Kožny šosty naftavy tankier u śviecie naležyć da rasijskaha «cieniavoha fłotu»
Na pačatku 2025 hoda hety «cieniavy fłot» naličvaŭ kala 940 sudnaŭ.
Rasija zmahła abyści zachodnija sankcyi, stvaryŭšy «cieniavy fłot» naftavych tankieraŭ. Pavodle acenak, kala 17% ad usich dziejučych sudnaŭ takoha kłasa vykarystoŭvajecca dla pieravozki rasijskaj nafty, piša «Ukrainskaja praŭda» sa spasyłkaj na The New York Times.
Paśla pačatku poŭnamaštabnaha ŭvarvańnia Rasii va Ukrainu ŭ 2022 hodzie Zachad uvioŭ šerah sankcyj, skiravanych na abmiežavańnie prybytkaŭ Kramla ad ekspartu nafty. Adnak RF chutka naładziła novuju schiemu zarobku: jana sabrała fłot starych sudnaŭ ź nieprazrystaj strukturaj ułasnaści, jakija tajna dastaŭlajuć naftu ŭ Kitaj, Indyju i inšyja addalenyja rynki.
Pavodle padlikaŭ S&P Global Market Intelligence, na pačatku 2025 hoda hety «cieniavy fłot» naličvaŭ kala 940 sudnaŭ — na 45% bolš, čym hodam raniej. Jaho dola składaje pryblizna 17% ad usiaho suśvietnaha tankiernaha fłotu.
Šmat jakija z hetych sudnaŭ pracujuć biez naležnaha strachavańnia, časta źmianiajuć ściahi, padajuć iłžyvyja danyja pra miescaznachodžańnie i ažyćciaŭlajuć pierahruzku nafty ŭ mory. Heta ŭskładniaje adsočvańnie pachodžańnia nafty i kantrol za vykanańniem sankcyj.
Pavodle dadzienych S&P, siaredni ŭzrost sudnaŭ składaje kala 20 hadoŭ, u paraŭnańni z 13 hadami dla naftavaha fłotu ŭ cełym.
«Adsutnaść strachavańnia ŭ spałučeńni ź vielmi starymi sudnami pavialičvaje ryzyku ekałahičnaj katastrofy», — skazała Natalla Hozak, dyrektar ofisa Greenpeace Ukraina.
Akramia taho, niekatoryja z hetych sudnaŭ padazrajucca ŭ padvodnym sabatažy — paškodžańni trubapravodaŭ abo kabielaŭ.
«Šmat chto choča zrabić najpraściejšuju častku — uvieści sankcyi. Ale nasamreč my stvaryli jašče bolšuju prablemu. Sankcyi nie vyvodziać ich ź biźniesu. Jany vyvodziać ich ź lehalnaha biźniesu», — padkreśliŭ ekśpiert pa marskoj biaśpiecy i zasnavalnik daśledčaj firmy I.R. Consilium Jan Rałbi.
Ciapier čytajuć
Minski haradski sud nie vytrymlivaje nahruzki — nie paśpiavajuć sudzić palitviaźniaŭ10
Kamientary