U Biełarusi pačali pradavać vinahrad «sa smakam cukrovaj vaty». Što za jon?
U adnoj ź biełaruskich handlovych sietak źjaviŭsia ŭ prodažy vinahrad Cotton Candy. Pa słovach pakupnikoŭ, na smak jon nahadavaje sałodkuju vatu abo karamiel. Žurnalisty Telegraf.news daviedalisia, što heta za jahady i kolki kaštujuć.
Što heta za vinahrad?
Cotton Candy (u pierakładzie z anhlijskaj movy «cukrovaja vata») — handlovaja marka sałodkaha biełaha stałovaha vinahrada sorta IFG Seven, smak jakoha paraŭnoŭvajuć z cukrovaj vataj. Pry hetym štučnych aramatyzataraŭ ŭ im być nie pavinna.
Hety sort vyvieli sadoŭnik Devid Kiejn i jaho kamanda ŭ kampanii International Fruit Genetics (IFG), jakaja zajmajecca sielekcyjaj sadaviny, raźmieščanaj u amierykanskim štacie Kalifornija. Ciapier jaho vyroščvajuć taksama ŭ Pieru, Ispanii, Italii, Čyli, Brazilii, Paŭdniovaj Afrycy, Aŭstralii, Jehipcie i Mieksicy.
Viadoma, što vinahrad Cotton Candy maje pakazčyk sałodkaści ad 19 da 20 hradusaŭ Bryksa (miera dla vymiareńnia ŭtrymańnia rastvoranaha cukru ŭ rastvory). Dla paraŭnańnia: bolšaść sartoŭ vinahradu majuć pakazčyk sałodkaści ad 17 da 18 hradusaŭ Bryksa.
U 100 hramach jahad sorta Cotton Candy źmiaščajecca kala 18 hramaŭ cukru, što prykładna na 2 hramy bolš, čym u zvyčajnym stałovym vinahradzie.
Darečy, u im niama kostačak.
Što havorać biełarusy pra smak Cotton Candy?
Tyja, chto ŭžo pasprabavaŭ vinahrad, kažuć, što na smak jon sapraŭdy nahadvaje sałodkuju vatu, karamiel i nazyvajuć «smakavym razryvam».
A niekatoryja havorać, što asabliva nie adčuli cukrovaj vaty abo adčuli tolki tady, kali źjeli šmat. Chtości narakaje, što addaŭ hrošy za «zvyčajny vinahrad kišmiš».
Ale ŭ cełym u sacsietkach karystalniki sychodziacca ŭ dumcy, što jahady vielmi smačnyja.
Kolki kaštuje niezvyčajny vinahrad?
Pradajuć hety sort, naprykład, u kramach Santa — va ŭpakoŭkach pa 250, 500 i 750 hramaŭ. Da nas jaho pryvieźli ź Ispanii.
Ale cana trochi kusajecca — za kiłahram pryjdziecca addać 25 rubloŭ. Dla paraŭnańnia — vinahrad kišmiš ciapier možna znajści ŭ roznych kramach pa 7 rubloŭ za kiłahram.
U Biełarusi vyvieli pieršy ŭłasny sort vinahradu dla suchoha vina
Jak z «Maršała Foša» vyvieli «Łored». Navukoviec raskazaŭ pra biełaruski vinahrad, prydatny dla vyrabu vina
Kavuny, bujaki i «Karaleva Hanna» pa rublu za kiło. Dzie tańniej kupić harodninu i jahady?
U biełaruskija kramy zavieźli jujubu. Što heta takoje?
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary