Žychary vioski pad Baranavičami paprasili ŭ čynoŭnikaŭ zaasfaltavać darohu. Tyja hienijalna vyrašyli prablemu
Pył ad hruntavoj darohi pastajanna traplaje ŭ damy žycharoŭ vioski Albinki. A ŭ čynoŭnikaŭ niama hrošaj, kab jaje zaasfaltavać. Ale vyjście jany znajšli, piša BGmedia.
TRK «Brest» apublikavała siužet pra toje, jak pamočnik Łukašenki pa Bresckaj vobłaści Alaksandr Łomski pryjechaŭ u Baranavicki rajon vyrašać prablemy miascovych. Žychary vioski Albinki paskardzilisia čynoŭnikam na pył ad hruntavoj darohi, jakaja traplaje ŭ ich damy. Jany prasili asfalt.
Čamu žychary Albinak skardziacca na darohu
«Jakaść darožnaha pakryćcia pablizu vioski Albinki nie zadavalniaje miascovych žycharoŭ-dačnikaŭ. Hravijnaja daroha da stancyi «Pałonka», jakuju ŭ minułym hodzie ŭmacavali kroškaj, stała krynicaj mocnaj zapylenaści i padstavaj dla zvarotu na telebačańnie», — raskazvaje dziaržžurnalistka.
Na sustrečy ź dziaržTB i čynoŭnikami sabrałasia šmat žycharoŭ vioski Albinki Baranavickaha rajona. Jany padzialilisia svaimi prablemami. Naprykład, Hanna Pyryk:
«U mianie pieršy ŭčastak ad ST «Uradžaj» ad darohi. Padłohu ja myju try razy na dzień, tamu što dychać tam niemahčyma. Altanka ŭ nas usia ŭ pyle. Drevy ŭvieś čas u pyle. Usie ciaplicy, jakija nieabchodnyja, jakija my sadzim dla taho, kab jeści čysty ekałahičny pradukt, usio ŭ pyle ŭ nas».
Inšy žychar vioski, Barys Słabadziańnikaŭ, raskazaŭ, što jašče ŭ savieckija časy adkryli zbor na budaŭnictva darohi. «Ludzi skinulisia rublom, ale dalej usia hetaja sprava niejak zacichła, a ciapier i zusim śladoŭ nie znajści», — kaža za kadram dziaržžurnalistka.
«Ciahnik pajšoŭ. Kudy hrošy prylipli, nichto nie viedaje. Hrošy majuć ułaścivaść prylipać», — siardzita kaža Barys Słabadziańnikaŭ.
Vykazałasia i Valancina Niamčynava, choć jaje ŭčastak raźmieščany na značnym addaleńni ad hruntavoj darohi, tamu prablema jaje naŭprost nie datyčycca:
«Sioleta da mianie pryjechała ŭnučka i pryviezła siabroŭ z Hiermanii ź dziećmi. Jany ŭ zachapleńni ad Biełarusi. U zachapleńni. Ale kali my jechali pa hetaj darozie, jany kažuć: babula, a jak tut ludzi žyvuć? Tut ža, hladzicie, usio biełaje. Damy jakija, liście. Ja kažu: vy tolki ŭ Hiermanii nie kažycie pra maju darohu.
Ale dapamažycie, kali łaska, nam da vakzała zrabić narmalnuju darohu i žyć hetym ludziam. Maja dača daloka. My ŭ hetym pyle nie ŭdzielničajem. Ale ja dušoj chvareju za ŭsich. Ja chvareju za tych ludziej, jakija voś tut žyvuć. Za ŭsio, za ŭsich, jak jany biednieńkija tut žyvuć».
Jak čynoŭniki vyrašyli prablemu z pyłam ad hruntavoj darohi
Pamočnik Łukašenki pa Bresckaj vobłaści Alaksandr Łomski pryjechaŭ u Albinki i acaniŭ jakaść hruntovaj darohi. Źviartaje ŭvahu, kolki razoŭ jon vymaviŭ słova «napeŭna»:
«Ja chaču skazać, što, napeŭna, jość pytańnie sa stanam darohi. I, napeŭna, ludzi abhruntavana jaho padymajuć. Tamu što ja nie kažu za ćviordaje pakryćcio. Ale siońnia, kali vy zrabili ŭ hravijnym vykanańni hetuju darohu, to jaje treba padtrymlivać i absłuhoŭvać. Jaje treba hrejdziravać».
U miascovych čynoŭnikaŭ niama hrošaj na asfaltavańnie darohi. Jak vyrašyć prablemu z pyłam ad darohi, jany doŭha nie dumali.
«Miascovyja ŭłady tłumačać, pa dadzienym učastku darohi ŭžo pryniatyja peŭnyja miery. Tak budzie źmienieny chutkasny režym. I, jak skazaŭ pamočnik prezidenta, pavialičanaja pieryjadyčnaść hrejdziravańnia paśla atmaśfiernych apadkaŭ», — kaža dziaržžurnalistka.
Rašeńnie patłumačyŭ namieśnik staršyni Baranavickaha rajvykankama Andrej Mielaškievič:
«Vyrašana da siaredziny kastryčnika ŭstalavać na dadzienym učastku znaki pa abmiežavańni chutkaści ruchu. Znak 40 [km/h]. Jak u pačatku, tak i ŭ kancy vioski».
Heta značyć zamiest asfaltavańnia darohi, jakoje sapraŭdy vyrašyła b prablemu z pyłam, čynoŭniki nie prydumali ničoha lepšaha, čym abmiežavać chutkaść na ŭčastku darohi.
Kamientary
Ale heta, viadoma, nie trapiła ŭ siužet.