakrytymi tvarami, jakija navodzili na vychavancaŭ ahniastrelnuju zbroju abo jaje makiety.
Kamientary